ސައުދީ އަރަބިއްޔާގައި ކޮވިޑް-19ން ރައްކާތެރިވުމަށް އަޅާފައިވާ ހަރުކަށި ބައެއް ފިޔަވަޅުތައް އުވާލައި، މަސްޖިދުލް ހަރަމާއި މަސްޖިދުލް ނަބަވީގައި ވަކި ކޮންޓްރޯލް އަދަދެއް ނެތި ނަމާދުކުރުމުގެ ހުއްދަ ދީފިއެވެ.
މިއީ ސައުދީގައި މިހައި ބޮޑަށް ލުއި ދިން ފުރަތަމަ ފަހަރެވެ. ބޭރުގެ މީޑިއާތަކުގައި ރިޕޯޓު ކޮށްފައިވާ ގޮތުގައި އާދިއްތަ ދުވަހުގެ ފަތިސް ނަމާދުން ފެށިގެން ނަމާދު ކުރަމުންދަނީ ގައިދުރުކަމަކާ ނުލައެވެ. އަދި މާސްކް އެޅުން ވެސް މަޖުބޫރޫ ކޮށްފައެއް ނުވެއެވެ. މީގެ އިތުރުން ކައުބަތުﷲ ގެފުޅު ހުންނަ މަސްޖިދުލް ހަރަމާއި މަދީނާގައި ހުންނަ ކީރިތި ރަސޫލާގެ މިސްކިތް މަސްޖިދުލް ނަބަވީގައި ވަކި ކޮންޓްރޯލް އަދަދެއް ނެތި އެންމެނަށް ވެސް ނަމާދު ކުރުމުގެ ފުރުސަތު ވަނީ ހުޅުވާލާފައެވެ.
ސައުދީގެ އިންޓީރިއާ މިނިސްޓްރީއާ ހަވާލާދީ ރިޕޯޓުކޮށްފައިވާ ގޮތުގައި ކޮވިޑް-19ގެ ހާލަތަށް ބެލުމަށްފަހު ގައުމު ހުޅުވާލުމަށް ދަނީ މަސައްކަތް ކުރަމުންނެވެ. ވެކްސިން ފުރިހަމަކޮށްފައިވާ މީހުންނަށް ބޮޑެތި ލުއިތައް ލިބިގެންދާނެއެވެ. ވެކްސިން ޖަހާފައިވާ މީހުންނަށް މާސްކް އެޅުން މަޖުބޫރު ނުކުރި ނަމަވެސް އުމްރާގެ އަޅުކަމަށް ދާ މީހުން މާސްކް އަޅަން މަޖުބޫރުވާނެއެވެ.
ކަމާބެހޭ މާހިރުން ވިދާޅުވާ ގޮތުގައި ސައުދީގައި ވަނީ ކޮވިޑް-19 ވަރަށް ބޮޑަށް ކޮންޓްރޯލް ކުރެވިފައެވެ. ނަމަވެސް ހާލަތަށް ބެލުމަށްފަހު ބައެއް ބަދަލުތައް ގެންނަން ޖެހޭނެ ކަމަށް ވިދާޅުވެފައިވެއެވެ. އަދި ކުރިއަށް އޮތްތަނުގައި އުސޫލުތައް ބަދަލުކުރަމުންދާނީ ކޮވިޑް ފެތުރޭ ސަރަހައްދުތަކުގައި އެކަނި ކަމަށް ސައުދީގެ ސަރުކާރުން ބުނެފައިވެއެވެ.
ކޮވިޑް-19އާ ގުޅިގެން ސައުދީގައި ހަރުކަށި ފިޔަވަޅުތަކެއް އަޅާފައިވެއެވެ. ކޮވިޑް-19ގެ ސަބަބުން ހައްޖުގެ އަޅުކަން ކުރެވޭ މީހުން ސައުދީ ސަރުކާރުން މަދުކޮށްފައިވެއެވެ. މީގެ ކުރިން ކޮންމެ އަހަރަކު ހައްޖުގެ އަޅުކަން އަދާކުރުމަށް 2.5 މިލިއަން މުސްލިމުން ސައުދީއަށް ދެއެވެ.
