ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަރުކާރުގައި ކޮވިޑް-19ގެ ބަލިމަޑުކަމުން އަރައިގަތުމަށް ހުރިހާ އިދާރާއަކާ ގުޅިގެން މަސައްކަތް ކުރަމުންދާ ކަމަށް މޯލްޑިވްސް އިންޓެގްރޭޓެޑް ޓުއަރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ)ގެ މެނޭޖިންގެ ޑިރެކްޓަރ މުހައްމަދު ރާއިދު ވިދާޅުވެއްޖެއެވެ.

ހއ. ހޯރަފުށީގައި "ސަވާދީއްތަ ދަތުރު" ފެށުމަށް ބޭއްވި ރަސްމިއްޔާތުގައި, މި ނަން ދެވުނު ގޮތް ތަފްސީލު ކިޔާދެއްވައި ރާއިދު ވިދާޅުވީ, ފަތުރުވެރިކަން ކުރިއެރުމުގައި ސަރުކާރުގެ ސިޔާސަތު ވަރަށް ކާމިޔާބު ކަމަށާއި، އުނދަގޫތަކާއެކު ވެސް އިގުތިސާދީ ގޮތުން ބޮޑެތި ކާމިޔާބީތަކެއް ހޯދަމުންދާ ކަމަށެވެ.

ރާއްޖެއަށް ލިބިފައިވާ ގުދުރަތީ ރީތިކަމުގެ އިތުރުން މުއްސަނދި ތަރިކައަކާއި ސަގާފަތެއް ލިބިފައިވާކަން ފާހަގަކުރައްވައި ރާއިދު ވިދާޅުވީ, ޒަމާނުއްސުރެ ރާއްޖެއަކީ ދަތުރުވެރިންގެ މެދުގައި މަގުބޫލު މަންޒިލެއް ކަމަށެވެ. އަދި އެޒަމާނުގައި ވެސް ދަތުރުވެރިންގެ މެދުގައި ރާއްޖެ މަގުބޫލުކަމަށް ރާއިދު ވިދާޅުވިއެވެ. ސަވާދީއްތަ ދަތުރަށް އިޝާރާތް ކުރައްވައި ރާއިދު ވިދާޅުވީ, ފަތުރުވެރިންނަށް ރާއްޖޭގެ އެކި މަންޒިލްތަކަށް ދިއުމުގެ ފުރުސަތު ލިބޭނެ ކަމަށާއި، އެކި ރަށްރަށުގެ ދިރިއުޅުމުގެ ވައްޓަފާޅި ވެސް ތަޖުރިބާ ކުރެވޭނެ ކަމަށެވެ.

މިއަދުގެ ހާލަތާ ގުޅޭގޮތުން ރާއިދު ވިދާޅުވީ, ކޮވިޑް-19ގެ ބަލިމަޑުކަމުން އަރައިގަތުމަށް މިސަރުކާރުން ގިނަ މަސައްކަތްތައް ކުރަމުންދާ ކަމަށެވެ. އެގޮތުން ހުރިހާ އިދާރާތަކާ ގުޅިގެން މަސައްކަތް ކުރަމުންދާކަން ފާހަގަކުރެއްވިއެވެ. އަދި ކޮވިޑް-19އާ އެކު ވެސް ގިނަ ކާމިޔާބީތަކެއް ހާސިލްކުރަމުންދާ ކަމަށާއި, އެކަން ފަތުރުވެރިކަމުގެ ސިނާއަތުން މިއަދު ފެނިގެންދާ ކަމަށް ރާއިދު ވިދާޅުވިއެވެ.

މީގެ އިތުރުން ސަވާދީއްތަ ދަތުރަކީ ފަތުރުވެރިކަމުގެ ދާއިރާއަށް ލިބުނު އިތުރު ކުރިއެރުމެއް ކަމަށާއި، މި ދަތުރު ކާމިޔާބުކަމާއެކު ފެށުމަށް ގިނަ ބައެއްގެ އެއްބާރުލުން ލިބިފައިވާ ކަމަށް އޭނާ ވިދާޅިވިއެވެ. ސްޕޮންސަރުންގެ އިތުރުން ކަމާގުޅުންހުރި ސަރުކާރުގެ ގިނަ އިދާރާތަކުން މިހަރަކާތުގައި ބައިވެރިވެފައިވާއިރު، ޚާއްސަ ގޮތެއްގައި ހޯރަފުށީ ދާއިރާގެ މެމްބަރު އަހުމަދު ސަލީމް ކުރައްވަމުން ގެންދަވާ ބުރަ މަސައްކަތް ރައީދު ފާހަގަކުރެއްވިއެވެ.

ރާއްޖޭގައި ބާއްވާ ފުރަތަމަ ޔޮޓް ރެލީ "ސަވާދީއްތަ ދަތުރު"ގެ އެންމެ ބޮޑު ބޭނުމަކީ ފަތުރުވެރިކަމަށް އައު ކަންތައްތަކެއް ތައާރަފުކޮށް ރާއްޖޭގެ މުއްސަނދިކަން އިޝްތިހާރުކުރުން ކަމަށް އެމްއައިޓީޑީސީން މައުލޫމާތު ދެއެވެ. ފަޅުރަށްތައްވެސް ހިމެނޭހެން 15 ރަށެއްގައި މަޑުކުރުމަށް ނިންމާފައިވާއިރު, ދަތުރުގެ ފަހު މަންޒިލަކީ، ފަރި މޯލްޑިވްސްއެވެ. މި ހަރަކާތް ނިންމުމުގެ ގޮތުން ފެބްރުއަރީ މަހުގެ 20 ވަނަ ދުވަހު ބާއްވާ ގާލާ ނައިޓް އޮންނާނީ އެތަނުގައެވެ.

މި ދަތުރުގެ ތެރެއިން 50 އަށްވުރެ ގިނަ ހަރަކާތް ހިންގުމަށް ހަމަޖެހިފައިވެއެވެ. މި ދަތުރުގައި ރާއްޖޭގެ މަޝްހޫރު އެތައް ތާރީޚީ ބިނާތަކާއި، ދިވެހިންގެ ރަށްފުށު ދިރިއުޅުމާއި، ރާއްޖޭގެ ރީތި ކަނޑުއަޑީގެ މަންޒަރު ބަލައިލުމުގެ ފުރުސަތު ބައިވެރިންނަށް ލިބިގެންދާނެއެވެ.

ސަވާދީއްތަ ދަތުރަކީ އެމްއައިޓީޑީސީގެ ފަރާތުން މުޅި ދުނިޔެއަށް ހުޅުވާލައިގެން ކުރިއަށް ގެންދާ ރެލީއެކެވެ. އެމްއައިޓީޑީސީގެ ފަރާތުން މި ހަރަކާތް ކުރިއަށް ގެންދިޔުމަށް ގަސްދުކޮށްފައިވަނީ ލޯކަލް ޓޫރިޒަމް، ހެރިޓޭޖް ޓޫރިޒަމް އަދި ރޫރަލް ޓޫރިޒަމް ހިމެނޭ ގޮތުންނެވެ.

މިދަތުރަށް "ސަވާދީއްތަ ދަތުރު"ގެ ނަން ދެވިފައިވަނީ، ދިވެހިރާއްޖޭގެ ގައުމީ ބަތަލު، އައްސުލްތާނު ޣާޒީ މުހައްމަދު ތަކުރުފާނު އަލްއައުޒަމް ސިރީ ސަވާދީއްތަ މަހާރަދުންނާ ގުޅުވައިގެންނެވެ.