ގިނަ އަދަދެއްގެ ބަޔަކު އައްޑޫސިޓީން މިއަދު ކޮވިޑަށް ޕޮޒިޓިވް ވެއްޖެއެވެ. އައްޑޫ އިމަރޖެންސީ އޮޕަރޭޝަންސް ސެންޓަރ (އޭއީއޯސީ)ން އާއްމުކުރި ތަފާސް ހިސާބުތައް ދައްކާގޮތުން، މިއަދު ހަވީރު 6 ޖެހުމާ ހަމަޔަށް 51 މީހަކު އައްޑޫސިޓީން ވަނީ ކޮވިޑަށް ޕޮޒިޓިވް ވެފައެވެ. މިއީ އެއްދުވަހެއްގެ ތެރޭ އައްޑޫސިޓީން (މިފަހުގެ ތާރީޚެއްގައި) އެންމެ ގިނަ ބަޔަކު ކޮވިޑަށް ޕޮޒިޓިވްވީ ދުވަހެވެ.

މިއަދު ޕޮޒިޓިވްވި ކޭސްތަކަށް ބަލާއިރު ހިތަދޫން 21 މީހުން، މީދޫން 12 މީހުން، އަދި ފޭދޫން 14 މީހުން ޕޮޒިޓިވްވެފައިވެއެވެ. އޭގެ އިތުރުން މަރަދޫން 2 މީހުންނާއި މަރަދޫފޭދޫން އެކަކު، އަދި ހުޅުދޫން ވެސް އެކަކު މިއަދު ޕޮޒިޓިވް ވެފައިވެއެވެ.

މިފަހަކަށް އައިސް މެދުނުކެނޑި ކޮންމެ ދުވަހަކުވެސް އައްޑޫސިޓީން އަންނަނީ ގިނަ އަދަދަކަށް މީހުން ކޮވިޑަށް ޕޮޒިޓިވް ވަމުންނެވެ. މިސިޓީގެ އެކްޓިވް ކޭސްތަކުގެ އަދަދު 396އަށް އަރާފައިވާއިރު، މިމީހުންނާ ޑައިރެކްޓް ކޮންޓެކްޓްވީ މީހުންގެ އަދަދުވެސް ވަނީ 245އަށް އަރާފައެވެ. ކޮވިޑްގެ ހާލަތު މިވަގުތު އެންމެ ގޯހީ ހިތަދޫ ގައެވެ. ހިތަދޫގައި ކޮވިޑަށް ޕޮޒިޓިވް ވެފައިވާ 224 މީހުން އެބަތިއްބެވެ.

މިދިޔަ އޮކްޓޯބަރ މަހުން ފެށިގެން އައްޑޫވަނީ މޮނިޓަރިންގައެވެ. އެގޮތުން އަޅާފައިވާ ފިޔަވަޅެއްގެ ގޮތުން ކޮންމެ ރެއަކު 9ން ފަތިހު 4އަށް ބޭރަށް ނުކުމެއުޅުން މަނާކޮށްފައިވެއެވެ. މި ދުވަސްވަރު އައްޑޫގައި ކޮވިޑަށް ގިނަ ބަޔަކު ޕޮޒިޓިވް ވަމުން ދިޔަކަމުގައިވިއަސް، މިއަހަރުގެ ޖުމްހޫރީ ދުވަހާ ގުޅިގެން އައްޑޫގައި ގައުމީ ފެންވަރުގެ މުބާރާތްތަކާއި ބައިނަލްއަގުވާމީ މުބާރާތްތައް ދަނީ ބާއްވަމުންނެވެ. ހަރުކަށި ފިޔަވަޅުތަކަށް ލުއިދީގެން ތިއްބަސް ފެތުރެމުންދާ ބައްޔެއް އޮތްތަނެއްގައި ބަލިފެތުރުން ކޮންޓްރޯލްކުރުމަށް ފިޔަވަޅު އެޅުމަކީ މުހިއްމު ކަމެއް ކަމަށް ގިނަބަޔަކު ދެކެއެވެ.

ގިނަ ބަޔަކު އެއްވެ ކުޅިވަރުކުޅުމާއި އެހެނިހެން ކަންކަމުގައިވެސް އުޅެމުންދާއިރު، ގައިދުރުކަމަށާއި މާސްކް އެޅުމަށް މިހާރަކަށް އައިސް ސަމާލުކަން ދޭތަނެއް ނުފެނެއެވެ. މިއަދުވެސް އައްޑޫސިޓީ ހިތަދޫއަށް ލެއްގި ބޮޑުމަސް ބަލަން ވެސް އެތައް ބަޔަކު އެއްވިއިރު، މިއިން ކަމަކަށް އިސްކަން ނުދޭކަން ފާހަގަވިއެވެ. މިހާރުވެސް ވައިރަލް ހުން ފަދަ ބަލިތައް ފެތުރެމުން އަންނަ އިރު، މިފަދަ ކޮންމެ އެއްވުމަކާއެކު ގިނަބަޔަކަށް ބަލިފެތުރުމުގެ ފުރުސަތު ބޮޑެވެ. ނަމަވެސް އައްޑޫސިޓީ ކައުންސިލުން މިކަމަށް އެކަށީގެންވާ ފިޔަވަޅު އަޅަމުން ނުދާކަމަށްބުނެ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.