އެމްއެމްޕީއާރުސީގެ ބޮޑު ވައްކަމުގެ މުގުލުގައި ހުންނެވި މޭސްތިރިއަކީ ކުރީގެ ރައީސް ޔާމީންކަމަށް، ކުރިންވެސް ގިނަ ބަޔަކު ބުނަމުންދިޔައިރު، ޔާމީންގެ މައްޗަށް ދައުވާ އުފުލާފައިވާ، ވ. އާރަށުގެ ޚިޔާނާތާއި މަނީލޯންޑަރިންގ މައްސަލައިގައި މިހާތަނަށް ހެކިބަސްދިން ފަރާތްތަކުގެ ހެކިބަހުން، އެމްއެމްޕީއާރުސީގެ ބޮޑު ވައްކަން ޔާމީން އަޑީގައި ހުންނަވައިގެން ހިންގެވިގޮތުގެ ތަފްސީލުތައް ދަނީ ހާމަވަމުންނެވެ. 

ދިވެހިރާއްޖޭގެ ތާރީޚުގައި މިހާތަނަށް ހިންގާފައިވާ އެންމެ ބޮޑު އެއް ޚިޔާނާތުގެ މައްސަލަކަމަށްވާ އެމްއެމްޕީއާރުސީގެ ބޮޑު ޚިޔާނާތުގެ މުގުލުގައި ހުންނެވީ ރައީސް ޔާމީންކަމަށް، އެމަނިކުފާނުގެ ކުރީގެ އެންމެ ގާތް އެކުވެރިޔާކަމަށްވާ ރައްޔިތުންގެ މަޖިލީހުގެ ކުރީގެ ނައިބު ރައީސް އަހުމަދު ނާޒިމް، ޝަރީއަތުގެ މަޖިލީހުގައި ހެކިބަސްދެއްވާފައިވެއެވެ. އަދި އެމްއެމްޕީއާރްސީން ވަގަށްނެގިކަމަށް ތުހުމަތުކުރެވޭ އެތައް މިލިއަން ރުފިޔާއެއް ރައީސް ޔާމީނަށް ނަގުދު ފައިސާއިން ލިބިފައިވާކަމަށް، ދައުލަތުގެ ފަރާތުން ޝަރީއަތްތަކުގައި ދައްކާފައިވާ ވާހަކަތަކުން ހާމަވެފައިވާއިރު، އެ ފައިސާ ރައީސް ޔާމީން ދިރިއުޅުއްވި ގެއަށް ގެންގޮސްދިންކަމަށް، މީގެ ކުރިން ހެކިބަސްދިން މުހައްމަދު ހުސައިން (އޮއިއްޓޭ) ވެސް ޝަރީއަތުގައި ވަނީ ހެކިބަސްދީފައެވެ. އެ ގޮތުން އަދީބު ވިދާޅުވެގެން 1 މިލިއަން ރުފިޔާ، ޔާމީން ދިރިއުޅުއްވި ދޫވެއްސަށް ގެންގޮސްދީފައިވާކަމަށް އޭނާ ވަނީ ބުނެފައެވެ.  

އެމްއެމްޕީއާރުސީ މެދުވެރިކޮށް ވައްކަންކުރަން ފެށުނީ، އެމްއެމްޕީއާރުސީއާއި މޯލްޑިވްސް ޕޯޓްސް ލިމިޓެޑް(އެމްޕީއެލް) ހެދި އެއްބަސްވުމެއްގެ ދަށުން ޑޮލަރު ގަތުމަށްކަމަށް ބުނެ، 5 މިލިއަން ޑޮލަރަށް ވާ ދިވެހި ރުފިޔާ އެމްޕީއެލްއިން ނެންގެވިހިސާބުންކަމަށް، ޔާމީނާއެކު އެންމެ ގާތްކޮށް އެދުވަސްވަރު އުޅުއްވި، މަޖިލީހުގެ ކުރީގެ ނައިބު ރައީސް އަހުމަދު ނާޒިމް ޝަރީއަތުގެ މަޖިލީހުގައި ވިދާޅުވެފައިވެއެވެ. އެ ފައިސާ އަދީބު ނެންގެވިކަން އެނގިވަޑައިގަތުމުން ޔާމީނާ ބައްދަލުކުރައްވައި އެ ވާހަކަ ދެންނެވިނަމަވެސް އެއްވެސް ފިޔަވަޅެއް އަޅުއްވާފައިނުވާކަމާއި، އެއީ ޔާމީންގެ ބެއްލެވުމުގެ ދަށުން ޔާމީނަށް އެނގިވަޑައިގެން ކުރެއްވިކަމެއްކަމަށާއި، އެދުވަހު އެމްޕީއެލްއިން ނެގި ފައިސާ ގޮސް ޖަމާވި އެކައުންޓްތަކުގެ ތަފްސީލުތައް ޔާމީނަށް ދެންނެވުމުންވެސް ފިޔަވަޅެއް އަޅުއްވާފައިނުވާކަމަށް ވިދާޅުވެފައިވެއެވެ. 

