ރާއްޖެއިން މިއަހަރު ހައްޖަށް މީހުން ގެންދިއުމުގެ ހުއްދަ ދޭނެ ގުރޫޕްތައް ކަނޑައެޅުމަށް ބިޑް ހުޅުވާ ނުލަނީސް ކޯޓާ ދޭނެ ގުރޫޕްތަކެއް ނިންމާފައިވާ ކަމަށާއި ރައީސް ޔާމީން ގާތަށް ދިޔަޔަސް ވެސް ދެން ކޯޓާއެއް ނުދޭނެ ކަމަށް ބުނެ އިސްލާމިކް މިނިސްޓްރީގެ އޮފިޝަލެއް ކަމަށް ބެލެވޭ މީހަކު ވާހަކަ ދައްކާ އޯޑިއޯއެއް ލީކުވެއްޖެއެވެ.

ރާއްޖެ އެމްވީއަށްވެސް ލިބިފައިވާ އެއޯޑިއޯގައި އެބޭފުޅާ ވިދާޅުވެފައި ވަނީ މިފަހަރުވެސް ހައްޖަށް މީހުން ގެންދާނެ ފަސް ގުރޫޕެއް މާކުރިން ނިންމާފައިވާ ކަމަށެވެ. އަދި ސުވާލު ކުރާ މީހަކު ދެން ބިޑް ކުރަނީ ކީއްކުރަންތޯ އޭނާ ގާތު އެހުމުން ބިޑަށް ވެސް ހުޅުވާލާނެ ކަމަށް ވިދާޅުވެއެވެ.

ހައްޖު ކޯޓާއާ ބެހޭ ގޮތުން ވާހަކަ ދައްކާފައިވާ އޯޑިއޯގައި އޭނާ ވިދާޅުވާ ގޮތުގައި ކުރިން ފަހަރު ބިޑް ވިއްކީ 10 ހާހަށް ކަމަށާއި ނަމަވެސް މިފަހަރު ބިޑް ވިއްކާނީ ވެސް 20 ހާހަށެވެ. 

މީގެ އިތުރުން މިފަހަރު ބިޑް ވިއްކާނީ ބޭންކް ގެރެންޓީގެ ގޮތުގައި 50 ޕަސެންޓް ފައިސާ ބެހެއްޓުމުން ކަމަށް ހަދާނެ ކަމަށާއި އެއީ ގާތްގަނޑަކަށް ތިން މިލިއަން ނުވަތަ ހަތަރު މިލިއަން ރުފިޔާ ކަމަށް ވެސް އޭނާ ވިދާޅުވެއެވެ. 

ހައްޖަށް މީހުން ގެންދާނެ ފަސް ގުރޫޕެއް ކަނޑައަޅާފައި އޮތް އިރު ކޮންމެހެން ބިޑް ކުރަނީ ކީއްކުރަންތޯ ސުވާލު ކުރާ މީހާ އެހުމުން އޮފިޝަލް ކަމަށް ބެލެވޭ މީހާ ވަކިއެއްޗެއް ވިދާޅު ނުވެ އޭނާ ވިދާޅުވަނީ ކުރީ ފަހަރު ވެސް މީހަކު ބިޑް ހުށަހަޅަން އައިރު އެއޮފިޝަލާ އެވާހަކަ ދައްކާފައި ނުވާ ކަމަށެވެ. ބެލެވޭ ގޮތުގައި އެގޮތައް އޭނާ ކަންކުރުމުން އޮފިޝަލްކަމަށް ބެލެވޭ މީހާ ވަނީ އޭނާ ދެކެ ހިތްހަމަޖެހިވަޑައިނުގެންފައެވެ. އެގޮތަށް ވާހަކަ ނުދައްކައި ބިޑް ހުށަހެޅި މީހާ އަށް ދެން ހުއްދަ ނުދޭނެ ކަމަށް ވެސް އޯޑިއޯގައި ބުނެއެވެ. އަދި "މެޑަމް ކައިރިއަށް ގޮސްގެން ވެސް ހައްޖު ކޯޓާ ހޯދާނެ ކަމަށް" އެމީހަކު ބުނެފައިވާ ކަމަށް ވެސް އެ އޯޑިއޯގައި އޮފިޝަލް ކަމަށް ބެލެވޭ މީހާ ވިދާޅުވެފައި ވެއެވެ.

އެކަމަށް ރައްދު ދެއްވައި އޮފިޝަލް ކަމަށް ބެލެވޭ މީހާ ހުތުރުބަހުން އެމީހާ އަށް ނިސްބަތްކުރެއެވެ. އަދި މެޑަމް ނުވަތަ ރައީސް އަބްދުﷲ ޔާމީން ގާތަށް ދިޔަޔަސް އެކަން ހަމަނުޖެހޭނެ ކަމަށް ބުނެ ހަޑިއެއްޗެއް ވިދާޅުވެފައިވާނޭ ކަމަށް ބުނެއެވެ.

