މާލެ ސިޓީގެ މަގުތަކުގައި ގަވާއިދާއި ޚިލާފަށް ބެހެއްޓިފައިވާ ޕެލެޓްތައް ނެގުމުގެ މަސައްކަތުގެ ތެރެއިން, މާލޭގެ އެކި ސަރަހައްދުތަކުން ދެހަފްތާ ތެރޭގައި 1360 އަށް ވުރެ ގިނަ ޕެލެޓް ނަގާފައިވާކަމަށް މާލެ ސިޓީ ކައުންސިލުން ބުނެފިއެވެ.
ޕެލެޓްތައް ނަގަން ފަށާފައިވަނީ މިމަހުގެ 15 ވަނަ ދުވަހުއެވެ. އެއީ ޕެލެޓްތައް ނެގުމަށް މާލެ ސިޓީ ކައުންސިލުން ދެ ފަހަރަށް ތާރީޚު ދިނުމަށްފަހުއެވެ. އެމަސައްކަތުގެ އެންމެ ފަހުގެ މައުލޫމާތުދެމުން ސިޓީ ކައުންސިލުން ބުނީ މާލެ ސިޓީގެ މޭޔަރ ޑރ. މުހައްމަދު މުއިއްޒުގެ އަމާޒަކީ ރޯދަ މަސް އައުމުގެ ކުރިން މި މައްސަލަ ހައްލު ކުރުންކަމުގައެވެ.
ގަރާޖު، ގުދަން، ވޯރކްޝޮޕް އަދި ފިހާރަ ފަދަ ތަންތަނުގެ ކުރިމަތީގައި ޕެލެޓް ބަހައްޓައިގެން ޕާކިން ޒޯންތައް ބްލޮކްވާގޮތަށް މަސައްކަތް ކުރަމުންދާ ފަރާތްތަކުން, ސިޓީ ކައުންސިލަށް ހުށަހެޅުމުން, ޕާކްކުރުން މަނާކަން އަންގައިދޭ "ޑަބަލް ލައިން" އެ ތަނުގައި ކުރަހައިދޭން ކައުންސިލުން ވަނީ ނިންމާފައެވެ. "ވަކި ކަމަކަށް އިމާރާތް ބޭނުންކުރުމުގެ ހުއްދަ" އަށް އެދި ސިޓީ ކައުންސިލަށް ހުށަހެޅުމުން "ޑަބަލް ލައިން" ކުރަހައިދޭ ގޮތަށް ވެސް އޮތީ ހަމަޖައްސައިދީފައެވެ.
މާލެ ސިޓީ ކައުންސިލުން ބުނެފައި ވަނީ, މުދާ އަރުވައި ބޭލުމަށް ޕާކިންގ ޒޯންތަކުގައި ޕެލެޓް ބަހައްޓާފައިވާ ސަރަހައްދުތައް ޗެކް ކުރުމަށްފަހު، އެ ސްލޮޓް ހަމަޖައްސައިދޭނީ ކުލި ދައްކަން ޖެހޭ ގޮތަށް ކަމަށެވެ. ކައުންސިލުން ހުއްދަ ނުހޯދައި ޕާކިންގ ޒޯންތަކުގައި ޕެލެޓް ބަހައްޓާނަމަ، އެ އެއްޗެހި ނަގާނެ ކަމަށް ސިޓީ ކައުންސިލުން މީގެކުރިން ބުނެފައިވެއެވެ.
މާލޭގެ މަގުތަކުގައި ޕެލެޓް ބަހައްޓާ މައްސަލަ މީގެކުރިންވެސް ބޮޑުވެގެން އެ ޕެލެޓްތައް ނަގާފައިވެއެވެ.
