ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ތައިރޮޑް ސާޖަރީ ކާމިޔާބުކަމާއެކު ކުރައްވާފައިވާއިރު، ފަރުވާއަށްފަހު އެމަނިކުފާނު ހޮސްޕިޓަލުން ދޫކޮށްލައިފިއެވެ.
ޑޮކްޓަރުގެ ލަފާގެމަތިން ތައިރޮއިޑް ފަރުވާއަކަށް އެމަނިކުފާނު ސިންގަޕޫރަށް ވަޑައިގަތީ 23 ފެބްރުއަރީ 2022 ގައެވެ. އެގޮތުން ސިންގަޕޫރުގައި ކުރިއަށް ގެންދިޔަ މި ސަރޖަރީއަށްފަހު ކުރެއްވި ޓްވީޓެއްގައި އެމަނިކުފާނު ވިދާޅުވީ، ސަރޖަރީ ނިމިއްޖެކަމަށާއި މިހާރު ހާލުކޮޅު ރަނގަޅުވަމުން އަންނަކަމަށެވެ.
ރައީސް ސާލިޙު ގެންދަވަނީ އެމަނިކުފާނުގެ ޙާލުކޮޅާއި ގުޅޭ މައުލޫމާތު ޓްވިޓަރ މެދުވެރިކޮށް އަމިއްލަފުޅަށް ހިއްސާ ކުރައްވަމުންނެވެ. އެގޮތުން އަންގާރަ ދުވަހު ކުރެއްވި ޓްވީޓެއްގައި ވަނީ ހޮސްޕިޓަލުން ދޫކޮށްލެއްވިކަން އިއުލާނު ކުރައްވާފައެވެ. އަދި ޙާލުކޮޅު ރަނގަޅު ކަމަށާއި، ކުޑަ ދުވަސްކޮޅެއްގެ ތެރޭގައި އެނބުރި ރާއްޖެ ވަޑައިގަންނަވާނެކަމަށްވެސް ރައީސް ވިދާޅުވިއެވެ.
ރައީސް ވަނީ އެމަނިކުފާނަށް އަވަސް ޝިފާއަކަށް އެދިލެއްވި ހުރިހާ ފަރާތްތަކަށް ޝުކުރު އަދާ ކުރައްވާފައެވެ.
ރައީސް ސަރޖަރީ ކުރައްވާތީ 25 ފެބްރުއަރީގައި ރައީސުލްޖުމްހޫރިއްޔާގެ ޒިންމާތަކާއި ނާއިބު ރައީސް ފައިސަލް ނަސީމް ވަގުތީ ގޮތުން ޙަވާލުވެވަޑައިގެންނެވިއެވެ. އަދި އޮޕަރޭޝަނަށްފަހު، ރައީސުލްޖުމްހޫރިއްޔާގެ މަސްއޫލިއްޔަތުތަކާއި ވާޖިބުތަކާއި އެމަނިކުފާނު އަލުން ވަނީ އެ ދުވަހު ޙަވާލުވެވަޑައިގަންނަވާފައެވެ.
