އަންނަ އަހަރުގެ ދިރާސީ އައު އަހަރު ފެށޭއިރު ރާއްޖޭގެ ކޮންމެ ސްކޫލެއްގައި ތަމްރީނު ލިބިފައިވާ ޕްރިންސިޕަލުން ތިބޭނެ ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
"ރާއްޖެޓީވީ" ގެ ފަލަސުރުޚީ ޕްރޮގްރާމުގައި ވާހަކަދައްކަވަމުން މިނިސްޓަރު ޑރ. އައިޝަތު އަލީ ވިދާޅުވީ މި ސަރުކާރުން ތައުލީމީ ދާއިރާގައި މަސައްކަތް ކުރާ ފަރާތްތައް ކުރިއަރުވަން ގިނަ މަސައްކަތްތަކެއް ކޮށްފައިވާ ކަމަށެވެ. އެގޮތުން، އެންމެ މުހިންމު އެއް ކަމަކީ ޓީޗަރުންނާއި ތައުލީމީ ދާއިރާގެ އެހެނިހެން ފަރާތްތަކުގެ މުސާރައިގެ ކުރިއެރުން ހޯދައިދިނުން ކަމަށާއި އެއީ ދާއިރާގައި ތިބި ރަނގަޅު މުވައްޒަފުން ދާއިރާގައި ބޭތިއްބުމަށް ކުރެވުނު މުހިންމު ކަމެއް ކަމަށް މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވީ މިހާތަނަށް ޓީޗަރުންނާއި ޕްރިންސިޕަލުންނާއި ތައުލީމީ ދާއިރާގެ އެހެނިހެން ޕްރޮފެޝަނަލުން ހިމެނޭހެން 8،889 މީހަކަށް މުސާރައިގެ ކުރިއެރުން ލިބިފައިވާކަމަށެވެ. އަދި ތައުލީމީ ދާއިރާގައި މަސައްކަތް ކުރާ އިދާރީ މުވައްޒަފުންގެ އަސާސީ މުސާރައިގެ 35 އިންސައްތަ ބޮޑުކޮށްފައިވާ ކަމަށެވެ.
ތައުލީމީ ދާއިރާގެ ފަރާތްތައް ބާރުވެރިކުރުވަން ކުރަމުން އަންނަ މަސައްކަތްތަކުގެ ތެރޭގައި ރާއްޖެއާއި ރާއްޖޭން ބޭރުން ތަމްރީންތައް ދިނުމާއި ޕްރިންސިޕަލުން ނެތް ރަށްރަށަށް ޕްރިންސިޕަލުން ހޯދުމަށް ޚާއްސަ ސްކޮލަރޝިޕް ސްކީމެއް ވެސް ތައާރަފު ކުރެވުނު ކަމަށް މިނިސްޓަރު ވިދާޅުވިއެވެ. މި ސްކީމުގެ ދަށުން 18 މީހަކު މިހާރު މެލޭޝިއާގައި ކިޔަވަމުން އަންނައިރު އަންނަ އަހަރުގެ ދިރާސީ އައު އަހަރު ފެށޭއިރު ހުރިހާ ސްކޫލެއްގައި ތަމްރީނު ލިބިފައިވާ ޕްރިންސިޕަލުން ތިބޭނެ ކަމަށް ވެސް މިނިސްޓަރު ވިދާޅުވިއެވެ.
ޕްރިންސިޕަލުން ނެތް ރަށްތަކެއް އެބަހުރި ރާއްޖޭގައި. އެހެންވެ މި ތަންތަނަށް ޕްރިންސިޕަލުން ލުމަށްޓަކައި ޕްރިންސިޕަލުންގެ ސްކޮލަރޝިޕް ސްކީމެއް އަޅުގަނޑުމެން ތައާރަފުކޮށްފައި، އެ ސްކީމުގެ ދަށުން މިހާރު 18 ބޭފުޅަކު އެދަނީ މެލޭޝިއާގައި ތަމްރީނު ވަމުން. ކޯސް ނިންމާފައި އެ ބޭފުޅުން ވަޑައިގަންނަވާނެ އަންނަ އަހަރުގެ އޭޕްރިލް ގައި.އެޑިއުކޭޝަން މިނިސްޓަރު ޑރ. އައިޝަތު އަލީ
ތައުލީމީ ދާއިރާ ފެންވަރު ރަނގަޅުވާނީ ފެންވަރު ރަނގަޅު ޓީޗަރުން ތަމްރީނުވެގެންކަން ފާހަގަކުރައްވައި މިނިސްޓަރު ވިދާޅުވީ މި ސަރުކާރުން އެކަމަށް ވަރަށް ބޮޑު އިސްކަމެއް ދެމުން އަންނަ ކަމަށެވެ. އަދި މި ސަރުކާރުގެ އަމާޒަކީ އުމްރާނީ ތަރައްގީ އެކަނި ނޫން ކަމަށާއި ސްކޫލްތަކުގެ ނަތީޖާ ރަނގަޅު ކުރުމަކީ ވެސް މި ސަރުކާރުން އިސްކަމެއް ދޭ ކަމެއް ކަމުގައި މިނިސްޓަރު ފާހަގަކުރެއްވިއެވެ.
އެޑިއުކޭޝަން މިނިސްޓްރީން 80 ސްކޫލަކާ އެކު ފެށި "ސްކޫލް ވެހި" ޕްރޮގްރާމުގެ ދަށުން މިހާތަނަށް ޓީޗަރުންނަށް ތަމްރީނު ދީ، ދަރިވަރުންގެ ނަތީޖާ ވަރަށް ބޮޑުތަނުން ރަނގަޅުކުރެވިފައިވާ ކަމަށް ވެސް މިނިސްޓަރު ވިދާޅުވިއެވެ.
