ތިންވަނަ އިންޓަ އޮފީސް ޗެސް ޗެމްޕިއަންޝިޕް 2021 ގެ ކުޅުން ފަށައިފިއެވެ.

މި މުބާރާތުގެ ކުޅުން ފަށާފައިވަނީ ބުރާސްފަތި ދުވަހުގެރެއެވެ. މުބާރާތް ހުޅުވައިދެއްވުމަށްފަހު މޯލްޑިވްސް ޗެސް އެސޯސިއޭޝަނުގެ ރައީސް ވިދާޅުވީ އެހެން އަހަރުތަކުގައި ބޭއްވި މުބާރާތްތަކާ ޚިލާފަށް މި އަހަރުގެ މުބާރާތުގައި ބައިވެރިވި ކުޅުންތެރިންގެ އަދަދު އިތުރު ކަމަށާއި، އަދި މުބާރާތުގައި ޕްރޮފެޝަނަލް ކުޅުންތެރިއަކު ބައިވެރިވާ ކަމަށެވެ. އެހެންކަމުން މިއީ ރާއްޖޭގައި ރާޒުވާ ކުރިއެރުވުމަށް ލިބުނު ބޮޑު ކުރިއެރުމެއް ކަމަށްޗެސް ވިދާޅުވިއެވެ.

މި އަހަރުގެ އިންޓަ އޮފީސް ރާޒުވާ މުބާރާތުގައި 18 އޮފީހަކުން 100 އަށްވުރެ ގިނަ ކުޅުންތެރިން ވަނީ ބައިވެރިވެފައެވެ. މި މުބާރާތް ކުރިއަށްދާނީ ބުރާސްފަތި ދުވަހުން ފެށިގެން ހޮނިހިރު ދުވަހުގެ ނިޔަލަށެވެ. މި މުބާރާތުގެ މެޗުތައް ކުޅެވިގެންދާނީ ހުޅުމާލޭ ޗެސް އާކެޑުގައެވެ.

މި މުބާރާތުގެ އެއްވަނައަށްދާ ކުޅުންތެރިއަކަށް 10،000 ރުފިޔާގެ ފައިސާގެ އިނާމެއް ދިނުމަށް ހަމަޖެހިފައިވާއިރު، ދެވަނައަށްދާ ކުޅުންތެރިޔާއަށް 7،000 ރުފިޔާ ދިނުމަށް ވަނީ ހަމަޖެހިފައެވެ. އަދި ތިންވަނައަށްދާ ކުޅުންތެރިޔާއަށް 3،000 ރުފިޔާ ވަނީ ކަނޑައަޅާފައެވެ.

މީގެ އިތުރުން ބޯޑް ޕްރައިޒްގެ ގޮތުގައި އެއްވަނައަށްދާ ބޯޑަކަށް 4،000 ރުފިޔާ ދޭއިރު، ދެވަނަ ބޯޑަށް 3،000 ރުފިޔާ ދިނުމަށް ވަނީ ހަމަޖެހިފައެވެ. އަދި ތިންވަނަ ބޯޑަށް 2،000 ރުފިޔާ އަދި ހަތަރުވަނަ ބޯޑަށް 1،000 ރުފިޔާ ދިނުމަށްވެސް ވަނީ ކަނޑައަޅާފައެވެ.