6 މޭ 2021 ދުވަހުގެ ރޭ ރައީސް މުޙައްމަދު ނަޝީދަށް އަމާޒުކޮށްދިން ހަމަލާއާއި ގުޅިގެން ހިންގި ތަހުގީގުތަކަށްފަހު، ޓެރަރިޒަމާއި ގުޅޭ ދައުވާތަކެއް އުފުލާފައިވާ ހއ. މޮޅަދޫ، ބަހާރުގެ، ޢަބްދުﷲ ޢަލީމަނިކާއި، ހއ.ހޯރަފުށި، އަލަނާސިގެ، މުޙައްމަދު ތަސްލީމްގެ މައްޗަށް ކުރާ ދައުވާގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި މިހާރު ކުރިއަށްދަނީ ދައުލަތުގެ ހެކިންގެ ހެކިބަސް ނެގުމުގެ މަރުޙަލާއެވެ. އެގޮތުން އަޑުބަދަލުކޮށްގެން، ހެކިވެރިންނަކީ ކޮން ބައެއްކަން ނޭނގޭ ގޮތަށް 2 ސިއްރު ހެއްކެއްގެ ހެކިބަސް ވަނީ ނަގާފައެވެ.

މި އަޑުއެހުމުގައި ފުރަތަމަ ހާޒިރުކުރި ސިއްރު ހެކިވެރިޔާ ބުނާ ގޮތުގައި އޭނާ ވަނީ އަބްދުﷲ އަލީމަނިކު ހިންގި ތައުހީދު ކްލާސްތަކެއްގައި ބައިވެރިވެފައެވެ. އެ ކްލާހުގައި ދީނީ ގޮތުން ހަރުކަށި ފިކުރު ޕްރޮމޯޓް ކުރާކަމަށް އޭނާ ބުނެއެވެ. އެގޮތުން މިއީ ކުފުރުގެ ބިމެއް ކަމާއި، ހަނގުރާމަކޮށްގެން ޖިހާދުކުރުން ފަރުޟު ޙާލަތު އައިސްފައިވާކަމަށް ކްލާހުގައި ކިޔާދޭކަމަށް ހެކިވެރިޔާ ބުނެއެވެ.

އޭގެ އިތުރުން، ހަރުކަށި ފިކުރުގެ ދެ ބައެއްގެ ދެމެދުގައި ހިނގި ޚުސޫމާތެއްގައި އަބްދުﷲ އަލީމަނިކު ގާޒީއެއްގެ ދައުރު އަދާކޮށް، މައްސަލަ ބަލާފައިވާކަމަށްވެސް އެ ހެކިވެރިޔާ ބުންޏެވެ.

އޭނާ ބުނާ ގޮތުގައި މި މައްސަލައިގައި ދައުވާލިބޭ ތަސްލީމަކީ އޭނާއާ ބައްދަލުވުމެއްގެ ތެރެއިން ދިމާވި މީހެކެވެ. ތަސްލީމަކީ ސޯޝަލް މީޑިއާ މެދުވެރިކޮށް ހަރުކަށި ފިކުރު ފުޅާދާއިރާއެއްގައި ޕްރޮމޯޓު ކުރަމުންދިޔަ މީހެއް ކަމަށާއި، ދައުލަތުގެ ވެރިންގެ ލޭ ހުއްދަވާނެކަމަށް ތަސްލީމު ބުނެފައިވާކަމަށް އެ ހެކިވެރިޔާ ހެކިބަސް ދީފައިވެއެވެ.

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އިތުރުން، ކުރީގެ ރައީސް މައުމޫނު އަބްދުލް ޤައްޔޫމާއި، ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ ލޭ ހުއްދަވާނެކަމަށް ތަސްލީމު ބުނިކަމަށްވެސް ހެކިވެރިޔާ ވަނީ ހެކިބަސް ދީފައެވެ.

ހެކިވެރިޔާ ބުނާ ގޮތުގައި އިސްލާމިކް ސްޓޭޓް ޖަމާއަތަކީ ސައްޙަ ޚިލާފަތެއްކަން މީހުންނަށް ވިސްނައިދިނުމަށް ތަސްލީމް ގިނަ މަސައްކަތްތަކެއް ކޮށްފައިވެއެވެ.

ދެވަނަ ސިއްރު ހެކިވެރިޔާއަކީ ތަސްލީމާ ދެކޮޅަށް ހުށައެޅިފައިވާ ހެއްކެކެވެ. އޭނާ މައިގަނޑު ގޮތެއްގައި ބުނެފައިވަނީ އޭނާ ގާތުގައި ތަސްލީމު އައިސިސް ޖަމާއަތަށް ތާއީދުކޮށް، އެ ފިކުރު ޕްރޮމޯޓުވާ ގޮތަށް ވާހަކަތައް ދައްކާފައިވާ ކަމަށެވެ. އޭނާއަކީ އެ ފިކުރު ފަތުރާ މީހެއްކަމަށް ހެކިވެރިޔާއަށް ޤަބޫލު ކުރެވޭކަމަށާއި، އެގޮތަށް ޤަބޫލު ކުރެވެނީ ހެކިވެރިޔާ ގާތުގައިވެސް އެފަދަ ވާހަކަތައް ދައްކާފައިވާތީކަމަށް ދިފާއުން ކުރި ސުވާލުތަކުގެ ޖަވާބުގައި ހެކިވެރިޔާ ބުންޏެވެ.

މި މައްސަލައިގައި އަދިވެސް ދައުލަތުގެ އިތުރު ހެކިންގެ ހެކިބަސް ނެގުން ކުރިއަށް އެބައޮތެވެ. ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ އާދަމްއެވެ.