އިންޑިއާ ސަރުކާރުގެ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް ސްކީމްގެ ދަށުން ހިލޭ އެހީ ދިނުމުގެ އެއްބަސްވުންތަކެއްގައި ސޮއިކޮށްފިއެވެ.
ހޯމަ ދުވަހު މި އެއްބަސްވުންތަކުގައި ދިވެހި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ފޮރިން އެފެއަރޒް ޢަބްދުﷲ ޝާހިދުއެވެ. އަދި އިންޑިއާ ސަރުކާރުގެ ފަރާތުން ސޮއިކުރެއްވީ އިންޑިއާއިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު މުނޫ މަހާވަރެވެ.
ފޮރިން މިނިސްޓްރީން މައުލޫމާތުދޭ ގޮތުގައި ލަންދޫ މާބުދުގެ އާއި، ދިޔަމިގިލީ ދަރިކޮޅުގެ ރަސްމަތިފުށާ ގުޅޭ ގަނޑުވަރު މަރާމާތުކޮށް، ރައްކާތެރި ކުރުމުގެ އެއްބަސްވުމެއް އޭގެ ތެރޭގައި ހިމެނެއެވެ. އަދި ސައިޓް މިއުޒިއަމް ޤާއިމްކޮށް، އެތަންތަނަށް ޒިޔާރަތްކުރާ މީހުންނަށް އެތަންތަން ފެންނާނެ ގޮތަށް ހަދައި، ގެލެރީތައް ޤާއިމްކުރުމަށް ވަނީ ހަމަޖެހިފައެވެ.
މިޒަމާނުގެ މިއުޒިމްތަކުގައި ޤާއިމްކޮށްފައި ހުންނަ ޑިޖިޓަލް އެގްޒިބިޓްތައް އެތަންތަނުގައި ޤާއިމްކޮށް، އެތަންތަނާ ބެހޭ މައުލޫމާތު އާއްމުންނަށް ލިބޭނެ އިންތިޒާމް ހަމަޖެހޭނެކަމަށްވެސް ފޮރިން މިނިސްޓްރީން މައުލޫމާތު ދެއެވެ.
އޭގެ އިތުރުން، އިންޑިއާ ސަރުކާރުގެ ހިލޭ އެހީގެ ދަށުން ނ. މަނަދޫގައި ސްޕޯރޓްސް ކޮމްޕްލެކްސްއެއް އެޅުމުގެ އެއްބަސްވުމުގައިވެސް ވަނީ ސޮއިކޮށްފައެވެ.
އިންޑިއާ ސަރުކާރުގެ 8 މިލިއަން ރުފިޔާގެ ހިލޭ އެހީގެ ދަށުން ހިންގާ މި ޕްރޮޖެކްޓްގައި ނ. މަނަދޫގައި ބައިނަލްއަޤްވާމީ ސްޓޭންޑަޑަށް ފެތޭ ސްޕޯޓްސް ކޮމްޕްލެކްސެއް ޤާއިމް ކުރެވޭނެއެވެ. މި ޕްރޮޖެކްޓްގެ މަސައްކަތްތައް ކުރިއަށްދާނީ މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުގެ ބެލުމުގެ ދަށުންނެވެ.
ދެން ހިމެނެނީ އދ. ދިގުރަށް އަދި ގއ. ގެމަނަފުށީގައި ޔޫތު ސެންޓަރެއް ޤާއިމްކުރުމުގެ އެއްބަސްވުމެކެވެ.
މި ދެ ރަށުގައި ޔޫތު ސެންޓަރު ޤާއިމްކުރުމަށް އިންޑިއާ ސަރުކާރުން 10 މިލިއަން ދިވެހި ރުފިޔާގެ ހިލޭ އެހީ ދޭނެއެވެ. އަދި މި ޔޫތު ސެންޓަރުތަކުގައި އިންޑޯރ ކުޅިވަރުތައް ކުޅެވޭނެ ވަސީލަތްތަކުގެ އިތުރުން ޖިމް، އޮފީސް ސްޕޭސް އަދި ބައްދަލުވުންތައް ބާއްވާނެ މީޓިންގ ރޫމް ހުންނާނެއެވެ.
މި ޕްރޮޖެކްޓްތައްވެސް ކުރިއަށް ގެންދާނީ މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުންނެވެ.
މި ޕްރޮޖެކްޓްތަކަކީ އިންޑިއާ ސަރުކާރުގެ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް ސްކީމްގެ ދަށުން، ހިލޭ އެހީގައި ހިންގާ ޕްރޮޖެކްޓްތަކެކެވެ.
