އިނގިރޭސި ޕްރިމިއަރ ލީގުގަައި ފުލަމްއާ ދެކޮޅަށް ކުޅުނު މެޗުން ޗެލްސީ އެއްވަރުވެއްޖެ އެވެ.

މިއީ އާޖެންޓީނާގެ ޒުވާން އެންޒޯ ފެނާންޑޭޒް އެ ޓީމާ ގުޅުނު ފަހުން ޗެލްސީ ކުޅުނު ފުރަތަމަ މެޗެވެ. އެ މެޗުގައި އެންޒޯ ވަނީ ފުރަތަމަ 11ގައި ހިމެނިގެން ކުޅެން ނުކުމެފައެވެ. ނިމުނު ޓްރާންސްފަރ މާކެޓުގައި އެންމެ ބޮޑު ހޭދައެއް ކުރި ކުލަބަކީވެސް ޗެލްސީއެވެ. ޗެލްސީން ވަނީ ޖެނުއަރީ ޓްރާންސްފަރގައި ޖުމުލަ 8 ކުޅުންތެރިޔަކު ހޯދާފައެވެ. މެޗުގައި ޗެލްސީން ވަނީ ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ.

މެޗަށްފަހު ވާހަކަ ދައްކަމުން ޗެލްސީގެ ކޯޗު ގްރަހަމް ޕޮޓާ ބުނީ، ފުރަތަމަ މެޗުގައިވެސް އެންޒޯގެ ކޮލެޓީ ފެނުނު ކަމަށެވެ. އޭނާ ބުނީ އެންޒޯއާއެކު ޓީމަށް އައި ބަދަލުތައްވެސް ފެނުނު ކަމަށެވެ. މީގެ އިތުރުން ފުރަތަމަ މެޗަކީ އެންޒޯއަށް ވެސް އެންމެ ފަސޭހެ މެޗަށް ނުވާނެކަމަށާއި، ޚާއްސަކޮށް ޓީމާއެކު ގިނަ ވަގުތު ހޭދަކުރެވިފައި ނުވާތީ އެކަމުގެ އުނދަގޫވެސް ހުންނާނެ ކަމަށެވެ. ނަމަވެސް މެޗުގައި އެންޒޯ ދެއްކި ކުޅުމާމެދު ހިތްހަމަޖެހޭކަން ފާހަގަކޮށް ޕޮޓާ ބުނީ، ކުރިމަގުގައި އޭނާގެ ހުނަރު މާ ބޮޑަށް އަދި ފެންނާނެ ކަމަށެވެ. ޕޮޓާ ބުނީ މިހާރު ޗެލްސީން ވަރަށް ބައިވަރު ރަނގަޅު ކަންކަންވެސް ފެންނަމުން އަންނަ ކަމަށާއި، މުޅި ޓީމުގައި ވެސް އޮތީ ރަނގަޅު ރޫހެއް ކަމަށެވެ.

މެޗު އެއްވަރުވެ ލިބުނު ޕޮއިންޓާއެކު ޗެލްސީ ވަނީ ތާވަލްގެ ނުވަވަަނައަށް ޖެހިލާފައެވެ. އެ ޓީމު މިހާތަނަށް ކުޅުނު 21 މެޗުން ލިބެނީ 30 ޕޮއިންޓެވެ.