ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ހައުސް އިން ކަރަންޓު ކަނޑާލީ އިހުލާސްތެރި ނިޔަތެއް ނެތިގެންނޫން ކަމަށާއި ބިލުތައް ދައްކައި ޚަލާސް ކުރުމުން އަނބުރާ ކަރަންޓު ފޯރުކޮށްދޭނެ ކަމަށް ސްޓެލްކޯގެ މެނޭޖިންގ ޑިރެކްޓަރު އަހުމަދު ޝަރީފު ވިދާޅުވެއްޖެއެވެ.

ހޯމަ ދުވަހު ސްޓެލްކޯގައި އެކި ރަށްރަށުގެ ކައުންސިލްތަކާއެކު އެމްއޯޔޫތަކެއްގައި ސޮއި ކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ޝަރީފު ވިދާޅުވީ ސްޓެލްކޯއިން ތަނަކުން ކަރަންޓުގެ ޚިދުމަތް ކަނޑާލަނީ އިހުލާސްތެރި ނިޔަތެއް ނެތިގެން ނޫން ކަމަށާއި ބޭނުންވަނީ އެ ޚިދުމަތުން ނަގާ ފީކަމަށެވެ.

ޝަރީފު ވިދާޅުވީ ރައްޔިތުންނަށް ފޯރުކޮށްދޭ ކަރަންޓުގެ ޚިދުމަތް ރަނގަޅު ކުރުމަށް ސްޓެލްކޯއިން އިންވެސްޓް ކުރަނީ ޚިދުމަތުން ނަގާ ފީގެ މައްޗަށް ބިނާކޮށް ކަމަށާއި އެ ފައިސާ ނުދައްކާނަމަ އެކަމަށް ބުރުއަރާނެ ކަމަށެވެ.

އެފްއޭއެމުން ކަރަންޓު ކަނޑާލުމާ ގުޅިގެން އެއީ އިހުލާސްތެރި ނިޔަތެއްގައި ކުރި ކަމެއް ނޫންކަމަށް ބުނެ އެ އެސޯސިއޭޝަނުން ނެރުނު ބަޔާނަށް ރައްދު ދެއްވައި ޝަރީފު ވިދާޅުވީ އެގޮތަށް ނުބުނެވޭނެ ކަމަށެވެ. އަދި 6.5 މިލިއަން ރުފިޔާ އެރިއިރު އެ ފައިސާ ނުދައްކާ ތިބީ ކޮން ނިޔަތެއް އޮވެންގެންތޯ ސުވާލު އުފައްދަވައި ކަރަންޓު ބިލުތައް ދެއްކުމުން ކަރަންޓު ފޯރުކޮށްދޭނެ ކަމަށް އޭނާ ވިދާޅުވިއެވެ.

އެފްއޭއެމް އިން 2019 ވަނަ އަހަރުގެ ސެޕްޓެމްބަރު މަހުން ފެށިގެން މި އަހަރުގެ ސެޕްޓެމްބަރު މަހުގެ ނިޔަލަށް އެއްވެސް ކަރަންޓް ބިލެއްގެ ފައިސާ ނުދައްކާ ކަމަށް ސްޓެލްކޯ އިން ވަނީ ބުނެފައެވެ. އެ ކުންފުނިން ސްޓެލްކޯއަށް ދައްކަން ޖެހޭ ފައިސާގެ އަދަދު 6.5 މިލިއަން ރުފިޔާއަށް އަރާފައިވާއިރު އެފްއޭމް ހައުސް އިން ވަނީ ކަރަންޓު ކަނޑާލައިފައެވެ. އަދި ފައިސާ ނުދައްކާނަމަ އެ އެސޯސިއޭޝަންގެ އެހެނިހެން ތަންތަނުންވެސް ކަރަންޓު ކަނޑާލަން ސްޓެލްކޯއިން ވަނީ ނިންމާފައެވެ.

އެފްއޭމް ހައުސް އިން ކަރަންޓުގެ ހިދުމަތް މެދުކަނޑައިލަން ޖެހުނީ، އެ އެސޯސިއޭޝަނުން ސްޓެލްކޯ އަށް ދައްކަންޖެހޭ ފައިސާ ދެއްކުމަށް ގިނަ ފުރުސަތުތަކެއް ދިނުމުން ވެސް އެކަން ކޮށްފައި ނުވާތީ ކަމަށްވެސް އެ ކުންފުނިން ވަނީ ބުނެފައެވެ.