އެމްޕީއެލްއިން ނެންނގެވި 5 މިލިއަން ޑޮލަރުގެ ތެރެއިން 2.5 މިލިއަން ޑޮލަރު ޖަމާވީ ރިޔާސީ އިންތިޚާބުގައި ޔާމީނަށް ފައިސާ އެހީ އެރުވި ވިޔަފާރިއެއްގެ އެކައުންޓަށްކަން، ދައުލަތުން ކޯޓަށް ހުށަހެޅި ކިތާބީ ހެކިތަކުންވެސް އެނގޭކަމަށްވެއެވެ. އެމްޕީއެލްއިން ފައިސާ ނެންގެވީ، ޔާމީނަށް އިންތިޚާބުގައި ވިޔަފާރިވެރިން އެރުވި ފައިސާ އަނބުރާ ރައްދުކުރައްވަންކަމަށް އެނގިވަޑައިގަތްކަމަށް ނާޒިމް ހެކިބަސްދެއްވަމުން ފާހަގަކުރެއްވުމުން، މިކަމަށް އިތުރު ބާރެއް ލިބިގެންދެއެވެ.

ނާޒިމް ފާހަގަކުރައްވާފައިވާގޮތުން، އެމްއެމްޕީއާރުސީގެ ފައިސާ ޔާމީން ބޭނުންކުރެއްވީ 2013ގެ ރިޔާސީ އިންތިޚާބުގެ ދަރަނި ދެއްކެވުމަށެވެ.

ވިޔަފާރިވެރިންގެ އަތުން އަދީބު ފައިސާ ނަންގަވާ ވާހަކަ ޔާމީނަށް ދެންނެވުމުން، ފައިސާ ނަންގަވަނީ ޔާމީން އެދިވަޑައިގެންކަމަށް ޔާމީން ވިދާޅުވިކަމަށާއި، އަދި ފައިސާ ނަންގަވަނީ އަދީބު ފޮނުއްވައިގެން ކަމަށްވެސް ޔާމީން ވިދާޅުވިކަމަށް ނާޒިމް ޝަރީއަތުގައި ވިދާޅުވެފައިވެއެވެ. 2013ގެ ރިޔާސީ އިންތިޚާބަށް ޔާމީން ދަރަންޏަށް ފައިސާ ނަންގަވާފައިވަނީ ބޮޑެތި ވިޔަފާރިވެރިންގެ އަތުން ކަމަށް ނާޒިމް ވިދާޅުވިއެވެ. އެ ފައިސާ ހޯދުމަގައާއި، ރައީސް ޔާމީން އޭރު ދިރިއުޅުއްވި މއ. ދޫވެއްސަށް ފައިސާ ގެނައުމުގައި އިސްކޮށް އުޅުއްވީ ކުރީގެ ނައިބު ރައީސް އަހުމަދު އަދީބުކަމަށް ނާޒިމް ވިދާޅުވެފައިވާއިރު، ކަޅުކުލައިގެ ދަބަހަކަށް އަޅާފައި މއ. ދޫވެއްސަށް އަދީބު 15 މިލިއަން ރުފިޔާ ފޮނުއްވިކަމަށް ނާޒިމް ހެކިބަސް ދެއްވަމުން ބުނެފައިވެއެވެ.