މިއޯޑިއޯ ލީކުވެފައިވާއިރު މިއޮފިޝަލް ކަމަށް ބެލެވޭ މީހާގެ އިތުރު އޯޑިއޯއެއް ވެސް ވަނީ ރާއްޖެ އެމްވީއަށް ލިބިފައެވެ. އެއޯޑިއޯއިން ދޭހަވާ ގޮތުގައި އެއީ އުމުރާ ގުރޫޕްތައް ހެދުމުގައި އެއޮފިޝަލްގެ ނުފޫޒް ފޯރުވާ ކަމަށް ބުނާ އޯޑިއޯއެކެވެ.

އެއޯޑިއޯގައި އެބޭފުޅާ ވިދާޅުވާ ގޮތުގައި އެބޭފުޅާ ބޭނުން ބަޔަކަށް އުމުރާއަށް މީހުން ގެންދާ ގުރޫޕްތައް ހަދައިދޭ ކަމަށާއި މިހާރު ވެސް "ހިޔަލީ" ކިޔާ މީހަކަށް ހަތަރު ގުރޫޕް ހަދައިދީފައިވާނޭ ކަމަށް ވިދާޅުވެއެވެ. 

އެއޯޑިއޯގައި އެބޭފުޅާ ވިދާޅުވާ ގޮތުގައި އިތުރު މީހަކަށް ވެސް މިހާރު ގުރޫޕެއް އެބަ ހައްދަވައިދެއްވައެވެ. އަދި މިފަހަރުގެ ގުރޫޕްތައް ހެދުމަށް ވެސް ކުއްލިއަކަށް (ޓަސް ކިޔާފައި) އިއުލާން ކުރެއްވީ ކަމަށާއި އެބޭފުޅާ ބޭނުންވެއްޖެ ނަމަ ގްރޫޕްތައް ހެދޭނެ ކަމަށް އެއޯޑިއޯގައި ވިދާޅުވެއެވެ.

އުމުރާ ގުރޫޕެއް ގެންގުޅޭ މީހެއް ކަމަށް ބެލެވޭ މީހަކު އޭނާގެ ގުރޫޕް ވެސް މިފަހަރު ހިމެނޭނެތޯ ބުނުމުން އިސްލާމިކް މިނިސްޓްރީގެ އޮފިޝަލެއް ކަމަށް ބެލެވޭ ބޭފުޅާ ވިދާޅުވަނީ އަދި ހުރިހާ ގުރޫޕްތަކެއްގެ ހުއްދަ ބާތިލް ކުރައްވާނެ ކަމަށެވެ. އަދި އެންމެންގެ ހުއްދަ ބާތިލް ކުރައްވުމުން ދެން ކުރިމަތި ލެވޭނީ ފަސް ލައްކަ ރުފިޔާގެ ބިޑް ގެރެންޓީއެއް ބަހައްޓައިގެން ޕްރޮޕޯސަލް ހުށަހަޅާ ފަރާތްތަކަށް އެކަނި ކަމަށް ވެސް އޮފިޝަލް ކަމަށް ބެލެވޭ މީހާ ވިދާޅުވެއެވެ.

އެބޭފުޅާ ވިދާޅުވާ ގޮތުގައި މިހާރު ހުއްދަތައް ހުޅުވާލާފައި ވަނީ ހަނދުބަލާމަހާ ހަމައަށް ގުރޫޕްތަކަށް ހުއްދަދޭން ވެގެން ކަމަށެވެ. އަދި ހުއްދަ ދިނުމަށް ފަހު އެބޭފުޅާ ބޭނުން ގޮތަކަށް ހައްދަވާނެ ކަމަށް ވެސް ވިދާޅުވެއެވެ.

މި އޯޑިއޯ ލީކްވެފައިވާ އިރު މި އަހަރުގެ ހައްޖު ކޯޓާ ދޭނެ ފަރާތްތައް އިސްލާމިކް މިނިސްޓްރީން ވަނީ މިހާރު ކަނޑައަޅާފައެވެ. އެ ގޮތުން ރާއްޖެ އަށް މިވަގުތު ލިބިފައިވާ 1،000 ކޯޓާގެ ތެރެއިން 500 ކޯޓާ ކަނޑައަޅާފައި ވަނީ ހައްޖު ކޯޕަރޭޝަނަށެވެ. އަނެއް 500 ޖާގަ ކޮންމެ ކުންފުންޏަކަށް 100ގެ މަގުން ދީފައި ވަނީ ދަރުމަ ލިލް ޙައްޖި ވަލްޢުމްރަތި ޕްރައިވެޓް ލިމިޓެޑާއި، އަލްޙަރަމައިން ޙައްޖު އެންޑް ޢުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑް، ކިސްވާ ޕްރައިވެޓް ލިމިޓެޑް، ސިސިލްފަރު ޙައްޖު އެންޑް ޢުމްރާ ގްރޫޕް ޕްރައިވެޓް ލިމިޓެޑްގެ އިތުރުން ޒަޢީ ޙައްޖު ގްރޫޕް ޕްރައިވެޓް ލިމިޓެޑަށެވެ.