އަނިޔާވެރިގޮތަކަށް ޔޫކެގެ މަޖިލިސް މެމްބަރު ޑޭވިޑް އެމެސް އަވަހާރަ ކޮށްލި އަމަލަކީ ޓެރަރިޒަމްގެ އަމަލެއްކަމަށް އެ ގައުމުގެ ފުލުހުން ބުނެފިއެވެ.
އުމުރުފުޅުން 69 އަހަރުގެ ޑޭވިޑް އެމެސް އަވަހާރަކޮށްލާފައިވަނީ ކްރިސްޓިއަނުންގެ ފައްޅިއެއްގެ ތެރޭގައި ބައްދަލުވުމެއްގައި ހުންނަވަނިކޮށް އެތައް ފަހަރެއްގެ މަތިން ވަޅި ހަރައި ކަމަށް ރިޕޯޓުކޮށްފައިވެއެވެ. އޭނާއަށް އެމަރޖެންސީކޮށް ފަރުވާ ދެމުންދަނިކޮށް އަވަހާރަވެފައިވަނީ ހުކުރު ދުވަހުގެ ވަގުތެއްގައެވެ.
އެމެސް އަވަހާރަވުމާއި ގުޅިގެން ޔޫކޭގެ މަޖިލިސް މެމްބަރުން ގެންދަވަނީ ތައުޒިޔާ ވިދާޅުމުންނެވެ. އަދި އެމެސްގެ ހަނދާނުގައި އެގައުމުގެ ބޮޑުވަޒީރުގެ އޮފީހުގައި ހުރި ދިދަ ވެސް ވަނީ ތިރިކޮށްފައެވެ.
އެމެސްއަކީ އެ ގައުމުގެ ބޮޑުވަޒީރު ބޯރިސް ޖޯންސަން ނިސްބަތްވެވަޑައިގަންނަވާ ކޮންޒަވޭޓިވް ޕާޓީގެ ބޭފުޅެކެވެ.
އޭނާ އަވަހާރަކޮށްލި މައްސަލަ މިހާރު ތަހުގީގު ކުރަމުންދަނީ ފުލުހުންގެ ކައުންޓަރ ޓެރަރިޒަމް ޔުނިޓުންކަމަށް ނޫސްތަކުން ރިޕޯޓު ކޮށްފައިވެއެވެ. އަދި އެ ޔުނިޓުން މިހާރު ވަނީ މި ހަމަލާއަކީ ޓެރަރިސްޓު ޙަމަލާއެއްކަމަށް ކަނޑައަޅާފައެވެ. އަދި މި ހަމަލާ ގޮސް ގުޅެނީ ދީނީގޮތުން ހަރުކަށި ފިކުރާ ކަމަށްވެސް ފުލުހުން ވަނީ ބުނެފައެވެ.
މި މައްސަލައާއި ގުޅިގެން 25 އަހަރުގެ ފިރިހެނަކު ވަނީ ހައްޔަރުކޮށްފައެވެ. ސިޔާސީ އެކި ފަރާތްތަކުންވެސް ގެންދަނީ މި ޙަމަލާއަކީ އެ ގައުމުގެ ޑިމޮކްރަސީ ފުނޑާލުމުގެ އަމާޒުގައި ދީފައިވާ ހަމަލާއެއްގެ ގޮތުގައި ސިފަކުރައްވަަމުންނެވެ.
