އަންނަ މާރޗު މަހުގެ ފުރަތަމަ ހަފްތާއިން ފެށިގެން މިފްކޯއަށް މަސް ގަންނަ އަގު ބޮޑުކުރެވޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.

މަސްވެރިން ބާނަ މަސް މިފްކޯއިން ގަންނަ އަގާއިމެދު އަބަދުވެސް މަސްވެރިން ކަންބޮޑުވުން ފާޅުކުރެއެވެ. މިގޮތުން މިފްކޯއިން މަސް ގަންނަމުންދަނީ ކަނޑައެޅިފައިވާ ވަކި އަގެއްގައެވެ. އެހެންކަމުން މިފަދައިން މަސްވެރިންގެ ހުރި އެކި ކަންބޮޑުވުންތައް ހައްލުކުރުމަށް މި ސަރުކާރުން ގެންދަނީ އެތައް މަސައްކަތެއް ކުރަމުންނެވެ.

ބުރާސްފަތި ދުވަހުގެ ރައްޔިތުންގެ މަޖިލީހުގެ ޖަލްސާގައި ރިޔާސީ ބަޔާން އިއްވަވަމުން ރައީސް ސާލިހު ވިދާޅުވީ އަންނަ މާރޗު މަހުގެ ފުރަތަމަ ހަފްތާއިން ފެށިގެން މިފްކޯއަށް މަސް ގަންނަ އަގު ބޮޑުކުރެވޭނެކަމަށެވެ. ދެން މިފްކޯއިން މަސް ގަންނާނީ، ދުނިޔޭގެ ބާޒާރުގައި މަހުގެ އަގަށް އަންނަ ބަދަލާ އެއްގޮތަށް ކަމަށާއި، ދުނިޔޭގެ ބާޒާރުގައި ބޮޑުއަގު ލިބޭނަމަ، މިފްކޯއަށް ގަންނަ މަހުގެ އަގު ބޮޑުވާނެ ކަމަށް ރައީސް ސާލިހު ވިދާޅުވިއެވެ.

ފާއިތުވެދިޔަ 15 އަހަރުގެ ތެރޭގައި، އެންމެގިނަ މަސް މިފްކޯއަށް ކިރާފައިވަނީ ނިމިދިޔަ 2021 ވަނަ އަހަރެވެ. މިގޮތުން މިދިޔަ އަހަރު 58،350 ޓަނުގެ މަސް ކިރާފައިވާއިރު، ޖުމުލަ އަގު 901،786،841 އަށް އަރާފައިވެއެވެ

މީގެ އިތުރުން ރައީސުލްޖުމްހޫރިއްޔާ ވަނީ ދަނޑުވެރިކަމުގެ ސިނާއަތަށްވެސް އަލިއަޅުވާލައްވާފައެވެ. ރައީސް ވިދާޅުވީ ދިވެހި އިގްތިސާދު ސިންދަފާތު ކުރުމުގެ ލިސްޓުގެ އެންމެ ކުރިއަށް ސަރުކާރުން ލާފައިވަނީ ދަނޑުވެރިކަން ކަމުގައެވެ. މިކަމަށްޓަކައި އެގްރޯނެޓްގެ ނަމުގައި ސަރުކާރުން ކުންފުންޏެއް އުފައްދާފައިވާއިރު، އެގްރޯނެޓްގެ ފަރާތުން ރާއްޖޭގެ 68 ރަށެއްގެ 704 ދަނޑުވެރިންނާއެކު ސޮއިކުރެވިގެން، ކޮންޓްރެކްޓް ފަރމިންގގެ މަސައްކަތް ދަނީ ހިނގަމުންކަމަށް ރައީސް ވިދާޅުވިއެވެ. އޭގެތެރެއިން 163 ދަނޑުވެރިއެއްގެ އުފެއްދުންތައް ގަނެ މާކެޓަށް ނެރެމުންދާކަމަށާއި، މިއީ ފަށައިގަތުމެއް ކަމަށް ރައީސް ސާލިހު ވިދާޅުވިއެވެ. އަދި މި މަސައްކަތް ކާމިޔާބުކަމާއެކު ކުރިއަށްގެންދެވި، އޭގެ ނަތީޖާ، ރާއްޖޭގެ ހުރިހާ ދަނޑުވެރިންނަށް ލިއްބައިދެވޭނެކަމުގެ އުންމީދު މިހާރު އާވެފައިވާކަމަށްވެސް ރައީސް ވިދާޅުވިއެވެ.

އެސްއެމްއީ ބޭންކް މެދުވެރިކޮށް ދަނޑުވެރިންނަށް މިހާތަނަށް 16.3 މިލިއަން ރުފިޔާގެ ލޯނުވަނީ ދޫކުރެވިފައިވާކަމަށް ރައީސް ވިދާޅުވިއެވެ. އަދި ފަސޭހައިން ރާއްޖޭގައި އުފެއްދޭނެކަމުގެ ޔަގީންކަން ލިބޭ ބާވަތްތަކުގެ އިމްޕޯޓް ޑިއުޓީ، ކުރިއަށް އޮތް ތަނުގައި މަތިކުރެވޭނެ ކަމަށްވެސް ރައީސް ވަނީ ވިދާޅުވެފައެވެ. މީގެ ބޭނުމަކީ ދިވެހި އުފެއްދުން އިތުރުކޮށް، ނަފާ ހޯދުމުގެ ފުރުސަތު، ދިވެހި ދަނޑުވެރިންނަށް ލިއްބައިދިނުން ކަމަށް ރައީސް ސާލިހު ވިދާޅުވިއެވެ.