ނޮވެމްބަރު މަހު 76 މީހަކު ޖަލަށް ލާފައިވާއިރު، 41 މީހަކު ޖަލުން ދޫކޮށްލާފައިވާކަމަށް މޯލްޑިވްސް ކަރެކްޝަނަލް ސަރވިސް އިން ބުނެފިއެވެ.

ކަރެކްޝަންސްއިން އާންމުކޮށްފައިވާ ތަފާސްހިސާބުތަކަށް ބަލާއިރު، ނޮވެމްބަރު މަހު 76 މީހަކު ޖަލަށް ލާފައިވެއެވެ. އެއީ ޙުކުމްކޮށްގެން ލާފައިވާ 58 މީހަކާއި، ޝަރީއަތް ނިމެންދެން ބަންދުކޮށްފައިވާ 18 މީހެކެވެ.

އޭގެ ތެރެއިން އެންމެ ގިނައީ މަސްތުވާތަކެއްޗާ ގުޅުންހުރި މައްސަލަތަކުގައި ބަންދު ކޮށްފައިވާ މީހުންނެވެ. އެގޮތުން މަސްތުވާތަކެއްޗާ ގުޅުންހުރި ކުށްތަކުގައި 62 އިންސައްތަ މީހުން ޖަލަށް ލާފައިވާއިރު، ފޭރުމުގެ ކުށްތަކުގައި 13 އިންސައްތަ ހިއްސާ ކުރެއެވެ.

އަދި ހުއްދަނެތި ތަންތަނަށް ވަނުމާއި ގުޅޭ 10 އިންސައްތަ މައްސަލައިގެ އިތުރުން، ބިރުދެއްކުމާއި، ހުއްދަ ނޫން ގޮތުގައި މީހުންގެ މުދާ ހިފެހެއްޓުމާއި، ކުޑަކުދިންނަށް ޖިންސީ ގޯނާ ކުރުމާއި، މަކަރާ ހީލަތުގެ މައްސަލަތަކުގައިވެސް މި މުއްދަތުގެ ތެރޭގައި މީހުން ޖަލަށް ލާފައިވެއެވެ.

މި މުއްދަތުގެ ތެރޭގައި 41 މީހަކު ޖަލުން ދޫކޮށްލާފައިވާއިރު، އޭގެ ތެރޭގައި ހިމެނެނީ ޙުކުމުގައި ތިބި 26 މީހަކާއި، ޝަރީއަތް ނިމެންދެން ބަންދުކޮށްފައި ތިބި 15 މީހެކެވެ.

ޙުކުމުގައި ތިބި މީހުންގެ ތެރެއިން 19 މީހަކު ދޫކޮށްލާފައިވަނީ އެމީހުންގެ ޙުކުމް ތަންފީޒުކޮށް ނިމުމުންނެވެ. އެކަކު ޕެރޯލްގެ ދަށުން ދޫކޮށްލާފައިވާއިރު، އެކަކު ދޫކޮށްލާފައިވަނީ ޙުކުމް ބާތިލުކުރުމާއި ގުޅިގެންނެވެ.

އަދި 5 މީހަކު ދޫކޮށްލާފައިވަނީ ކްލެމެންސީގެ ދަށުންނެވެ.

ނޮވެމްބަރު މަހުގެ ތެރޭގައި މާފުށީ ޖަލުން 6 މޯބައިލް ފޯނާއި، 24 ސިމްކާޑާއި، 3 ޗާޖަރުގެ އިތުރުން، 3 ހެޑްސެޓާއި މި ނޫންވެސް އައިޓަމްތައް ހޯދާފައިވެއެވެ.

އަދި އައްސޭރި ޖަލުންވެސް، 6 މޯބައިލް ފޯނާއި 1 ސިމް ކާޑު ވަނީ ހޯދާފައެވެ.

ޖަލުތަކުގައި ގައިދީންނާ މެދު އަމަލު ކުރާނެ ގޮތުގެ އެންމެ ދަށް މިންގަނޑުތައް ކަނޑައަޅާފައިވާ ދި ޔުނައިޓެޑް ނެޝަނަލް ސްޓޭންޑަޑް މިނިމަމް ރޫލްސް ފޯރ ދި ޓްރީޓްމަންޓު އޮފް ޕްރިޒަންސް، ދި ނެލްސަން މަންޑޭލާ ރޫލްސްއަށް ޖަލު އޮފިސަރުންވެސް ގެންދަނީ ތަމްރީނު ކުރަމުންނެވެ.