ފުޓްބޯޅަ ލެޖެންޑް ބްރެޒިލްގެ ޕެލޭއަށް އެގައުމުގެ އެތައްހާސް ސަޕޯޓަރުން އެންމެ ފަހުގެ އިހުތިރާމް އަދާކޮށްފިއެވެ.

ޑިސެމްބަރު 29 ވަނަ ދުވަހު މަރުވި ޕެލޭގެ ޖަނާޒާގެ އެކި އިވެންޓްތަކުގެ ތެރެއިން އެންމެ ފަހުގެ އިވެންޓަށްފަހު ހަށިގަނޑު ގެންދިޔައިރު އެގައުމުގެ އެތައްހާސް ރައްޔިތުން ވަނީ ޕެލޭއަށް އިހުތިރާމް އަދާކޮށްފައެވެ. ޕެލޭގެ ޖަނާޒާގެ ކަންކަން ކުރިއަށް ގެންދިޔައީ ރަސްމީ އިއްޒަތުގައެވެ. ޖަނާޒާގެ ރަސްމީ ބައި މިހާރު ވަނީ ނިމިފައެވެ. 82 އަހަރުގައި ޕެލޭ މަރުވީ ކެންސަރުގެ ބައްޔާ ހަނގުރާމަ ކުރަމުން ދަނިކޮށް, ހޮސްޕިޓަލްގައެވެ. ޕެލޭ މަރުވުމުން ބްރެޒިލްގެ ސަރުކާރުން ތިން ދުވަހު ރަސްމީކޮށް އެކަމުގެ ހިތާމަ ފާޅުކުރިއެވެ. ޕެލޭގެ ޖަނާޒާގެ ކަންކަން ކުރިއަށްދިޔައިރު ބްރެޒިލްގެ އައު ރައީސްވެސް ޕެލޭއަށް އެންމެ ފަހުގެ އިހުތިރާމް އަދާކުރިއެވެ. ޢާއްމުނަން ޚާއްޞަކޮށް ޕެލޭގެ ހަށިގަނޑު ބާއްވާފައި އޮތްއިރު 24 ގަޑިއިރުގެ ތެރޭގައި 230,000 އަށްވުރެ ގިނަ މީހުން އެންމެ ފަހުގެ އިހުތިރާމް އަދާކުރަން ޒިޔާރަތްކުރިކަމަށް ރިޕޯޓުތައް ބުނެއެވެ.

ޕެލޭ އަކީ ފީފާ ވަރލްޑް ކަޕް ތިންފަހަރު ކާމިޔާބުކުރި ހަމައެކަނި ކުޅުންތެރިޔާއެވެ. އަދި ދުނިޔޭގައި އުފެދުނު އެންމެ މޮޅު އެއް ކުޅުންތެރިޔާއެވެ. ފުޓްބޯޅައިގެ ގިނަ ރެކޯޑްތަކެއް ހެދިއެވެ. ޕެލޭގެ ފުޓްބޯޅައިގެ ޚިދުމަތުގެ އަގު ވަޒަންކުރުމުގެ ގޮތުން ފީފާއިން ނިންމާފައިވަނީ ކޮންމެ ގައުމެއްގައިވެސް ޕެލޭގެ ނަމަށް އެއް ސްޓޭޑިއަމް ޚާއްޞަކުރަން އެދުމަށެވެ.