ފެމިލީ ކޯޓަށް އައްޔަން ކުރެއްވި ދެ ފަނޑިޔާރުން ޖުޑީޝަލް އިންޑަކްޝަން ޕްރޮގްރާމަށްފަހު މަސައްކަތަށް ގުޅިވަޑައިގެންފިއެވެ.
ފެމިލީ ކޯޓަށް އަލަށް އައްޔަނު ކުރެވުނު ދެ ފަނޑިޔާރުންނަކީ އއ. ފެރިދޫ، ނަޝީދީހިޔާ، އަލްއުސްތާޛާ ޒައީމާ ނަޝީދު އަބޫބަކުރާއި މ.ވިލުފުށީގެ، އަލްއުސްތާޛާ މައީޝާ ޔޫސުފް ސަމީރެވެ. އެ ދެބޭފުޅުންނަކީ ފަނޑިޔާރުން ޢައްޔަންކުރާ ކޮމިޓީން އިންޓަރވިއުކޮށް އެންމެ ޤާބިލުކަމަށް ފެންނަކަމަށް ނިންމަވައި ކޮމިޝަނަށް ލަފާ ދެއްވި ދެބޭފުޅުންނެވެ.
އެ ދެބޭފުޅުން ފަނޑިޔާރު ކަމުގެ ހުވާ ކުރައްވާފައިވަނީ 28 ނޮވެމްބަރު 2021 ގައެވެ. އަދި ޖުޑީޝަލް އިންޑަކްޝަން ޕްރޮގްރާމް ފުރިހަމަ ކުރައްވާފައިވަނީ 27 ޖެނުއަރީ 2022 ގައެވެ.
އަންހެނުން ހުށައަޅާ މައްސަލަތައް ނިސްބަތުން ގިނަ ކޯޓެއްގައި އަންހެން ފަނޑިޔާރުން ނެތުމަކީ އާއިލީ އަދުލުގެ ނިޒާމަށް ދިމާވެފައިވާ ހީނަރުކަމެއްކަމަށް ޖޭއެސްސީން ދެކެއެވެ. އަދި ފެމިލީ ކޯޓަށް ދެ އަންހެން ފަނޑިޔާރުން އައްޔަން ވެގެން ދިއުމުން ޖޭއެސްސީން ވަނީ އެކަމަށް މަރުޙަބާ ކިޔާފައެވެ.
އަލްއުސްތާޛާ ޒައީމާ ނަޝީދު ވަނީ ކުއްލިއްޔަތުއް ދިރާސާތިލް އިސްލާމިއްޔާއިން ޝަރީއަތާއި ގާނޫނުން ބެޗްލަރ ޑިގްރީ ހާސިލް ކުރައްވައި، ވިލާ ކޮލެޖުން މާސްޓަރ އޮފް ޝަރީއާ ހާސިލް ކުރައްވާފައެވެ. އަލްއުސްތާޛާ ޒައީމާ ނަޝީދު ވަނީ ޖުވެނައިލް ކޯޓުގެ ރެޖިސްޓްރާރުގެ މަގާމުގައި 9 އަހަރަށްވުރެ ދިގު މުއްދަތަކަށް ޚިދުމަތް ކުރައްވާފައެވެ.
އަލްއުސްތާޛާ މަޢީޝާ ޔޫސުފް ސަމީރު ވަނީ ޔުނިވަރސިޓީ އޮފް ލަންޑަނުން ބެޗެލާރސް އޮފް ލޯސް ހާސިލް ކުރައްވާފައެވެ. އަލްއުސްތާޛާ މަޢީޝާ ޔޫސުފް ސަމީރު ވަނީ ޕްރޮސެކިއުޓަރ ޖެނެރަލް އޮފީހުގެ ޕްރޮސިކުޓަރެއްގެ މަގާމުގައި 3 އަހަރަށްވުރެ ދިގު މުއްދަތަކަށް ޚިދުމަތް ކުރެއްވުމުގެ އިތުރުން، އެޓޯލްސް ސެކްޝަންގެ ޔުނިޓް ހެޑް އަދި ފެމިލީ އެންޑް ޗައިލްޑްސް ޔުނިޓުގެ ޔުނިޓު ހެޑްގެ ގޮތުގައި މަސައްކަތް ކުރައްވާފައެވެ.
ގެވެށި އަނިޔާގެ މައްސަލަތަކާއި، ކުޑަކުދިންގެ ރައްކާތެރިކަމާއި ގުޅޭ މައްސަލަތަކާއި، ދެމަފިރިންގެ މުދަލާއި ބެހޭ މައްސަލަތަކާއި، ދޭސީ އަދި ބިދޭސީ ކައިވެނިތަކާއި ގުޅޭ މައްސަލަތަކާއި، އެފަދަ ކައިވެނީގެ މައްޗަށް ލިބޭ ދަރިންނާއި ގުޅޭ އެކި މައްސަލަތަކާއި، ދައުލަތުގެ ބެލުމުގެ ދަށުގައި ތިބޭ ކުދިންނާއި ގުޅޭ މައްސަލަތައް ފަދަ ކަންކަމަކީ ފެމިލީ ކޯޓުގެ އިހްތިސާސްގައި ހިމެނޭ ބައެއް ކަންކަމެވެ.
