މީދޫގެ ގޮނޑުދޮށް ހިމާޔަތްކުރުމުގެ މަސައްކަތަކީ އިމަރޖެންސީކޮށް ކުރި މުހިންމު މަސައްކަތެއް ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

އާޒިމް ވިދާޅުވީ މިއީ މީދޫ އަށް ވަރަށް ބޮޑަށް ބޭނުން ވެފައި އޮތް މަޝްރޫޢު އެއް ކަމަށާއި މީގެ ކުރިން އެ ސަރަހައްދަށް ލޮނުގެ އަސަރު ކުރުމުގެ ސަބަބުން އާއްމުންނަށް ވަރަށް ބޮޑަށް އުނދަނގޫވި ކަމަށް އާޒިމް ވިދާޅުވިއެވެ. ރާޅު އަރާ މީދޫގެ ބައެއް ގިރުމުގެ ސަބަބުން ދަނޑުބިންތަކާއި މީދޫގެ ކުޅި އަށް އެކަމުގެ ނޭދެވޭ އަސަރު ވަރަށް ބޮޑަށް ކުރިކަން އާޒިމް ފާހަގަކުރެއްވިއެވެ. ކުރިން އެ މަގުން ދުއްވާލަން ވެސް ނުދެވޭ ކަމަށާއި މިހާރު އެ ސަރަހައްދު ވަށައިގެން ދުއްވާލެވޭ ގޮތަށް މަގު ވެސް ހެދިފައިވާ ކަމަށް އޭނާ ވިދާޅުވިއެވެ. 2 ފޭސް އަކަށް ބަހާލައިގެން ކުރިއަށް ދިޔަ މަސައްކަތް ނިންމާލީ ގާތްގަނޑަކަށް 6 މަސް ދުވަހުގެ ތެރޭގައި ކަމަށް ވެސް އާޒިމް ވިދާޅުވިއެވެ.

މީދޫ ގޮނޑުދޮށް ހިމާޔަތް ކުރުމުގެ މަޝްރޫއުގެ ދަށުން 1,848 އަކަ މީޓަރުގެ ސަރަހައްދެއްގައި ބިންގަނޑު އެއްވަރު ކުރުމާއި ބެޑް ތައްޔާރު ކުރުމާއި 210 މީޓަރުގެ ސަރަހައްދެއްގައި ޖިއޯބޭގް ރިވެޓްމަންޓު ޖެހުމުގެ މަސައްކަތް ވަނީކޮށްފައެވެ. ޕްލޭނިން މިނިސްޓްރީގެ ފަރާތުން މި މަސައްކަތް އެމްޓީސީސީއާ ހަވާލުކުރީ 5.80 މިލިއަން ރުފިޔާއަށެވެ. އަދި މަޝްރޫއުގެ އަމަލީ މަސައްކަތް ފެށީ 2012 ވަނަ އަހަރުގެ މާޗު މަހުގެ 25 ވަނަ ދުވަހުއެވެ.