2028 ވަނަ އަހަރު ޔޫރޯ ފުޓްބޯޅަ މުބާރާތަށް އިނގިރޭސިވިލާތުން ފައިނަލްކުރި ސްޓޭޑިއަމްތަކުގެ ތެރޭގައި މެންޗެސްޓާ ޔުނައިޓެޑްގެ ދަނޑު ނުހިމަނަން ނިންމައިފި އެވެ.
އިނގިރޭސިވިލާތުގެ އެންމެ ކާމިޔާބު އެއް ދަނޑު ކަމަށްވާ ޔުނައިޓެޑްގެ އޯލްޑްރެފޯޑްގެ ބަދަލުގައި ނަގާފައިވަނީ ވާދަވެރި މެންޗެސްޓާ ސިޓީގެ އިއްތިހާދު ސްޓޭޑިއަމެވެ.
އަޔަލޭންޑާއި އިނގިރޭސިންގެ ބިޑްގައި ޔުނައިޓެޑްގެ ދަނޑު ނުހިމަނަން ނިންމީ އެއަށްވުރެ ފެންވަރު ރަނގަޅު ދަނޑުތައް އިނގިރޭސިވިލާތުގައި ހުރުމުންނެވެ. މި ގޮތުން ސިޓީގެ އިއްތިހާދު ސްޓޭޑިއަމް ޒަމާނާ ގުޅިފައި ބޮޑު މުބާރާތެއް ބާއްވަން މާބޮޑަށް ވެސް އެކަށީގެންވާ ކަމަށް އިނިގިރޭސި ބިޑް އިވެލުއޭޝަން ކޮމިޓީން ވަނީ ނިންމާފަ އެވެ. މީގެ އިތުރުން ޔުނައިޓެޑްގެ ދަނޑަކީ ވަރަށް ބޮޑަށް މަރާމާތަށް ބޭނުންވެފައިވާ ދަނޑެއްގެ ގޮތުގައި ވަނީ ލިސްޓުކޮށްފަ އެވެ.
މި ކަމާ ގުޅިގެން ޔުނައިޓެޑުން ނެރުނު ބަޔާނުގައި ބުނެފައިވަނީ އޯލްޑް ޓްރެފޯޑް މަރާމާތުކުރުމަށް ޕްލޭން ކޮށްފައިވާތީވެ މި ފަހަރުގެ ބިޑްގައި ނުހިމެނުނީ ކަމަށާއި އިނގިރޭސިން ޔޫރޯ ބޭއްވުމަށް ހުށަހަޅާ ބިޑް ކާމިޔާބުވުމަށް އެދޭ ކަމަށެވެ.
