ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މާލެ ވަޑައިގަތުމަށް ހުރަސް ނާޅުއްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

ރައީސް ވިދާޅުވީ، ބޭނުންފުޅުވެވަޑައިގަންނަވަނީ ވީހާ ވެސް އަވަހަކަށް ރައީސް ނަޝީދު ފަރުވާއިން ސަލާމަތްވެ، ހަމަޖެހިގެން ރާއްޖޭގައި އުޅުއްވާތަން ދެކެވަޑައިގަތުމަށް ކަމަށެވެ. މެއި 6 ގެ ހަމަލާއަކީ ވަރަށް ދެރަ މައްސަލައެއް ކަމަށާއި ނަޝީދު އަނބުރާ މާލެ ވަޑައިގަތުމަށް އެދިވަޑައިގަންނަވާ ކަމަށް ރައީސް ވިދާޅުވިއެވެ. ރައީސް އިތުރަށް ވިދާޅުވީ އެކަމަކަށް ހުރަހެއް ނާޅުއްވާނެ ކަމަށާއި އެމްއެންޑީއެފް އިން ދެވެން އޮތް ހުރިހާ ރައްކާތެރިކަން ރައީސް ނަޝީދަށް ދެއްވާނެ ކަމަށެވެ.

އަދި އެމްއެންޑީއެފްގެ ނިޒާމު ވަރުގަދަކުރުމުގެ މަސައްކަތް ސަރުކާރުން ކުރަމުންދާ ކަމަށް ވިދާޅުވިއެވެ. ރައީސް ޞާލިޙް މިހެން ވިދާޅުވެފައިވާއިރު ނަޝީދު މާލެ ވަޑައިގަތުމަކީ، ރުހިވަޑައިގަންނަވާ ކަމެއް ނޫންކަމަށް އެމްޑީޕީގެ ޗެއަރޕާރސަން ހަސަން ލަތީފް ވަނީ ދާދިފަހުން ވިދާޅުވެފައެވެ.

ރައީސް ނަޝީދު ސެޕްޓެމްބަރު މަހުގައި މާލެ ވަޑައިގަންނަވާނެ ކަމަށް އެމަނިކުފާނު ވެސް އަދި އެމަނިކުފާނުގެ އާއިލާއިން ވެސް ވިދާޅުވެފައިވަނިކޮށް، ހަސަން ލަތީފް ވިދާޅުވީ، އިންކުއަރީގެ ރިކޮމެންޑޭޝަނަށް އަމަލުކުރަން ރާވާފައިވާގޮތް އެނގުމުން ނޫނީ، އެމަނިކުފާނު މާލެ ވަޑައިގަތުމަކީއެދޭ، އަދި ރުހެވޭ ކަމެއް ވެސް ނޫން ކަމަށެވެ. ހަސަން ލަތީފް ވިދާޅުވީ، ރައީސް ނަޝީދު މާލެ ވަޑައިގަތުމަށް ނުރުހެނީ، ބޮން ގޮއްވާލުމުގެ ކުރިން ސަރުކާރަށް އެކަން އެނގިފައި ހުރި ގޮތުން ކަމަށެވެ.

މިކަމާ ގުޅޭ ގޮތުން ރައީސް ނަޝީދު ވިދާޅުވީ، އެމްޑީޕީގެ ޗެއަރ ދެކެވަޑައިގަންނަވާ ގޮތް އެއީ އަބަދުވެސް އެމަނިކުފާނު ވިސްނަވާނެ ކަމެއް ކަމަށެވެ. އަދި އެމަނިކުފާނު ގަބޫލުފުޅުކުރައްވާ ގޮތުގައި ސަރުކާރުން ވެސް އެމްޑީޕީން ދެކޭގޮތާމެދު ވިސްނަވާނެ ކަމަށް ވިދާޅުވިއެވެ.

