ގޯލްޑަން ފުޓްސަލް ޗެލެންޖުގެ ޒޯން ފައިނަލް ބުރުގައި އދ.މާމިގިލި ބަލިކޮށް މ.ދިއްގަރުން ހަތަރު ވަނަ ޒޯންގެ ޗެމްޕިއަންކަން ހޯދައިފި އެވެ.

ހޯމަ ދުވަހުގެ ރޭ ކުޅުނު ފައިނަލް މެޗު ދިއްގަރުން ކާމިޔާބު ކުރީ ޕެނަލްޓީ ޖަަހައިގެންނެވެ. މެޗުގެ ފުރިހަމަ ވަގުތު ހަމަވީ ދެ ޓީމު 1-1 އިން އެއްވަރުވެގެންނެވެ. މެޗު ފަށައިގެން ފަސް ވަނަ މިނެޓުގައި ދިއްގަރުން ވަނީ ލަނޑު ޖަހައި ލީޑު ނަގައިފަ އެވެ. އެއީ ދިއްގަރުގެ އަލީ މާޖިދު ގޯލު ކުރިމައްޗަށް ހުރަސްކޮށްދިން ބޯޅައެއް ގޯލަށް ފޮނުވާލައިގެން ނޫހު މަސްއޫދު ކާމިޔާބުކޮށްދިން ލަނޑެކެވެ. މެޗުގައި މާމިގިއްޔަށް ނަތީޖާ ހަމަހަމަކޮށްދިނީ ރިޒްވާން އެވެ. އެއީ ކޯނަރެއްގައި އޭނާ ފޮނުވާލި ބޯޅަ ގޯލަށް ވައްދާލައިގެންނެވެ. މެޗުގެ ނަތީޖާ ނެރުމަށް ޖެހި ޕެނަލްޓީގައި ދިއްގަރުން ވަނީ ހަ ޕެނަލްޓީގެ ތެރެއިން ފަސް ޕެނަލްޓީ ކާމިޔާބުކޮށްފަ އެވެ. އެއީ ނޫހު، އަޙުމަދު މިދުހަތު މަހުމޫދު، ޙުސެއިން ފާރިޝް، އަލީ މާޖިދު އަދި ވިއާމްގެ ޕެނަލްޓީ އެވެ. މާމިގިއްޔަށް ކާމިޔާބު ކުރެވުނީ ހަ ޕެނަލްޓީގެ ތެރެއިން ހަތަރު ޕެނަލްޓީ އެވެ. އެއީ އަޙުމަދު ނިޒާމް، ހިސާމް ސަލީމް، އިސްމާއިލް ސައިފް އަދި އިބްރާހިމް މައިސާންގެ ޕެނަލްޓީ އެވެ.

ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ދިއްގަރުގެ މުޙައްމަދު އަލީ އެވެ. މި ޒޯންގެ އެންމެ ގިނަ ލަނޑު ޖެހި ކުޅުންތެރިޔަކަށް ހޮވުނީ މާމިގިލީގެ ހިސާމް ސަލީމް އެވެ. އަދި އެންމެ މޮޅު ކުޅުންތެރިޔަކަށް ހޮވުނީ ޗެމްޕިއަން ދިއްގަރުގެ މުޙައްމަދު އަލީ އެވެ.