މިފްކޯގެ މަސް ފިހާރައެއް ފޭސް2ގައި ހުޅުވައިފިއެވެ.

ބުރާސްފަތި ދުވަހުގެ ރޭ އެކަމަށްޓަކައި ބޭއްވި ރަސްމިއްޔާތު ކުރިއަށްދިޔައީ ބޮޑުބެރާއި ފުޑް ޓޭސްޓިންގގެ ހަރަކާތަކާއެކުގައެވެ. އެ ފިހާރަ ހުޅުއްވައިދެއްވުމަށްފަހު މީޑިއާތަކަށް މައުލޫމާތުދެއްވަމުން އެސްޓީއޯގެ މެނޭޖިންގ ޑިރެކްޓަރ ހުސައިން އަމްރު ވިދާޅުވީ، މިފްކޯގެ މަސް ފިހާރައެއް ހުޅުވީ ފަސޭހަކަމާއެކު މިފްކޯގެ އުފެއްދުންތައް ރައްޔިތުންނަށް ފޯރުކޮށްދިނުމުގެ އުންމީދުގައިކަމަށެވެ. އަމްރު ވަނީ މިފްކޯއިން އަބަދުވެސް ރައްޔިތުންނާ ގާތުން މަސައްކަތްކޮށް، އާއްމުން އެދޭފަދަ ޚިދުމަތެއް ފޯރުކޮށްދިނުމަށް މަސައްކަތްކުރަމުންދާކަން ފާހަގަކުރައްވާފައެވެ. އަދި ކުރިއަށް އޮތްތަނުގައި، ފޭސް2ގައި މިފްކޯގެ ޚިދުމަތް ފުޅާކުރުމަށް ރަނގަޅު ޖާގައެއް ހޯދުމަށް އެޗްޑިސީއާއެކު މަޝްވަރާކުރަމުންދާކަން އޭނާ ފާހަގަކުރެއްވިއެވެ. މިފްކޯގެ ސީއީއޯ އިސްމާއީލް ފައުޒީ ވިދާޅުވީ، ފޭސް2ގައި 32000ށްވުރެ ގިނަ މީހުން ދިރިއުޅެމުންދާއިރު، މިފްކޯއަށް ކަސްޓަމަރުންގެ ފަރާތުން ލިބޭ އެއްބާރުލުން ރަނގަޅުކަމަށެވެ. އަދި ކުރިއަށް އޮތްތަނުގައި އިތުރު ޕްރޮޑަކްޓްތައް މާކެޓަށް ނެރުމުގެ މަސައްކަތް ކުރަމުންދާކަން އޭނާ ވަނީ ފާހަގަކުރައްވާފައެވެ.

އެ ފިހާރައިން މަސްދަޅުގެ 8 ޕްރޮޑަކްޓާއި، ތައްޔާރީކާނާގެ 6 ޕްރޮޑަކްޓުގެ އިތުރުން، ވަޅޯމަސްފަދަ، މަހުގެ އިތުރު އުފެއްދުންތައް ލިބެން ހުންނާނެކަަމަށް މިފްކޯއިން ބުނެއެވެ. މިފްކޯއަކީ އެސްޓީއޯގެ ސަބްސިޑަރީ ކުންފުންޏެކެވެ.