އެމްއެމްޕީއާރުސީން ރަށްތައް ކުއްޔަށް ދޫކޮށްގެން ލިބޭ ފައިސާ ޖަމާކުރަން ޖެހެނީ ދައުލަތުގެ މާލިއްޔަތަށް ކަމަށް ވިޔަސް، އެޓަރނީ ޖެނެރަލްގެ ލަފައެއް ހޯދައިގެން އެފަދަ ފައިސާތައް އެމްއެމްޕީއާރުސީގެ އެކައުންޓަށް ޖަމާކުރެވޭ ގޮތަށް ހަމަޖެއްސެވީ ޔާމީންކަމަށާއި، އެއީ އޭރު ސަރުކާރުގައި ތިއްބެވި އިސްވެރިން ގުޅިވަޑައިގެން ހިންގެވި ބޮޑު ވައްކަމެއްކަމަށް، ނާޒިމް ހެކިބަސްދެއްވަމުން ޝަރީއަތުގައި ފާހަގަކުރައްވާފައިވެއެވެ. 

އެމްއެމްޕީއާރްސީ ކޮރަޕްޝަން ހިންގެވީ، ޔާމީންގެ ރިޔާސީ އިންތިޚާބު ކެމްޕޭނަށް ކުރެއްވި ޚަރަދުގެ ދަރަނި ދެއްކެވުމަށް ރާއްވަވައިގެންކަމަށް ނާޒިމް ވިދާޅުވެފައިވާއިރު، އޭގެތެރެއިން ގިނަ އަދަދެއްގެ ފައިސާ، ޔާމީނާ ގުޅުންހުރި އެކި ފަރާތްތަކަށްވެސް ލިބިފައިވާކަމަށް ތުހުމަތުކޮށް ތަހުގީގީ އިދާރާތަކުން މިހާރުވެސް ދަނީ ތަހުގީގުކުރަމުންނެވެ. 

އެމްއެމްޕީއާރުސީގެ ބޮޑު ޚިޔާނާތުގެ މޭސްތިރިއަކީ ޔާމީން ކަމަށާއި، އެ ޚިޔާނާތް ހިންގާކަން ޔާމީނަށް އެނގިވަޑައިގެންކަމަށް، ހެކިބަސްދިން ފަރާތްތަކުގެ ބަހުން އެނގޭއިރު، ގއ. ވޮޑުމުލާ ކުއްޔަށް ދީގެން އެމްއެމްޕީއާރްސީއަށް ލިބުނުކަމަށް ބުނާ އެއް މިލިއަން ޑޮލަރަށްވެސް ޔާމީން ހިޔާނަތްތެރިވެވަޑައިގެން މަނީލޯންޑަރކުރެއްވިކަމަށް، މީގެ ކުރިން ކްރިމިނަލް ކޯޓާއި ހައިކޯޓުން ހުކުމް ކޮށްފައިވެއެވެ.  

ޔާމީންގެ މައްޗަށް ދައުލަތުން ވަނީ މަނީ ލޯންޑަރިންގގެ އިތުރު ދައުވާއަކާއި ރިޝްވަތު ގަބޫލުކުރުމުގެ އިތުރު ދައުވާއެއް، އެމްއެމްޕީއާރްސީ މެދުވެރިކޮށް ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެންވެސް ކޮށްފައެވެ. މިހާތަނަށް ތަހުގީގު ފުރިހަމަކޮށް، ދައުވާކުރި 3 ރަށުގެ މައްސަލާގައިވެސް ފާހަގަކުރެވޭ ކަމަކީ، ކޮންމެ ރަށެއް ކުއްޔަށް ދިނުމުގެ މުއާމަލާތުގެ ތެރެއިންވެސް ޔާމީނަށް 1 މިލިއަން ޑޮލަރު ރިޝްވަތުގެ ގޮތުގައި ލިބިވަޑައިގެންފައިވާކަމަށް ތުހުމަތުކޮށް ދައުވާކޮށްފައިވާކަމެވެ.