މިހާރު ކުރިއަށްދާ ގޯލްޑަން ފުޓްސަލް ޗެލެންޖުގެ ޒޯން ތިނެއްގެ ޗެމްޕިއަންކަން ކ.ގާފަރުން ހޯދައިފި އެވެ.
ގާފަރުން ޗެމްޕިއަންކަން ހޯދީ ހޯމަ ދުވަހުގެ ރޭ ކުޅުނު ފައިނަލްގައި އއ.ބޮޑުފޮޅުދޫގެ މައްޗަށް 1-0 އިން ކުރި ހޯދައިގެންނެވެ. މެޗުގެ ހަތް ވަނަ މިނެޓުގައި ގާފަރުގެ ލަނޑު ޖަހަދިނީ ސާމިން މުޙައްމަދު ނަސީރު އެވެ. އެއީ ބޮޑުފޮޅުދުދޫގެ ގޯލު ކުރިމަތިން ލިބުނު ފުރުސަތަކުން ބާރު ބޯޅައެއް ގޯލުގެ މަތީ ދާގަނޑަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ޗެމްޕިއަން ގާފަރު ޓީމުގެ އަލީ މާއިސް އެވެ. މި ޒޯންގެ އެންމެ ގިނަ ލަނޑު ޖެހި ކުޅުންތެރިޔަަކަށް ގާފަރުގެ ނާއިހް މުފީދު ހޮވުނުއިރު، އެންމެ މޮޅު ކުޅުންތެރިޔަކީ އެ ޓީމުގެ މާއިސް އެވެ.
މުބާރާތުގެ ގަދަ 16 ވަނަ ބުރުގައި ގާފަރުން ނުކުންނާނީ ތިމަރަފުއްޓާ ދެކޮޅަށެވެ. ބޮޑުފޮޅުދޫ ބައްދަލު ކުރަން ޖެހޭނީ ޒޯން އަށެއްގެ ޗެމްޕިއަން ޓީމު މާފަންނާ އެވެ.
