މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި ސަރުކާރުގެ ކުންފުނިތަކުން ރާއްޖޭގެ ތަރައްގީއަށްޓަކައި ކުރަމުންދާ މަސައްކަތްތަކަށް ޝުކުރު ހައްގުކަމަށް ނާއިބުރައީސް ފައިސަލް ނަސީމް ވިދާޅުވެއްޖެއެވެ.

ނާއިބުރައީސް އެހެން ވިދާޅުވީ، އެމްޕީއެލްގެ 35 ވަނަ އަހަރީދުވަސް ފާހަގަ ކުރުމަށް ހުކުރު ދުވަހުގެރޭ ބޭއްވި ޚާއްސަ ޖަލްސާގައި ވާހަކަ ދައްކަވަމުންނެވެ.

ނާއިބުރައީސް ވިދާޅުވީ، ސަރުކާރުގެ ކުންފުނިތަކުން ރާއްޖޭގެ ތަރައްގީއަށްޓަކައި ގިނަގުނަ މަސައްކަތްތަކެއް ކުރަމުންދާ ކަމަށެވެ. އެގޮތުން ކޮވިޑް-19 ގެ އެންމެ އުނދަގޫ ހާލަތުގައިވެސް ތަރައްގީއަށްޓަކައި ކުރަމުންދިޔަ މަސައްކަތްތަކަށް މަޑުޖެހުމެއް އައިސްފައިނުވާކަން ފާހަގަ ކުރެއްވިއެވެ. ނާއިބުރައީސް ވިދާޅުވީ، ރައްޔިތުންނަށް ފޯރުކޮށްދޭ ޚިދުމަތްތައް ފުޅާކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ އިރުޝާދުގެ ދަށުން ކުންފުނިތަކުންވެސް ގިނަ މަސައްކަތްތަކެއް ކޮށްފައިވާ ކަމަށެވެ.

ނާއިބުރައީސް ވަނީ އެމްޕީއެލްއިން ރާއްޖޭގެ އެކި ކަންކޮޅުތަކުގައި ކުރަމުންގެންދާ މަސައްކަތްތަކަށްވެސް އަލިއަޅުވާލައްވާފައެވެ. އެގޮތުން ކޮވިޑުގެ ހާލަތުގައި ގައުމަށް އެންމެ ދަތި ދަނޑިވަޅުތަކުގައި އެމްޕީއެލްއާއި ސަރުކާރުގެ ކުންފުނިތަކުން ކޮށްފައިވާ ބުރަ މަސައްކަތް ފާހަގަކުރައްވައި އެކަމަށް ޝުކުރު އަދާ ކުރެއްވިއެވެ.

ރައީސް ސާލިހު އެންމެ އިސްކަމެއް ދެއްވާ ކަމަކީ ޒުވާނުން ބިނާކުރުންކަން ފާހަގަ ކުރައްވައި ނާއިބުރައީސް ވިދާޅުވީ، ފުދުންތެރިކަން އިތުރުކުރުމަށްޓަކައި ދިވެހިންގެ ހުނަރު ކުރިއަރުވައި ތަރައްގީކުރުމަށް ރައީސް ސާލިހު މަސައްކަތް ކުރައްވާކަމަށެވެ. އެގޮތުން ސަރުކާރުން އެންމެ ބޮޑު ހޭދައެއް ކުރާ ދާއިރާއަކީވެސް މީހުން ބިނާ ކުރުމުގެ ދާއިރާކަމަށް ވިދާޅުވިއެވެ. އަދި އިންސާނީ ވަސީލަތްތައް އިތުރު ކުރުމުގެ މުހިއްމުކަމަށްވެސް ނާއިބުރައީސްގެ ވާހަކަފުޅުގައި އަލިއަޅުވާލައްވާފައިވެއެވެ.

އޭގެ އިތުރުން، ކޮވިޑް-19 ގެ ހާލަތު ބަދަލުވެ، އައު އާންމު ހާލަތަކަށް ދާއިރުވެސް ފަރުވާތެރިވާން ޖެހޭ ކަންކަން ހުރިކަން ފާހަގަ ކުރައްވައި ނާއިބުރައީސް ވިދާޅުވީ، މިހާރު އަޅާފައިވާ ރައްކާތެރިކަމުގެ ފިޔަވަޅުތަކާ އެއްގޮތަށް އެންމެންވެސް އުޅުން ބަހައްޓަންޖެހޭ ކަމަށެވެ. ކުރިއަށް އޮތް ތަނުގައިވެސް ޚަރަދު ކުޑަކޮށް، އިސްރާފު ކުޑަ ކުރުންފަދަ ކަންކަމަށް ވިސްނައި ދިރިއުޅުން ބައްޓަން ކުރުމަށް ނާއިބުރައީސް ވަނީ ހަނދާން ކޮށްދެއްވާފައެވެ.

ނާއިބުރައީސް ވިދާޅުވީ، ޚިޔާލު ތަފާތުވުންތަކާއެކުވެސް އެންމެން އެކުގައި މަސައްކަތް ކޮށްގެން ގައުމު ހިންގުމަށް މަސައްކަތް ކުރަން ޖެހޭ ކަމަށެވެ.