ޔޫރޯ ކޮލިފައިންގައި ސްކޮޓްލެންޑާ ދެކޮޅަށް ކުޅުނު މެޗުން ސްޕެއިން ބަލިވެއްޖެ އެވެ.

ސްކޮޓްލެންޑުގެ މައުންޓް ފްލޮރިޑާގައި ހުންނަ ހެމްޕްޑެން ޕާކުގައި ކުޅުނު މެޗުން ސްޕެއިން ބަލިވީ 2-0 އިންނެވެ. މެޗު ފަށައިގެން ސްޕެއިން ހަމައަކަށް ނޭޅެނީސް ސްކޮޓްލެންޑުން ވަނީ ލަނޑު ޖަހައި ލީޑު ނަގައިފަ އެވެ. ހަތް ވަނަ މިނެޓުގައި ސްކޮޓްލެންޑަށް ލީޑު ނަގައިދިނީ މެންޗެސްޓަރ ޔުނައިޓެޑަށް ވެސް ކުޅެމުން އަންނަ ސްކޮޓް މެކްޓޮމިނޭ އެވެ. އޭނާ އެ ލަނޑު ޖަހާފައި ވަނީ އެންޑްރޫ ރޮބަޓްސަން ތަނަވަސްކޮށްދިން ފުރުސަތެއްގަ އެވެ. އޭގެ ހަތް މިނެޓު ފަހުން ސްކޮޓްލެންޑުގެ ރަޔަން ކްރިސްޓީ އަށް ވެސް ވަނީ ލަނޑު ޖަހާނެ ތަނަވަސް ފުރުސަތެއް ލިބިފަ އެވެ. ނަމަވެސް ސްޕެއިންގެ އޭރިޔާ ތެރެއިން އޭނާ ފޮނުވާލި ބާރު ހަމަލާ ދިޔައީ ގޯލުގެ އަރިމަތީ ދަނޑު ކައިރިން ބޭރަށެވެ. ސްޕެއިން އަށް ނަތީޖާ ހަމަހަމަ ކުރުމަށް ކުރަމުން އައި މަސައްކަތުގެ ތެރެއިން ޖޮސެލޫ ބޮލުން ފޮނުވާލި ބޯޅަ އަމާޒުވީ ސްކޮޓްލެންޑުގެ ގޯލުގެ ހުރަސް ދަނޑިއާ އެވެ. މެޗުގައި ސްކޮޓްލެންޑުގެ ދެ ވަނަ ލަނޑު 51 ވަނަ މިނެޓުގައި ޖެހީ ވެސް މެކްޓޮމިނޭ އެވެ.

މިއީ ސްޕެއިންގެ އައު ކޯޗުގެ އިރުޝާދުގެ ދަށުން އެ ޓީމު ބަލިވި ފުރަތަމަ މެޗެވެ. މީގެ އިތުރުން މިއީ ދިގު ތާރީޚަކަށްފަހު ސްކޮޓްލެންޑަށް ސްޕެއިންގެ މައްޗަށް ކުރި ހޯދުނު ފުރަތަމަ ފަހަރެވެ. އެ މެޗުގެ ކުރިން އެންމެ ފަހުން ސްކޮޓްލެންޑުން ސްޕެއިން ބަލި ކުރީ 1984 ވަނަ އަހަރު އޮތް ފީފާ ވޯލްޑް ކަޕް ކޮލިފައިންގަ އެވެ.

ޔޫރޯ ކޮލިފައިންގައި ގްރޫޕް އޭ ގައި މިހާތަނަށް ކުޅުނު ދެ މެޗުން ވެސް މޮޅުވެ އެއް ވަނައިގައި ސްކޮޓްލެންޑު އޮތީ ހަ ޕޮއިންޓާއެކު އެވެ. ދެ ވަނައިގައި ސްޕެއިން އޮތީ ތިން ޕޮއިންޓާއެކު އެވެ.