އޭކޭއައިއެލްއެފް ޔޫތު ޗެމްޕިއަންޝިޕްގެ ސެމީ ފައިނަލްގައި ވިލުފުށީގެ މައްޗަށް ބޮޑު ތަފާތަކުން ކުރި ހޯދައި ފައިނަލްގެ ފަހު ޖާގަ ތިމަރަފުށިން ހޯދައިފިއެވެ.
ކުޅުނު ދެ މެޗުން މޮޅުވެ ސީދާ ފައިނަލްގެ ޖާގަ ލިބުނީ އެންމެ ފަހުގެ ޗެމްޕިއަން ހިރިލަންދޫއަށެވެ. ދެ ވަނަ ލިބުނު ތިމަރަފުއްޓާއި، ތިން ވަނަ ލިބުނު ވިލުފުށި ކުޅުނު ސެމީ މެޗު ތިމަރަފުށިން ކާމިޔާބުކުރީ 6-0 ންނެވެ.
މެޗު ފަށައިގެން ހަ ވަނަ މިނެޓުގައި ތިމަރަފުށީގެ ފުރަތަމަ ލަނޑު ޖެހީ އަޙުނަފް އަޙުމަދެވެ. އޭގެ ދެ މިނެޓު ފަހުން އޭނާ ވަނީ އިތުރު ލަނޑެއް ޖަހައި ތިމަރަފުއްޓަށް ލީޑު ފުޅާކޮށްދީފައެވެ. އޭގެ ފަހުން 13 ވަނަ މިނެޓުގައި ތިމަރަފުއްޓަށް ލީޑު އިތުރަށް ފުޅާވީ، ވިލުފުށީގެ އާދަމް މާނިއު ބައިކޮޅަށް ޖެހި ލަނޑަކުންނެވެ. އޭގެ ދެ މިނެޓު ފަހުން އަޙުމަދު ހައިލަމް ވަނީ ތިމަރަފުށީގެ ހަތަރު ވަނަ ލަނޑު ޖަހާފައެވެ. މެޗުގެ 26 ވަނަ މިނެޓުގައި އަޙުނަފް ވަނީ ތިމަރަފުށީގެ ފަސް ވަނަ ލަނޑު ޖަހައި، އޭނާގެ ހެޓްރިކް ހަމަކޮށްފައެވެ. ތިމަރަފުށީގެ ހަ ވަނަ ލަނޑު އެ ޓީމުން ޖެހީ ދެ ވަނަ ހާފުގައެވެ. އެއީ 67 ވަނަ މިނެޓުގައި އަނޫސް އަޙުމަދު ޖެހި ލަނޑެކެވެ.
މެޗުގެ މޮޅު ކުޅުންތެރިޔަކަށް ހޮވުނީ ތިމަރަފުށީގެ ތިން ލަނޑު ޖެހި އަޙުނަފް އެވެ. މުބާރާތުގެ ފައިނަލްގައި ހުކުރު ދުވަހުގެ ހަވީރު ތިމަރަފުށި ނުކުންނާނީ އެންމެ ފަހުގެ ޗެމްޕިއަން ހިރިލަންދޫއާ ދެކޮޅަށެވެ.
މި މުބާރާތަކީ ރައިސިން ސްޓަރސް ފޯރ ވިލުފުށި ރެކްރިއޭޝަން (އާރުއެސްވީއާރު)ގެ ފަރާތުން އިންތިޒާމުކޮށްގެން، ތ. އަތޮޅަށް ހުޅުވާލައިގެން ކުރިއަށްދާ މުބާރާތެކެވެ. މިއީ އާރުއެސްވީއާރުގެ ފަރާތުން 2021 ވަނަ އަހަރު ބާއްވަންފެށި މުބާރާތެވެ. އެއަހަރު މުބާރާތް ކާމިޔާބުކުރީ ހިިރިލަންދޫއިންނެވެ.
