އޮލިމްޕަހުގައި އެކި ހަރަކާތްތައް ބާއްވަން އެދޭ ފަރާތްތަކަށް އެތަން ކުއްޔަށް ދިނުމަށް ހުޅުވާލައިފިއެވެ.
ނޭޝަނަލް ސެންޓަރ ފޮރ ދި އާޓްސްއިން ބުނީ އޮލިމްޕަސް ކުއްޔަށް ހިފަން އެދޭ ފަރާތްތަކަށް އެޑްވާންސް ބުކިންއަށް ހުޅުވާލާފައިވާކަމަށެވެ.
ނޭޝަނަލް ސެންޓަރ ފޮރ ދި އާޓްސްއިން ބުނީ 15 ޖެނުއަރީން ފެށިގެން ޕްރެކްޓިސް ރޫމްތަކާއި، އޮލިމްޕަސް ހޯމު ބުކް ކުރެވޭނެ ކަމަށެވެ.
އޮލިމްޕަސް އަލުން ބުކް ކުރަން ހުޅުވާލާއިރު، ކޮވިޑްގެ ހާލަތާއި ގުޅިގެން 2020 ވަނަ އަހަރު އޮލިމްޕަސް ބަންދު ކުރިއިރު ފިލްމު ދެއްކުމަށް އެތަން ބުކްކޮށް، އެޑްވާންސް ދައްކާފައިވާ ފަރާތްތަކަށް އިސްކަންދެވޭނެ ކަމަށް އެ އިދާރާއިން ބުނެފައިވެއެވެ.
އޮލިމްޕަސް ޒަމާނީ ފެންވަރަށް ތަރައްގީކުރުމަށް ކުރަމުންދާ މަސައްކަތް ނިންމައި މިއަހަރު ނިމުމުގެ ކުރިން އެތަން ހުޅުވުމަށް ދަނީ މަސައްކަތްކުރަމުންނެވެ.
އޮލިމްޕަސް އިމާރާތުގެ އާބާތުރަ ފިލުވައި، ވަސީލަތްތައް ތަރައްގީކުރުމުގެ މަސައްކަތުގެ ދެވަނަ ފިޔަވަހީގެ މަސައްކަތް ފަށާފައިވަނީ މިއަހަރުގެ މާރޗް 8 ވަނަ ދުވަހުއެވެ.
އެންސީއޭ އިން ބުނީ އޮލިމްޕަސް އިމާރާތުގެ ބޭރު ފާރުތަކާއި، ހުޅަނގު ފަރާތު ކޮރިޑޯގެ ފާރުތައް މަރާމާތުކޮށް ކުލަލުމުގެ މަސައްކަތް ނިމިފައިވާކަމަށެވެ. އަދި އޮލިމްޕަހުގެ ހުޅަނގު ފަރާތުގައި ކުރިން ބޭނުންކުރި އޭޓީއެމް ހުރިބައި އޮލިމްޕަހުގެ ކެންޓީނެއްގެ ގޮތުގައި ބޭނުންކުރުމަށް އެތެރޭގެ ފާރުތަކަށް ގެންނަންޖެހޭ ބަދަލުތައް ގެނެސް ތަރައްގީކުރަމުންދާކަމަށެވެ.
