މި ދުނިޔޭގެ ޙަޔާތް ވޭތުކުރަމުންދާއިރު ތަފާތު ކަންތައްތަކާއި ދިމާވާނެއެވެ. އަދި އެފަދަކަންތަކާއި ވަކީލުކޮށް އިޖާބީ ވިސްނުމެއްގައި ވިސްނަންޖެހެއެވެ. ދިރިއުޅުމުގައި ތިމާ ހިތްހަމަނުޖެހޭ އެތައްކަމެއް ކުރިމަތިވާނެއެވެ. ވަރަށް ގިނަ ދަތިތަކާއި ގޮންޖެހުންތަކާއި ދިމާވާނެއެވެ. އެފަދަ ކަންތައްތަކާއި ކުރިމަތިލާންޖެހޭނެ ގޮތްތައް އިސްލާމްދީނުގައި ބަޔާންކޮށްދެއްވާފައިވެއެވެ. މިފަދަ ކަންތައް ތަޙައްމަލް ކުރާނެ އަދި މުޢާމަލާތުކުރާނެގޮތް ބަޔާންކޮށްދީފައިވަނީ އިސްލާމްދީނުގައާއި، އިސްލާމީ ޝަރީޢަތުގައެވެ. މާތް ނަބިއްޔާ މުޙައްމަދު ﷺ ގެ އެންމެހާ ކަންތައްތަކާއި ޙަޔާތްޕުޅަކީވެސް އަޅުގަނޑުމެންނަށް ނަމޫނާއެކެވެ.
އެހެންކަމުން އިސްލާމީ ޝަރީޢަތަކީ އެންމެހާ ކަންތައްތައް އެންމެ ފުރިހަމަގޮތުގައި ބާވައިލެއްވިގެންވާ ޝަރީޢަތެވެ. ދިރިއުޅުމުގެ ހުރިހާ ކަމެއްގައި ޢަމަލުތައް ބަހައްޓާނެގޮތާއި މުޢާމަލާތުކުރާނެގޮތް އިސްލާމީ ޝަރީޢަތުގައި ބަޔާންކޮށްފައިވެއެވެ. އިސްލާމީ ޝަރީޢަތަކީ ހުރިހާ ޒަމާނަކަށް ފެތޭ ފުރިހަމަވެގެންވާ ޝަރީޢަތެކެވެ. އިންސާނާގެ ވިސްނުމާއި ފިކުރުގެ ނަމޫނާ ތަރުބިއްޔަތަށް މަގުދެއްކެވީ އިސްލާމްދީންކަން ކަށަވަރެވެ.
މުސީބާތްތަކާއި މިފަދަ އިމްތިޙާންތައް ކުރިމަތިވުމުން އެކަންކަމަށް ޢަމަލުތައް ބަހައްޓާނެ ގޮތްތައްވެސް އިސްލާމްދީނުގައި ފުރިހަމައަށް ކިޔައިދެއްވާފައިވެއެވެ. ހެޔޮމިންވަރާއި ނުބައި މިންވަރަށް އީމާންވެ، އަބަދުވެސް މާތްﷲއަށް ފުރިހަމައަށް ޔަޤީންކަން ބޭއްވުމަށާއި މާތްﷲއާ މެދު އެއްވެސް ޙާލެއްގައި ނުބައިކޮށް ހީނުކުރުމަށް އޮވެއެވެ. ﷲ ތަޢާލާ އަޅުގަނޑުމެންނަށް މިންވަރުކުރައްވާ ކޮންމެ ކަމަކަށް ރަނގަޅުގޮތުގައި ވިސްނަންޖެހޭނެއެވެ. އަދި ދިރިއުޅުމުގައި ކަމެއް ކުރިމަތިވުމުން އެކަމަކީ ހިތްހަމަ ނުޖެހޭކަމެއްކަމަށްވިޔަސް އެކަން ހެޔޮގޮތުގައި ބަލައިގަނެ ހެޔޮކޮށް ވިސްނަން ޖެހޭނެއެވެ.
ކޮންމެ ހާލެއްގައިވެސް މާތްﷲއަށް ވަކީލުކުރުމަކީ އުންމަތުގެ ނަބިއްޔާ މުޙައްމަދު ﷺ ގެ އަރިހުން ފެނުނު އެންމެ ބޮޑު ނަމޫނާއެވެ. އެއްވެސް ޙާލެއްގައި މާތްﷲ ގެ ރަޙްމަތުން އުންމީދުކަނޑާލައިގެން ނުވާނެއެވެ. އެއްވެސް އިމްތިޙާނެއް ކުރިމަތިވެއްޖެނަމަ އެކަމެއްގައި ހުރި އީޖާބީ ކަންކަމަށް ބެލުމުގެ މުހިންމުކަން ވިސްނާލާ. ނޭދެވޭ ކަންކަމާއިމެދު ނުވިސްނުން މުހިންމެވެ. ރަސޫލާ ﷺ ކޮންމެ ކަމެއްގައިވެސް ގެންގުޅުއްވީ އީޖާބީ ވިސްނުފުޅެވެ. ކީރިތި ޤުރުއާނުގައި ކޮންމެ އުނދަގޫ ކަމަކާއެކު ފަސޭހަކަމެއްވާކަން ބަޔާންކުރައްވާފައިވެއެވެ.
މާތްﷲ އެއްވެސް ނަފްސަކަށް އެ ނަފްސަކަށް ކުޅަދާނަވެގެންވާ ކަމަކަށް މެނުވީ ތަކުލީފް ނުޖައްސަވާކަމަށް ޤުރުއާނުގައި ބަޔާންކުރައްވާފައިވެއެވެ.
