ފިތުރު އީދު ދުވަހުން ފެށިގެން މާލެއާއި ހުޅުމާލޭގައި ހިންގި މާރާމާރީތަކުގައި 12 މީހަކު ހައްޔަރުކޮށްފިއެވެ.

މޯލްޑިވްސް ޕޮލިސް ސަރވިސްއިން ބުނި ގޮތުގައި އެ 12 މީހުންނަކީ ތިން މާރާމާރީއަކާ ގުޅިގެން ހައްޔަރު ކުރި މީހުންނެވެ. މީގެ ތެރޭގައި 18 އަހަރު ނުވާ ތިން ކުޑަކުދިން ހިމެނެއެވެ.

މެއި މަހުގެ ދެވަނަ ދުވަހު މާލޭގައި ދެ މާރާމާރީއެއް ހިންގާފައިވާއިރު އޭގެ ތެރެއިން ޖަނަވަރީ މަގުގައި ހިންގި މާރާމާރީއާ ގުޅިގެން ދެ މީހަކު ހައްޔަރު ކުރިއެވެ. އެއީ 18 އަހަރުގެ ދިވެހި ފިރިހެނަކާއި 15 އަހަރުގެ ކުޑަކުއްޖެކެވެ. 18 އަހަރުގެ މީހާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން ވަނީ ތަޙުޤީޤު ނިމެންދެން ބަންދުގައި ބެހެއްޓުމަށް އަމުރުކޮށްފައެވެ. އަދި ކުޑަކުއްޖާގެ ބަންދަށް ވަނީ ހަތް ދުވަހުގެ މުއްދަތެއް ދީފައެވެ.

އެ މައްސަލައިގައި އިތުރު ހަތް މީހަކު ހޯދަން ފުލުހުން ވަނީ އިއުލާންކޮށްފައެވެ.

މިމައްސަލައާ ގުޅިގެން ހޯދަމުންދާ ފަރާތްތައް:

ކ. މާލެ/ ދަފްތަރު ނަންބަރު ރސ2260، މަޢުޞޫމް މުޙައްމަދުދީދީ (27އ)

ތ. ތިމަރަފުށި/ ސީނުގެ، އަޙްމަދު ޝިމްޙާޒު (22އ)

ކ. މާލެ/ މ. ލޮނުމިދިލިގެ، ލޫޠު އަޙްމަދު އާސިފް (18އ)

ގއ. މާމެންދޫ/ ގްލޭނޫރަންމާގެ، އަޙްމަދު ރަބީޢު (24އ)

ގއ. ގެމަނަފުށި/ ކެނެރީގެ، އަޙްމަދު ނާޒިހު (27އ)

ސ. ހުޅުދޫ/ ނާދީ، މުނާދު ޖަޢުފަރު (20އ)

ސ. މަރަދޫ/ ކޮރަލް، އަޙްމަދު ސާތިޢު (21އ)

ހުޅުމާލޭގައި ހިންގި މާރާމާރީއާ ގުޅިގެން ހަ މީހަކު ވަނީ ހައްޔަރުކޮށްފައެވެ. އެ ހަ މީހުންގެ ތެރެއިން ހަތަރު މީހަކަށް 15 ދުވަހުގެ ބަންދުގެ މުއްދަތެއް ދީފައިވާއިރު އެކަކަށް ވަނީ 10 ދުވަހުގެ ބަންދުގެ މުއްދަތެއް ދީފައެވެ. އެ މާރާމާރީއާ ގުޅިގެން ހައްޔަރު ކުރި މީހުންގެ ތެރޭގައި ހިމެނޭ ކުޑަކުއްޖާއަށް ވަނީ ތިން ދުވަހުގެ ބަންދުގެ މުއްދަތެއް ދީފައެވެ.

މީގެ އިތުރުން ސޯސަންމަގުގައި ހުންނަ ސިޓީބޭކަރީ ކައިރީގައި ތޫނު ހަތިޔާރާއެކު މާރާމާރީ ހިންގަން އުޅުނު ބަޔަކު ވެސް ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އޭގެ ތެރޭގައި 22 އަހަރުގެ ފިރިހެނަކާއި 21 އަހަރުގެ ފިރިހެނަކާއި 18 އަހަރުގެ ދެ ފިރިހެނުން ހިމެނެއެވެ. މީގެ ތެރެއިން 22 އަހަރުގެ މީހާއަށާއި 18 އަހަރުގެ މީހަކަށް 15 ދުވަހުގެ ބަންދުގެ މުއްދަތެއް ދީފައިވާއިރު 21 އަހަރުގެ މީހައަށާއި 18 އަހަރުގެ ދެވަނަ މީހާއަށް ވަނީ 10 ދުވަހުގެ ބަންދުގެ މުއްދަތެއް ދީފައެވެ.

މި މާރާމާރީތައް ތަޙުޤީޤު ކުރަމުން އަންނަ ކަމަށް ފުލުހުން ބުނެއެވެ.