"ހޭންޑީ ހާޑް 2" ނަމަކަށް ކިޔާ ދޯންޏެއް، މާލޭ ދެކުނު ފަރާތުގައި އަލަށް ކަނޑާފައިވާ ނެރުމައްޗަށް އެރުމާ ގުޅިގެން، އެމްއެންޑީއެފް މާލޭ އޭރިއާ ކޯސްޓްގާޑު ސްކޮޑްރަން އިން އެހީތެރިކަން ފޯރުކޮށްދީފިއެވެ.

 އެމްއެންޑީއެފްގެ މީޑިއާ އޮފިޝަލް ވިދާޅުވީ މި ހާދިސާގެ މަޢުލޫމާތު ރޭ 7:15  ހާއިރު، އެމްއެންޑީއެފް މެރިޓައިމް ރެސްކިޔު ކޯޑިނޭޝަން ސެންޓަރަށް ލިބުމާ ގުޅިގެން، އެމްއެންޑީއެފް މާލޭ އޭރިއާ ކޯސްޓްގާޑު ސްކޮޑްރަންގެ ޑައިވަރުންގެ ޓީމެއް އެ ސަރަޙައްދަށް ދިޔަ ކަމަށެވެ.

އެގޮތުން އެ ދޯނީގެ އަޑިން ފަޅައިގެން ގޮސްފައިވާ ތަނުގައި ސަތަރި އަޅައިދީ، ބުރާސްފަތި ދުވަހުގެ ރޭ 8:30 ހާއިރު، ދޯންޏަށް ދިޔަވުން ކޮންޓްރޯލް ކޮށްދީފައިވާ ކަމަށް އޮފިޝަލް ވިދާޅުވިއެވެ.

އެ ދޯނީގެ ދިޔަގަނޑު ކޯސްޓްގާޑުގެ ޑައިވަރުން ކޮންޓްރޯލް ކޮށްފައިވަނީ، ދޯނީގެ ވެރިފަރާތުން ކުރި މަސައްކަތުން އެ ދޯނި  ފުންކުރި ފަހުން ކަމަށް ވެސް އޮފިޝަލް ވިދާޅުވިއެވެ.