ގަތަރުގައި އޮންނަ ފީފާ ވޯލްޑް ކަޕްގައި ސެކިއުރިޓީ ބެލެހެއްޓުމަށް ބައި ލައްކަ މީހުން ތަމްރީނުކޮށްފިކަމަށް ގަތަރުގެ ސަރުކާރުން ބުނެފިއެވެ.

ގަތަރުގެ ސަރުކާރުން ބުނީ މި މީހުން ތަމްރީނު ކޮށްފައިވާނީ ފީފާއާއި ބައިނަލްއަގްވާމީ ގޮތުން ބަލާ ސެކިއުރިޓީގެ މިންގަނޑުތަކާ އެއްގޮތަށްކަމަށެވެ. މި ސެކިއުރިޓީ ފޯހަށް ކޮމާންޑްކުރާނީ ގަތަރުގެ ސިފައިންނެވެ.

ގަތަރަކީ އަސްކަރީގޮތުން އަރަފޯދިފައިވާ ގައުމަކަށް ނުވާތީ އެގައުމުން އަންނަނީ މުބާރާތުގެ ސަލާމަތީ ކަންކަން ބެލެހެއްޓުމަށް، އަވައްޓެރި އަދި އެކުވެރި ގައުމުތަކުގެ އެހީ ހޯދަމުންނެވެ. އެގޮތުން ޕާކިސްތާން، ތުރުކީ އަދި އިޓަލީގެ އެހީތެރިކަން ގަތަރުން ހޯދާފައިވެއެވެ.

މުބާރާތުގެ ސަލާމަތީ ކަންކަން ބެލެހެއްޓުމަށް ތުރުކީގެ 3000 ރަޔަޓް ފުލުހުންގެ އިތުރުން، 100 ސްޕެޝިއަލް އޮޕަރޭޝަންސް ފުލުހުންނާއި، 50 ބޮމްބް ސްކޮޑް ފުލުހުންނާއި 80 ޑޯގް ސްކޮޑްގެ ފުލުހުން މިހާރު ވަނީ ގަތަރަށް ދަތުރުކޮށްފައެވެ. މީގެ އިތުރުންވެސް ތުރުކީން ވަނީ އިތުރު 2000 ރަޔަޓް ފުލުހުން ގަތަރަށް ފޮނުވާފައެވެ.

މިފަހަރުގެ ވޯލްޑް ކަޕް އޮންނާނީ ގަތަރުގައެވެ. މުބާރާތް ކުރިއަށްދާނީ ނޮވެމްބަރު 20ން ޑިސެމްބަރު 18ގެ ނިޔަލަށެވެ.