ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ޤާނޫނު އިޞްލާޙްކުރުމަށް ނިންމައިފިއެވެ.
މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އިން ބުނެފައިވަނީ ގާނޫނު ނަންބަރު 2010/8 (ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ޤާނޫނު) އަކީ 2010 ޖުލައި 8 ވަނަ ދުވަހު ރައީސުލްޖުމްހޫރިއްޔާ ތަޞްދީޤު ކުރައްވައި، އެ ދުވަހުން ފެށިގެން ޢަމަލުކުރަމުން އަންނަ ޤާނޫނެެއް ކަމަށެވެ.
2010 ވަނަ އަހަރުން ފެށިގެން މި ޤާނޫނު ތަންފީޛުކުރުމުގެ މަސައްކަތްކުރަމުންދާއިރު، ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރިކޮށް އެފަރާތްތައް ބާރުވެރިކުރުމަށް ކުރެވެމުންދާ މަސައްކަތްތަކުގެ އެންމެ އެދެވޭ ނަތީޖާ ޙާސިލުކުރުމަށް ތަފާތު ގޮންޖެހުންތަކާއި ހުރަސްތައް ހުރިކަން ފާހަގަކުރެވިފައިވާ ކަމަށެވެ.ެ
އެހެންކަމުން، ދިރިއުޅުމުގެ ހުރިހާ މަރުހަލާތަކެއްގައި ނުކުޅެދުންތެރިކަން ހުންނަ މީހުންނަށް ދިމާވާ ގޮންޖެހުންތަކާއި ހުރަސްތަކަށް އެހީތެރިކަން ފޯރުކޮށްދިނުމަށް އެހީތެރިވެދެވޭނެ ގޮތްތަކުގެ މައްޗަށް އުސޫލުތަކެއް އެކުލަވާލައި އަދި 20 ވަނަ ޤަރުނުގެ އީޖާދުތަކާއި އުފެއްދުންތަކަށް ރިއާޔަތްކޮށް ޒަމާނާއިއެކު އައިސްފައިވާ ބަދަލުތަކާއި އެއްގޮތަށް ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ޤާނޫނު އިޞްލާޙުކުރުމަކީ ނުހަނު ބޭނުންތެރިކަމެކެވެ.
ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރިކުމުގެ މަޤްޞަދު ޙާސިލްކުރުމަށްޓަކައި، މި ބިލް އެކުލަވާލަންވާނީ 3 ބަޔަކަށް ރިޢާޔަތްކޮށްގެންނެވެ.
އެ ބައިތަކަކީ؛
- ނުކުޅެދުންތެރިކަން ހުންނަ މީހުންނާއި ގުޅޭ ބައިނަލްއަޤުވާމީ މުޢާހަދާތަކާއި ޤާނޫނުތަކާއި ސިޔާސަތުތަކުގެ ދިރާސާއެއް ކޮށް، ދިވެހިރާއްޖެއިން ޢަމަލުކުރާ އެހެން ޤާނޫނުތަކާއި ބައިނަލްއަޤުވާމީ މުޢާހަދާތަކާއި އެއްގޮތްވާގޮތުގެ މަތިން ބިލް އެކުލަވާލުން.
- ނުކުޅެދުންތެރިކަން ހުންނަ މީހުންގެ ޙައްޤުތަކަށް ހުރަސްއެޅޭ ކަންކަން ދެނެގަނެ އެ ކަންކަން ހައްލުކުރެވޭނެ ނިޒާމްތަކެއް ބިލްގައި ހިމެނުން.
- އިންޓަރނޭޝަނަލް ބެސްޓް ޕްރެކްޓިސްތަކާއި އެއްގޮތަށް އެހެން ނަމަވެސް ދިވެހިރާއްޖޭގައި ތަންފީޛުކުރެވޭނެ އުސޫލުތަކެއްގެ މައްޗަށް ބިލް އެކުލަވާލުން.
މި މަސައްކަތް ކުރުމަށް މިނިސްޓްރީން ދަނީ ކޮންސަލްޓަންޓެއް ހޯދަމުންނެވެ. އެގޮތުން ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރިކޮށް އެފަރާތްތައް ބާރުވެރިކުރުމަށް ދުނިޔޭގެ އެހެނިހެން ޤައުމުތަކުން ޢަމަލުކުރާ ގޮތްތަކުގެ ތެރެއިން އެންމެ ރަނގަޅު ގޮތްތައް ދެނެގަތުމަށް ދިރާސާކުރުމާއި، ކަމާގުޅުންހުރި އިދާރާތަކާއި މަޝްވަރާކޮށް އެ އިދާރާތަކުން މިފަދަ ބިލެއްގައި ހިމަނަން ބޭނުންވާ ކަންކަން ބިލްގައި ހިމެނުން ކޮންސަލްޓަންޓުގެ މަސައްކަތުގެ ތެރޭގައި ހިމެނެއެވެ. މީގެ އިތުރުން ބިލް ޑްރާފްޓްކުރުން އަދި ބިލްގެ އެންމެ ފަހު ވެލިޑޭޝަން ވޯކްޝޮޕް ކުރިއަށް ގެންގޮސްދިނުން ހިމެނެއެވެ.