އަންހެންކުދިންނަށް ތައުލީމާއި، ރަނގަޅު ވަޒީފާއާއި އާމްދަނީ ހޯދުމަށްޓަކައި ތަފާތު މަސައްކަތް ކުރުމަށް ރައްކާތެރިކަމާއެކު މައުލޫމާތު ހޯދައި ލިބިގަތުމުގެ ފުރުސަތު ކުޑަކަމަށް މިނިސްޓަރ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތު ޝައުނާ ވިދާޅުވެއްޖެއެވެ.

މިނިސްޓަރު މިފަދައިން ވިދާޅުވީ ގާރލްސް އިން އަސީޓީ ދުވަހާއި ގުޅިގެން ދެއްވި މެސެޖްގައެވެ. މިނިސްޓަރުގެ މެސެޖުގައި ވިދާޅުވީ ގިނަ ދުވަސްތަކެއް ވަންދެން ގިނަ ބަޔަކަށް ގަބޫލު ކުރެވިފައި އޮތީ އަންހެން ކުދިންނަކީ ވަކިބާވަތެއްގެ މަސަތްކަތްތަކެއް ނޫނީ ނުކުރެވޭނެ ބައެއްގެ ގޮތުގައި ކަމަށެވެ. ނަމަވެސް މިހާރު އެކަން މި އޮތީ ބަދަލުވެފައި ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ބައިނަލްއަގުވާމީ ގޮތުން އަންހެން ކުދިންނަށް ޚާއްސަކޮށްގެން "އިންޓަރނޭޝަނަލް ގާލްސް އިން އައިސީޓީ ޑޭ" ގެ ގޮތުގައި މިދުވަސް ކަނޑައެޅުމުގެ ބޭނުމަކީ ޓެކްނޯލޮޖީގެ ދާއިރާއިން ދުނިޔޭގެ އެކިއެކި ކަންކޮޅުތަކުގައި ކުރެވޭ ތަފާތު މަސައްކަތްތަކުގައި އަންހެން ކުދިންގެ ބައިވެރިވުން އިތުރުކޮށް، ފުރުސަތު ފަހިކޮށްދިނުން ކަމަށެވެ. އަދި ހާއްސަކޮށް މި އަހަރުގެ ޝިއާރުގެ ދަށުން އަންހެން ކުދިންނަށް ރައްކާތެރިކަމާއެކު މިދާއިރާއިން ކުރިއަށް ދިއުމަށް ބޭނުންވާ އެހީތެރިކަން ހޯދައިދިނުން ކަމަށެވެ.

މިނިސްޓަރު ޝައުނާގެ މެސެޖްގައި ވަނީ މުޖުތަމައުގައި އޮތް ދުވަސްވީ އާދަކާދައާއި ގަބޫލުކުރުންތައް ބަދަލުކޮށް ހުރިހާ އެންމެން އެކުގައި އައިސީޓީ ދާއިރާއިން އަންހެން ކުދިންނަށް ހުރި ގޮންޖެހުންތައް ނައްތާލައި ފިރިހެންކުދިންނެކޭ އެއްފަދައިން މި ދާއިރާއިން އަންހެން ކުދިންނަށް ހަމަހަމަ ފުރުސަތު ހޯދައިދީ ބައިވެރިވުން އިތުރުކުރުމަށް މަސައްކަތް ކުރުމަށް އެދިވަޑައިގެންފައެވެ. އަދި ސަލާމަތްތެރިކަމާ ރައްކާތެރިކަމާއެކު ހިދުމަތް ހޯދައި ލިބިގަތުމުގައި ޓެކްނޯލޮޖީގެ ބޭނުން ހިފުމަށް ވަނީ އެދިވަޑައިގެންފައެވެ.

މިނިސްޓަރު ޝައުނާ ވިދާޅުވީ "އިންޓަރނޭޝަނަލް ޓެލެކޮމިއުނިކޭޝަން ޔޫނިއަން" ގެ ދިރާސާތަކުން ދައްކާ ގޮތުގައި މުޅި ދުނިޔޭގަ އިންޓަނެޓް ބޭނުންކުރުމުގައި އަންހެނުންނާއި ފިރިހެނުންގެ ދެމެދު 17 އިންސައްތައިގެ ތަފާތެއް އެބަހުރި ކަމަށެވެ. އަދި މިތަފާތު ކުޑަކޮށް ތަރައްގީވެފައިވާ މުޖުތަމައުތަކުގައި މިއަށްވުރެވެސް ބޮޑު ކަމަށާއި، މި ހިސާބުތަކުން ދައްކުވައިދެނީ އަންހެން ކުދިންނަށް އައިސީޓީ ދާއިރާއިން ރައްކާތެރިކާމާއެކު މައުލޫމާތު ހޯދައި ލިބިގަތުމުގައި ގޮންޖެހުންތަކެއް އެބަހުރިކަން ކަމަށެވެ. މިކަމުން އެނގެނީ އަންހެންކުދިންނަށް ތައުލީމާއި، ރަނގަޅު ވަޒީފާއާ އާމްދަނީ ހޯދުމަށްޓަކައި ތަފާތު މަސައްކަތް ކުރުމަށް ރައްކާތެރިކަމާއެކު މައުލޫމާތު ހޯދައި ލިބިގަތުމުގެ ފުރުސަތު ކުޑަކަން ކަމަށް ދުވަހާއި ގުޅިގެން މިނިސްޓަރު ޝައުނާ ދެއްވި މެސެޖްގައި ވަނީ ވިދާޅުވެފައެވެ.