ށ. ފޯކައިދޫއާ މާލެއާ ދެމެދު މައިގަނޑު ގޮތެއްގައި އޮތީ އެންމެ ދެ ތަފާތު ކަމަށާއި، ކުރިއާ އަޅާބަލާއިރު މިހާރު ވަރަށް ބޮޑަށް ތަރައްގީވަމުންދާ ކަމަށް އެމްޑީޕީގެ ނައިބު ރައީސް މުހައްމަދު ޝިފާޒު ވިދާޅުވެއްޖެއެވެ.
ބުރާސްފަތި ދުވަހު ކޮމަންޑޫ ދާއިރާގެ ބައި އިލެކްޝަންގެ ކެމްޕެއިންގައި ފޯކައިދޫ ރައްޔިތުންނާ ބައްދަލުކުރައްވައި ޝިފާޒު ވިދާޅުވީ, ފޯކައިދޫއަށް ވަޑައިގެންނެވޭތާ ގާތްގަނޑަކަށް 16 ވަރަކަށް އަހަރު ވެފައިވާ ކަމަށާއި، ކުރިއާ އަޅާބަލާއިރު ބޮޑު ތަފާތެއް ފެންނަ ކަމަށެވެ.
މާލެއަށް އިޝާރާތްކުރައްވައި ޝިފާޒު ވިދާޅުވީ, މާލެއާ ފޯކައިދޫއާ ދެމެދު ތަފާތެއްގެ ގޮތުގައި މައިގަނޑު އޮތީ ދެކަމެއް ކަމަށެވެ. އެއީ މަގުތަކުގައި ތާރުއަޅާފައި ނެތުމާއި ރުއްގަސް ގިނަކަން އެކަނި ކަމަށް އޭނާ ވިދާޅުވިއެވެ.
ފޯކައިދޫއަށް އާދެވޭތާ ގާތްގަނޑަކަށް 16 ނުވަތަ 17 އަހަރު ވެއްޖެ. ކުރީގައި ފޯކައިދޫއަށް އަޅުގަނޑުމެން އަންނައިރު ފޯކައިދޫއާ މިހާރު މިފެންނަ ފޯކައިދޫއާ އަޅާކިޔާލަންޖެހޭ ކޮންމެވެސް ވަރަކަށް. ދޮގު ނުހަދާ މީހަކު އެއްޗެއް ދަންނަވަނީ ނަމަ ދެންނެވޭނީ މާލެއާ ފޯކައިދޫއާ މިވަގުތު ތަފާތެއް ގޮތުގައި ދައްކާލަން ޖެހޭ އޮތީ އެންމެ ދެކަމެއް. މަގުތަކުގައި ތާރުއަޅާފައި ނެތް ކަން. ރުއްގަސް ގިނަކަން އެކަނި. އެހެންނޫނީ އަނެއްހެން މަދުވާ ކަމެއް އިރާދަކުރެއްވީތީ ނެތް. ޖަޒީރާ ދިރިއުޅުމަކަށް އަޅުގަނޑުމެން އެދޭ ވަރުން ތާރު އެޅުމަކީ މުހިންމު ކަމެއް ނޫން. ރުއްގަސް ކެނޑުމަކީ މުހިންމު ކަމެއް ނޫން. މިހިޔާވަހިކަމާއެކު މިރަށް ތަރައްގީވެގެންދާނެ.އެމްޑީޕީގެ ނައިބު ރައީސް މުހައްމަދު ޝިފާޒު
ޝިފާޒު ވިދާޅުވީ މިސަރުކާރުގައި މުޅި ރާއްޖެއަށް ތަރައްގީ ގެނައުމަށް އިސްކަން ދެނީ ޖަޒީރާވަންތަކޮށް ކަމަށާއި، އެގޮތަށް މަސައްކަތްތައް ކުރިއަށްދާ ކަމަށެވެ. އަދި މިއަދު ފޯކައިދޫއަކީ ވެސް ޚާއްސަ ރަށެއް ކަމަށާއި، ތަރައްގީގެ ގިނަ މަޝްރޫއުތަކެއް މިހާރު ވެސް ކުރިއަށްދާ ކަމަށެވެ. ފޯކައިދޫގެ އިތުރުން އަތޮޅުތެރޭގެ އެހެން ރަށްތަކަށް ވެސް މިސަރުކާރުން އިސްކަންދޭކަން ޝިފާޒު ފާހަގަކުރެއްވިއެވެ.
