ދޭދަރު ރުއިން ފިލްމްގެ ޕްރިމިއަރ ޝޯއަށް ނަގާފައިވާ އޮލިމްޕަސް ހޯލު ނޭޝަނަލް ސެންޓަރ ފޯ ދި އާޓްސް (އެން.ސީ.އޭ)އިން އަތުލާފައިވާ ކަމަށް ދޭދަރު ރުއިން ފިލްމުގެ ޕްރޮޑަކްޝަން ޓީމުން ބުނެފިއެވެ.
ކަޒްމިކް އިންޓަނޭޝަނަލް އަދި އައި ފިލްމްސްއިން ނެރުނު ބަޔާނެއްގައި ބުނެފައިވަނީ ދޭދަރު ރުއިން ފިލްމް ޕްރިމިއަރ ޝޯ ބޭއްވުމަށް ހަމަޖެހިފައިވާ އޮލިމްޕަސް ސިނާމާ ހޯލު އެންސީއޭއިން ކުއްލިއަކަށް އަތުލައިފައިވާ ކަމަށާއި، މިއީ ދިވެހި ފިލްމީ ސިނާއަތަށް ވެވުނު ވަރަށް ބޮޑު ބޭއިންސާފެއް ކަމަށެވެ.
20 ނޮވެންބަރު 2024 ގައި އޮލިމްޕަސް ސިނަމާގައި ޕްރިމިއަރ ކުރުމަށް ހަމަޖެހިފައިވާ ދޭދަރު ރުއިން ފިލްމުގެ ޕްރިމިއަރއަށް ވާންޖެހޭ ހުރިހާ ތައްޔާރީތަކެއް ވެ ހޯލުގެ ބޮޑުބައި ފުރިފައި ވަނިކޮށް، ކުއްޔަށް ހިފާފައިވާ ތާރީހުތަކުން 20 ނޮވެންބަރު އުނިކުރި ކަމަށް ސަރުކާރު ބަންދު ދުވަހެއް ކަމަށްވާ 10 ނޮވެންބަރު ވީ އާދިއްތަ ދުވަހު މެންދުރު އެންސީއޭ އިން ވަނީ އީމެއިލް ކޮށްފައިވާ ކަމަށް ބަޔާނުގައި ބުނެފައިވެއެވެ.
ބަޔާނުގައި ބުނީ ފިލްމު އެޅުވުމަށް ނެގުނު ތާރީހުތަކަކީ 1 އަހަރު ކުރިން ބުކްކޮށް 4 މަސް ކުރިން ފައިސާ ދައްކާފައިވާ ތާރީހުތަކެއް ކަމަށާއި، އެންސީއޭ އިން މިބަދަލު ގެނެސްފައިވަނީ އެއްވެސް މަޝްވަރާއެއް ނުވަތަ އިޝާރާތެއް ވެސް ނުދީ ކަމަށެވެ. ސަރުކާރުގެ ބޭނުމަށްކަމަށް ބުނެ ދުވަސް އަތުލާފައިވަނީ ކުރިން 17، 18، އަދި 19 ގައި އޮންނަ ކަމަށް އިއުލާންކޮށްފައިވާ އޮލިމްޕިއަންސް ޝޯ 18، 19، އަދި 20އަށް ބަދަލު ކުރުމަށެވެ.
މީގެ އިތުރުން ބަޔާނުގައި ބުނީ ފިލްމެއް ތައްޔާރުކޮށް ޕްރިމިއަރ ތާރީހު އިއުލާންކޮށް ހުރިހާ ޕޯސްޓަރު އަދި ބިލްބޯޑުތައް ޕްރިންޓްކޮށް ޕްރިމިއަރ ޝޯއަށް ދައުވަތުތައް ފޮނުވާ ޓިކެޓް ވިއްކަމުންދަނިކޮށް މިގޮތަށް ކުއްލިއަކަށް އެންގުމުން ފިލްމު އުފެއްދި ފަރާތައް ލިބޭނެ ގެއްލުމުގެ އަންދާޒާ އެންމެ ރަނގަޅަށް ކުރެވޭނީ ފަންނާނުންގެ ބަލަދުވެރި އެންސީއޭ އަށް ކަމަށް އުންމީދު ކުރެވުނު ނަމަވެސް އެންސީއޭ ގެ މިއަމަލުން އެކަން ދޮގުވެފައިވާ ކަމަށެވެ.
މިކަން މަޝްވަރާކުރުމުގެ ބޭނުމުގައި އެންސީއޭއަށް ދިޔަކަން ފާހަގަކޮށް ބަޔާނުގައި ބުނީ ބަންދު ދުވަސްތަކެއް ކަމުން އެތަނުން އެއްވެސް މުވައްޒަފަކާ ދިމާނުވި ކަމަށެވެ. އަދި މިނިސްޓަރު އޮފް ޔޫތް އެންޕަވަރމަންޓް އިންފޮމޭޝަން އެންޑް އާޓްސް އިބްރާހިމް ވަހީދު (އަސްވާޑު)އަށް ގުޅާ ނުތަނަވަސްކަން ހާމަ ކުރުކުރުމުން ޑެޕިއުޓީ މިނިސްޓަރަށް ގުޅުމަށް ވިދާޅުވި ކަމަށް ބަޔާނުގައި ބުނެފައިވެއެވެ. ނަމަވެސް ޑެޕިއުޓީ މިނިސްޓަރަށް ގުޅައިގެން ވެސް މިކަމުގެ ޒިންމާ އެއްވެސް ފަރާތަކުން ނުނެގި ކަމަށް ބުނެފައިވެއެވެ.
ބަޔާނުގައި ބުނީ ކުރިން ހަމަޖެހިފައިވާ ގޮތަށް ނޮވެންބަރު 20 ގައި ޕްރިމިއަރ ބޭއްވުމަށް ކުރެވެން އޮތް ހުރިހާ މަސައްކަތެއް ކުރަމުންދާ ކަމަށާއި، މިދަތި ހާލަތުގައި ވެސް ބެލުންތެރިންނަށް ފިލްމު ދެއްކުމަށް ކުރެވެން އޮތް ހުރިހާ މަސައްކަތެއް ކުރާނެ ކަަމަށެވެ.
މިކަމުގައި ދިވެހި ސަރުކާރުގެ ކަމާބެހޭ އިދާރާތަކުން އަވަސް ހައްލެއް ހޯދައިދިނުމަށާއި، ދިވެހި ފިލްމީ ސިނާއަތުގެ ކުރިމަގަށްޓަކައި މިފަދަ ކަންކަން ތަކުރާރުވިޔަ ނުދިނުމަށް ފިޔަވަޅުތައް އެޅުމަށް ދޭދަރު ރުއިން ފިލްމުގެ ޕްރޮޑަކްޝަން ޓީމުން ވަނީ ގޮވާލާފައެވެ. އަދި މިކަން ހަރުކަށި އިބާރާތުން ވަނީ ކުށްވެރިކޮށްފައެވެ.