މޭ 6 ގެ ހަމަލާގައި ލިބިވަޑައިގެންނެވި ޒަޚަމްތަކަށް ޖަރުމަންވިލާތުގައި ފަރުވާ ހޯއްދެވުމަށް ފަހު މިހާރު އިނގިރޭސިވިލާތުގައި ހުންނެވި ރައީސް ނަޝީދު މާލެ ވަޑައިގަންނަވާނީ، ސެޕްޓެމްބަރު މަހުގައި ކަމަށް އެމަނިކުފާނުގެ ބޭބޭފުޅު ޑރ. އިބްރާހީމް ނާޝިދު ވިދާޅުވިއެވެ. ނާޝިދު ވިދާޅުވީ، ތިން ހަފްތާ ވަންދެން، ކޮންމެ ހަފުތާއަކު ބޭސް ބަދަލުކުރައްވަން ޖެހިވަޑައިގަންނަވާ ކަމަށެވެ.

އެމަނިކުފާނުގެ ހާލުކޮޅު މިހާރު ވަރަށް ބޮޑަށް ރަނގަޅު ކަމަށާއި، ވާތު ފަޔަށް ލިބިވަޑައިގެންނެވި އަނިޔާއަށް އަދިވެސް ފަރުވާ ހޯއްދަވާކަމަށެވެ. ކްލަބް ހައުސްގައި “ހުޅުދޫ ވޮއިސް”ގެ ނަމުގައި އޮންނަ ކްލަބެއްގައި ބައިވެރިވެވަޑައިގެން ވާހަކަ ދައްކަވަމުން ރައީސް ނަޝީދު ވެސް ވިދާޅުވެފައިވަނީ، ސެޕްޓެމްބަރުގައި މާލެ ވަޑައިގަންނަވާނެ ކަމަށެވެ. އަދި މެއި 6 ގައި ދިން ހަމަލާއަކީ، އެހަމަލާ ހިންގި މީހުންނާ ހަމައިން އެކަނި ނިމޭނެ ކަމެއް ނޫންކަމަށާއި، އެއީ ބޮޑު ނެޓްވޯކަކުން ކޮށްފައިވާ ކަމެއް ކަމަށެވެ. އެ އެންމެން ހައްޔަރުކޮށް ފިޔަވަޅު އެޅިފައިވާކަމަށް ގަބޫލު ނުކުރައްވާކަމަށް ވެސް ވިދާޅުވިއެވެ.

އެފަދަ ދެވަނަ ބޮމެއް ރާއްޖޭގައި ގޮވާތަން ދެކެން ބޭނުންފުޅުވެވަޑައިނުގަންނަވާ ކަމަށާއި، އެކަން ކުރެވޭނީ ކަމާބެހޭ ފަރާތްތަކުން އަޅަންޖެހޭ ފިޔަވަޅު އަޅައި، ހަރުކަށި ފިކުރަށް ނިސްބަތްވާ މީހުން ހައްޔަރު ކުރެވިގެންކަމަށް އެމަނިކުފާނު ވިދާޅުވިއެވެ. އަދި މަޖިލީހުގެ 241 ކޮމެޓީން އެކުލަވާލި ރިޕޯޓުގައި ހިމެނޭ ކަންކަން ސަރުކާރުން ތަންފީޒު ކުރުމަކީ ކޮންމެހެން ކުރަންޖެހޭކަމެއް ކަމަށް ރައީސް ނަޝީދު ވިދާޅުވިއެވެ. އެމަނިކުފާނު މިހާރު ހުންނެވީ، ރާއްޖެއަށް ދިއުމަށް ވަރަށް ބޮޑަށް ކެތްމަދުވެފައި ކަމަށާއި، ބޭރުގައި އެހެން ގިނަ ދުވަސް ވަންދެން ހުރުމަކީ ފަސޭހަކަމެއް ނޫން ކަމަށް ވެސް ވިދާޅުވިއެވެ.