ރާއްޖޭގެ ސްކޫލްތަކުގެ ޕްރިންސިޕަލުންނާއި މުދައްރިސުންނަށް ޚާއްޞަކޮށް، އޮންލައިންކޮށް ހިންގާ ޕްރޮފެޝަނަލް ޑިވެލޮޕްމަންޓް ޓްރެއިނިންގ ކޯސްތަކެއް އިފްތިތާޙްކޮށްފިއެވެ.
މި ކޯސްތައް ހިންގަނީ އިނގިރޭސިވިލާތުގެ ގައިޑް އެޑިޔުކޭޝަނާ ގުޅިގެންނެވެ.
މި ކޯސްތައް އިފްތިތާޙްކޮށްދެއްވީ އެކަމަށް ޚާއްޞަކޮށް ބޭއްވި ރަސްމިއްޔާތެއްގައި މިނިސްޓަރ ޑރ. ޢާއިޝަތު ޢަލީއެވެ. މި ރަސްމިއްޔާތުގައި މިނިސްޓްރީގެ އިސްވެރިންނާއި ގައިޑް އެޑިޔުކޭޝަންގެ އިސްވެރިން ބައިވެރިވެ ވަޑައިގެންނެވިއެވެ.
މި ކޯސްތައް ހިންގާނީ ގައިޑް އެޑިޔުކޭޝަންގެ ތަޖުރިބާކާރުންނެވެ. ގައިޑް އެޑިޔުކޭޝަނަކީ އޮންލައިންކޮށް މުދައްރިސުން ތަމްރީނުކުރުމަށްޓަކައި، ޑިޖިޓަލް ގިނަ ވަޞީލަތްތަކެއް އެއް ޕްލެޓްފޯމަކުން ލިބޭގޮތަށް ތައްޔާރުކުރެވިފައިވާ އޮންލައިން ޕްލެޓްފޯމެކެވެ.
ގައިޑް އެޑިޔުކޭޝަން ޕޯޓަލް މެދުވެރިކޮށް މުދައްރިސުންނަށް، ޕްރޮފެޝަނަލް ޑިވެލޮޕްމަންޓަށް ޚާއްޞަކޮށް ތައްޔާރުކުރެވިފައިވާ ގިނަ އަދަދެއްގެ އޮންލައިން ކޯސްތަކުގައި ހިލޭ ބައިވެރިވުމުގެ ފުރުޞަތު ލިބިގެންދާނެއެވެ. ކިޔަވައިދިނުމާ ގުޅޭ އެކި ދާއިރާތަކުން ތަފާތު ގިނަ ކޯސްތަކުގައި ބައިވެރި ވުމުގެ ފުރުޞަތު ހުޅުވާލެވިފައި އޮތުމުން، މުދައްރިސުންނަށް އެބޭފުޅަކު އެންމެ ބޮޑަށް ތަމްރީނު ބޭނުންވާ ދާއިރާއަކާ ގުޅޭ ކޯހެއް އިޚުތިޔާރު ކުރުމަށް މަގުފަހިވެގެންދާނެއެވެ.
މި ކޯސްތައް އިފްތިތާޙްކުރުމަށް ބޭއްވި ރަސްމިއްޔާތުގައި މިނިސްޓަރ ޑރ. ޢާއިޝަތު ޢަލީ ވިދާޅުވީ، މުދައްރިސުންގެ އެންމެ ބޮޑު އެއް ކަންބޮޑުވުމަކީ ފެންވަރު ރަނގަޅު ޓްރެއިނިންގ ޕްރޮގްރާމްތަކުގައި ބައިވެރިވުމުގެ ފުރުޞަތު ނުލިބުން ކަމަށެވެ. އަދި ސްކޫލްތަކުގެ މުވައްޒަފުންނަށް ހިންގޭ ޕްރޮފެޝަނަލް ޑިވެލޮޕްމަންޓް ޕްރޮގްރާމްތައް އިތުރަށް ހަރުދަނާކުރުމަށް މިނިސްޓްރީން މަސައްކަތް ކުރައްވަމުން ގެންދަވާ ކަމަށްވެސް ވިދާޅުވިއެވެ.
އެހެންކަމުން މިނިސްޓަރ ވަނީ ސްކޫލުތަކުގެ އިސްވެރިންނާއި މުދައްރިސުން މި ކޯސްތަކުގެ ބޭނުން އެންމެ ފުރިހަމައަށް ހިފުމަށް އެދިވަޑައިގެންފައެވެ. މިއާއެކު މިނިސްޓަރ ވަނީ ރާއްޖޭގެ ސްކޫލުތަކުގައި ކިޔަވައިދެއްވާ މުދައްރިސުންނަށް މި ފުރުޞަތު ފަހިކޮށްދެއްވިކަމަށްޓަކައި، ގައިޑް އެޑިޔުކޭޝަންގެ ސީއީއޯ ލިއޯން ހާޑީ އަދި ގައިޑްގެ ޓީމަށް ވަރަށް ބޮޑަށް ޝުކުރު އަދާކުރައްވާފައެވެ.
ރާއްޖޭގެ ހުރިހާ ސްކޫލްތަކުގެ ޕްރިންސިޕަލުންނާ މުދައްރިސުންނަށް މި ކޯސްތަކުގައި ބައިވެރިވުމުގެ ފުރުޞަތު އޮންނާނެއެވެ.
