ހދ. ނޮޅިވަރަމުގެ އަންހެނުންނަށް ޚާއްސަކޮށްގެން އެރަށުގައި ކުރިއަށް ގެންދިޔަ ކަރަންޓް ވައިރުކުރަން ދަސްކޮށްދޭ ޕްރޮގްރާމް ނިންމާލައިފިއެވެ.

މި ޕްރޮގްރާމަކީ ނޮޅިވަރަމް އަންހެނުންގެ ތަރައްގީއަށް މަސައްކަތްކުރާ ކޮމެޓީއާއި އެރަށު ކައުންސިލް ގުޅިގެން ކުރިއަށް ގެންދިޔަ ޕްރޮގްރާމެކެވެ.

މިދިޔަ ނޮވެމްބަރު 25 އިން 30 އަށް، ނޮޅިވަރަމް ޒުވާނުންގެ ގުޅުމުގެ އިދާރާގައި ކުރިއަށްދިޔަ މި ޕްރޮގްރާމް ނޮޅިވަރަމްގެ 31 އަންހެނަކު ވަނީ ފުރިހަމަ ކޮށްފައެވެ.

ޕްްރޮގްރާމްގައި ދަސްކޮށްދިން ކަންކަމުގެ ތެރޭގައި އޮޓޯ ސްވިޗް ރަނގަޅު ކުރުމާއި، ޓޮޕް ގުޅުމާއި، ހޯލްޑަރު ގުޅުމާއި، ސޮކެޓް ގުޅުމާއި، ސްވިޗް މެދުވެރިކޮށް ބޮކި ދިއްލުމާއި، ކެޕެސީޓަރު ބަދަލުކުރުމާއި އަދި ރެގިއުލޭޓަރ ބަދަލުކުރުން ހިމެނެއެވެ.

މީގެއިތުރުން ސާކިޓް ވެއްޓޭ ހާލަތްތަކުގައި ކަންކުރާނެ ގޮތާއި، ކަރަންޓުގައި ޖެހިއްޖެނަމަ ކަންކުރާނެ ގޮތާއިބެހޭ މައުލޫމާތު ފޯރުކޮށްދީފަވެއެވެ.

މި ޕްރޮގްރާމް ފެސިލިޓޭޓްކޮށްދެއްވީ ނޮޅިވަރަމް ޒުވާނުންގެ ގުޅުމުގެ ދެ މެންބަރުންކަމަށްވާ ޔޫސުފް އަބުދުލްކަރީމާއި އަބުދުﷲ ޝަރީފެވެ.

މި ޕްރޮގްރާމަކީ ކާމިޔާބު ޕްރޮގްރާމެއްކަމަށާއި އެހީތެރިވި ފަރާތްތަކަށް ޝުކުރު އަދާކުރާ ކަމުގައި ކައުންސިލުން ބުނެއެވެ.