އަންނަ އަހަރު އޮންނަ އިންޑިއަން އައިލެންޑް އޯޝަން އައިލެންޑް ގޭމްސް (އައިއޯއައިޖީ) ގައި ދިވެހި އެތުލެޓީކުން 21 މެޑަލް ހޯދާނެ ކަމަށް އަޙުމަދު މަރުޒޫގް (މަރޭ) ބުނެފިއެވެ.

މަރޭ ވަނީ ކުރިން މޯލްޑިވްސް އޮލިމްޕިކް ކޮމެޓީ (އެމްއޯސީ) ގެ ޖެނަރަލް ސެކްޓްރީކަމުގެ މަގާމު ވެސް އަދާކޮށްފައެވެ. ކުޅިވަރަށް ޚިދުމަތް ކުރުމުގައި ދެމި ހުރި މަރޭ މީގެ ކުރިން ވެސް ވަނީ އައިއޯއައިޖީގައި ދިވެހި އެތުލީޓުން މެޑަލް ހޯދާނެ އަަދަދު ދިމާ ކޮށްފައެވެ. އެގޮތުން 2015 ވަނަ އަހަރުގެ ގޭމްސްގެ ކުރިން މަރޭ ވަނީ ދިވެހި އެތުލީޓުން އެ ގޭމްސްގައި ނުވަ މެޑަލް ހޯދާނެ ކަމަށް ބުނެފައެވެ. އެ އަހަރު ދިވެހި އެތުލީޓުން ހޯދާފައިވަނީ ނުވަ މެޑަލްއެވެ. އޭގެ ފަހުން 2019 ވަނަ އަހަރުގެ ގޭމްސްގެ ކުރިން މަރޭ ވަނީ އެ އަހަރު ލިބޭނީ 15 މެޑަލް ކަމަށް ބުނެފައެވެ. އެއަހަރު ވެސް އެ ހިސާބު ވަނީ ދިމާވެފައެވެ.

މަރޭ އޭނާގެ ފޭސްބުކް އެކައުންޓުގައި ކުރި ޕޯސްޓެއްގައި ބުނީ، ފާއިތުވި ދެ ދުވަހުގެ ތެރޭގައި އެތައް ފަރާތްތަކުން އޭނާއަށް ގުޅައި، ކުރިއަށް އޮތް ގޭމްސްގައި ދިވެހި އެތުލީޓުންނަށް ކިތައް މެޑަލް ހޯދޭނެތޯ އަހައި ސުވާލު ކުރި ކަމަށެވެ. މަރޭ ބުނީ ކުރިއަށް ގޭމްސް އޮތް އިރު، މިހާރު ދިވެހި އެތުލީޓުންގެ ފެންވަރު އެނގޭކަމަށެވެ.

ފާއިތުވި 18 މަސް ދުވަހު އެތުލީޓުންގެ ޕާފޯމަންސްއަށް ބަލާއިރު، ކުރިއަށް އޮތް ގޭމްސްގައި 21 މެޑަލް ލިބޭނެ ކަމަށް މަރޭ ބުނެފައިވެއެވެ. ތަކުރާރުކޮށް މަރޭ ވަނީ އެ އަދަދު ބުނެފައެވެ. މީގެ އިތުރުން މަރޭ ބުނީ 21 މެޑަލް ހޯދުން ބިނާވެގެންދާނީ އެކަމަށް ޕްލޭން ކުރެވޭ ގޮތަކާއި، ތައްޔާރުވެވޭ ގޮތެއްގެ މައްޗަށް ކަމަށެވެ. އިތުރަށް މަރޭ ބުނީ މެޑަލަށް ޓާގެޓު ކުރާ އެތުލީޓުންނަށް ކުރިއަށް އޮތް 10 މަސް ދުވަހަަށް ޕްލޭންއެއް އޮންނަން ޖެހޭނެ ކަމަށެވެ. އަދި ނޮވެމްބަރު މަހުގެ ފުރަތަމަ ހަފްތާގެ ކުރިން މެޑަލަށް ޓާގެޓު ކުރަ އެތުލީޓުންނަށް ބޭރު ޤައުމުތަކުން ތަމްރީނު ދިނުމަށް އެދޭ ކަމަށް މަރޭ ވަނީ ބުނެފައެވެ. މަރޭ ވަނީ ދިވެހި އެތުލީޓުން ޤައުމު ފަޚުރުވެރިކޮށްދޭނެ ކަމަށް ވެސް ބުނެފައެވެ.

މީގެ އިތުރުން މަރޭ ވަނީ އެމްއޯސީ އާއި ޤައުމީ އެސޯސިއޭޝަންތަކުން ސަރުކާރާއި ގުޅިގެން އެ ޓާގެޓަށް މަސައްކަތް ކުރާނެ ކަމަށް އުންމީދު ކުރާ ކަމަށް ބުނެފައެވެ.

އަންނަ އަހަރުގެ އައިއޯއައިޖީ ކުރިއަށް ދާނީ މަޑަގަސްކަރުގައެވެ. އަންނަ އަހަރުގެ ގޭމްސް ބޭއްވުމުގެ ފުރުސަތު އެންމެ ފުރަތަމަ ލިބުނީ ރާއްޖެއަށެވެ. ނަމަވެސް ކޮވިޑާ ގުޅިގެން ރާއްޖޭގެ އިޤްތިސާދަށް އައި ހީނަރުކަމުގެ ތެރެއިން ރާއްޖޭގައި ގޭމްސް ބޭއްވޭ ގޮތް ވަނީ ނުވެފައެވެ. 2019 ވަނަ އަހަރު ރާއްޖެއިން ގޭމްސް ބޭއްވުމަށް ބިޑު ކާމިޔާބުކުރިއިރު، ޚާރިޖީ ވަޒީރު ޢަބްދުﷲ ޝާހިދު އާއި ކުޅިވަރު ވަޒީރު އަޙުމަދު މަޚްލޫފާއެކު އެންމެ އިސް ދައުރެއް އަދާ ކުރި އެއް ފަރާތަކީ މަރޭއެވެ.