ކ. މާފުށީ ޖަލާއި ދިމާލުން މީހަކު މަރުވެފައި އޮއްވައި ފެނިއްޖެއެވެ.
ފުލުހުން ބުނީ މާފުށީ ޖަލާއި ދިމާލުން މޫދަށް ވެއްޓި މީހަކު ގެނބިފައިވާކަމަށް ރޭ ދަންވަރު 02:22 އެހާއިރު ފުލުހުންނަށް ރިޕޯޓުކޮށްފައިވާކަމަށެވެ. އެއީ 33 އަހަރުގެ ދިވެހި ފިރިހެނެއް ކަމަށް ފުލުހުން ބުނެފައިވެއެވެ.
އެމީހާ މާފުށީ ހެލްތު ސެންޓަރަށް ގެންދިޔައިރުވެސް އޮތީ މަރުވެފައި ކަމަށް ހެލްތް ސެންޓަރުން މައުލޫމާތުދީފައިވާކަމަށް ފުލުހުން ބުނެފައިވެއެވެ.
މިކަމާއި ގުޅިގެން ކަރެކްޝަންސްއިން ބުނީ އެމީހާ މޫދަށް ވެއްޓި، ގެނބިގެން މަރުވެފައިވަނީ ގަވާއިދާ ޚިލާފަށް ޖަލަށް ތަކެތި އެތެރެކުރަން އުޅުމުގެ ތެރެއިން ކަމަށެވެ. އަދި އެ ތަކެތި ޖަލަށް އެެތެރެކުރެވިފައިނުވާކަމަށް ކަރެކްޝަންސްއިން ބުނެފައިވެއެވެ.
ކަރެކްޝަންސްއިން މިހާރު ވަނީ އެތަކެތި ފުލުހުންނާއި ހަވާލުކޮށްފައެވެ. އަދި ފުލުހުން ގެންދަނީ މި މައްސަލައާއި ގުޅިގެން އިތުރަށް ބަލަންޖެހޭ ކަންކަން ބަލަމުންނެވެ.
