ހުޅުމާލޭގެ އެޕާޓްމަންޓެއް ބަލާ ފާސް ކުރިއިރު، 17 ކިލޯގެ މަސްތުވާތަކެތި ފެނިއްޖެ އެވެ.

ފުލުހުން މައުލޫމާތު ދެމުން ބުނީ، ހުޅުމާލޭގެ ފޭސް 2 ގައި ހުންނަ އެމްޕީއެލްގެ ޓަވަރެއްގެ ފްލެޓަކުން މަސްތުވާތަކެތި ފެނުނީ، ފިރިހެނަކަށް އަނިޔާކުރާ އަޑު އިވޭ ކަމަށް ބުނެ މިދިޔަ އާދިއްތަ ދުވަހުގެ ރޭ ދަންވަރު ލިބުނު ރިޕޯޓަކާ ގުޅިގެން އެތަނަށް ވަދެ ފާސް ކުރިއިރު ކަމަށެވެ.

އެ އެޕާޓްމަންޓުން ފެނުނު މަސްތުވާތަކެތި ކަމަށް ބެލެވޭ ތަކެތީގެ ވަގުތީ ބަރުދަނުގައި 17.39 ކިލޯ ހުރި ކަމަށް ފުލުހުން ބުންޏެވެ.

މި މައްސަލައާ ގުޅިގެން އެ ވަގުތު އެ އެޕާޓްމަންޓުގައި ހުރި މީހާ ހައްޔަރުކޮށްފައިވާ ކަމަށް ފުލުހުން ބުންޏެވެ. ހައްޔަރުކުރީ ދަފްތަރު ނަންބަރު 1786، މުހައްމަދު ޖަޒުލާން އަޝްރަފް ކަމަށް ފުލުހުން ހާމަކުރި އެވެ.

އޭނާގެ ބަންދާ މެދުގައި ގޮތެއް ނިންމުމަށް ކޯޓަށް ހާޒިރު ކުރުމުން، ޝަރީއަތް ނިމެންދެން އޭނާ ބަންދުގައި ބެހެއްޓުމަށް ކޯޓުން އަމުރު ކޮށްފައިވާ ކަމަށް ފުލުހުން ބުންޏެވެ.

ފުލުހުން ބުނި ގޮތުގައި، އެޕާޓްމަންޓަށް ފުލުހުންގެ ޓީމު ވަން އިރު، ޖަޒުލާން ފިޔަވައި އިތުރު މީހަކު އެ ތަނުގައި ނެތެވެ. އެކަމަކު، އެޕާޓްމަންޓުގެ ތެރޭގައި ހުރި ތަކެއްޗަށް ގެއްލުންދީ، ހަމަނުޖެހުން ހިންގާފައިވާކަން ފާހަގަކުރެވުނު ކަމަށް ފުލުހުން ބުންޏެވެ. މިއީ އެތަނުގައި ހަމަނުޖެހުމެއް ހިނގާފައިވާކަން ދައްކައިދޭ ކަމަކަށްވާއިރު، އެއީ ފުރަތަމަ ލިބުނު ރިޕޯޓުގައި ބުނެފައިވާ އަނިޔާކުރުމުގެ މައްސަލައާ ގުޅިފައިވާ ކަމެއްތޯ ވެސް ފުލުހުން ބަލަމުންދެ އެވެ.

ފުލުހުން ބުނީ މި މައްސަލަ ޑްރަގް އެންފޯސްމަންޓާއި ހުޅުމާލެ ޕޮލިސް ގުޅިގެން ތަހުގީގުކުރަމުންދާ ކަމަށެވެ.

މި މައްސަލައަކީ ރާއްޖޭގައި މަސްތުވާތަކެތީގެ މައްސަލަ ދުވަހުން ދުވަހަށް ބޮޑުވަމުންދާކަން ދައްކައިދޭ އިތުރު ހެއްކެކެވެ. ހާއްސަކޮށް ހުޅުމާލެ ސަރަހައްދުގައި މަސްތުވާތަކެތީގެ މައްސަލަތައް އިތުރުވަމުންދާކަން ފާހަގަކުރެވެ އެވެ.