ފިލިޕީންސްއަށް ރިކްޓަރ މިންގަނޑުން 5.7 ގެ ބާރުމިނުގައި ބިންހެލުމެއް އަތުވެއްޖެއެވެ.
ބިންހެލުން އައިސްފައިވަނީ އެގައުމުގެ ވެރިރަށް މެނީލާގެ ކައިރިން ބަޓަންގަސް ޕްރޮވިންސަށެވެ. މިއީ ލޫޒޮން ޖަޒީރާގައިވާ ޕްރޮވިންސެކެވެ. ލޫޒޮންއަކީ ވެރިރަށްވެސް ހިމެނޭގޮތުން މުޅިއެކު 30 ޕްރޮވިންސް ހިމެނޭ ޖަޒީރާއެކެވެ. އެއީ ފިލިޕީންސްގެ އެންމެ ބައިބޯ ޖަޒީރާވެސްމެއެވެ.
ފިލިޕީންސްގެ ސީސްމޮލޮގިކަލް އޭޖެންސީއާ ހަވާލާދީ ނޫސްތަކުން ބުނެފައިވަނީ ބިންހެލުން އައިސްފައިވަނީ 98 ކިލޯ މީޓަރު ބިމުގެ އަޑިން ކަމަށެވެ.
މިފަހަރުގެ ހެލުމާ ގުޅިގެން ލިބުނު ގެއްލުންތަކާ ބެހޭ މާގިނަ މައުލޫމާތެއް އަދި ނުލިބެއެވެ. ބިމުގެ އެހާ އަޑިން އުފެދޭ ބިންހެލުންތަކުން އާއްމުގޮތެއްގައި މާ ބޮޑު ގެއްލުމެއް ނުވެއެވެ.
