މަސްވެރިންގެ ދުވަހާއި ގުޅުވައިގެން 4 ރަށެއްގައި އައިސްޕްލާންޓް ހުޅުވަން ސަރުކާރުން ނިންމައިފިއެވެ.

ފިޝަރީޒް މިނިސްްޓްރީން ބުނީ ހުކުރު ދުވަހު މި ހަތަރު އައިސްޕްލާންޓް ހުޅުވުމަށް ހަމަޖެހިފައިވަނީ ރ. މަޑުއްވަރި، ކ. ގާފަރު، ހއ. ހޯރަފުށީގެ އިތުރުން ފެލިވަރުގައި ކަަމަށެވެ. މިނިސްޓްރީން ބުނީ ކ. ގާފަރާއި ރ. މަޑުއްވަރީގައި ހުޅުވުމަށް ހަމަޖެހިފައިވަނީ 25 ޓަނުގެ އައިސްޕްލާންޓެއް ކަމަށެވެ. ފެލިވަރުގައި ހުޅުވަނީ 50 ޓަނުގެ އައިސްޕްލާންޓެކެވެ. ހޯރަފުށީގައި 25 ޓަނެވެ.

ސަރުކާރުން ބުނީ މަސްވެރިންނަށް ދިމާވެފައިވާ އައިސް ލިބުމުގެ މައްސަލައަށް ހައްލެއް ހޯދުމަށް ރާއްޖޭގެ އެކި ކަންކޮޅުތަކުގައި އައިސްޕްލާންޓް ގާއިމުކުރުމުގެ މަސައްކަތް އެކި ފިޔަވަހިތަކަށް ބަހާލައިގެން ކުރިއަށްދާ ކަމަށެވެ. މި ހަތަރު އައިސްޕްލާންޓްގެ އިތުރުންވެސް އެހެން 15 އައިސްޕްލާންޓެއްގެ މަސައްކަތް ކުރިއަށްދާ ކަމަށް ވެސް ސަރުކާރުން ބުނެއެވެ.

މި މަޝްރޫއުތައް ނިމޭއިރު މަސްވެރިންނަށް ދިމާވެފައިވާ އައިސް ލިބިމުގެ މައްސަލައަށް ހައްލެއް ލިބި، މަސްވެރިން ބާނާ މަސް ތާޒާކަންމަތީ ބެހެއްޓުމަށާއި ރަނގަޅަށް ސްޓޯރ ކުރުމުގެ އިތުރުން ރާއްޖެއިން އެކްސްޕޯޓް ކުރާ މަހުގެ ކޮލެޓީ ދެމެހެއްޓުމަށް މަގު ފަހިވެގެންދާނެ ކަމަށް ސަރުކާރުން ބުނެއެވެ. ފިޝަރީޒް މިނިސްޓްރީން ވަނީ މަސްވެރިންގެ ފޯރަމެއް ވެސް ވަރަށް ފަހުން ބާއްފާފައެވެ. މި ފޯރަމްގައި އައިސް ޕްލާންޓް ނެތުމުގެ މައްސަލަޔާއި މަސްވެރިންނަށް ދިމާވާ އެނޫންވެސް އެކި ގޮންޖެހުންތަކުގެ ވާހަކަ ވަނީ ހިއްސާކޮށްފައެވެ.

އެގޮތުން މައިގަނޑު ގޮތެއްގައި މަޝްވަރާކޮށްފައިވަނީ މަސްވެރިކަމުގައި ހުރި ގޮންޖެހުން ތަކަށެވެ. މަސްވެރިންނަށް ހަމަ އަގު ހޯދައިދިނުމުގައި ހުރި ގޮންޖެހުންތަކަށާއި، މަތީ އަގު ލިބޭ ލިބޭ ޕްރިމިއަމް މާކެޓުތަކަށް ރާއްޖޭގެ މަސް ވިއްކުމަށް އޮތް ފުރުސަތު ހަނިވަމުންދާ މައްސަލައިގެ މައްޗަށާއި، ތެލުގެ އަގު އުފުލުމާއި، މަސްވެރިކަން ކުރުމުގެ ޚަރަދު ނިސްބަތުން ބޮޑުވުމުގެ މައްޗަށެވެ. މީގެއިތުރުން މަހުގެ ކޮލިޓީ ނިސްބަތުން އަދިވެސް ދަށް ކަމަށާއި މަސްވެރިން ބާނާ މަހުގެ ނިސްބަތުން ބޮޑު މިންވަރެއް، މަތީ އަގު ލިބޭ ގޮތަށް ޕްރޮސެސްނުކޮށް، ރޯ މެޓީރިއަލްގެ ގޮތުގައި އެކްސްޕޯޓް ކުރަން ޖެހިފައިވާ ޖެހުމުގެ މައްޗަށް ވެސް، ފޯރަމްގައި މަޝްވަރާ ކުރެވުނެވެ.