އައްޑޫ އިކުއެޓޯރިއަލް ހޮސްޕިޓަލްގެ ކައިރިން ނެގުމަށް ސިޓީ ކައުންސިލުން ނިންމާފައިވާ ބިމުގެ ކަންކަން ވަގުތީ ގޮތުން މަޑު ޖައްސާލުމަށް ހިތަދޫ މެޖިސްޓްރޭޓް ކޯޓުން އަމުރުކޮށްފިއެވެ.

ކޯޓުން ނެރުނު ވަގުތީ އަމުރުގައި ބުނެފައިވަނީ، މިހާރު އެ ކޯޓަށް ހުށަހަޅާފައިވާ މައްސަލަ ވަކި ގޮތަކަށް ނިމެންދެން އެ ގޯތިތައް ހުސްކުރުން މަޑު ޖައްސާލުމަށެވެ. އައްޑޫ އިކުއެޓޯރިއަލް ހޮސްޕިޓަލްގެ އިރުމަތީ ފަރާތާއި ހުޅަނގު ފަރާތުން ދޫކޮށްފައިވާ ބިންތައް އެހެން ސަރަހައްދަކަށް ބަދަލު ކުރަން އައްޑޫ ސިޓީ ކައުންސިލުން ނިންމައި، ގޯތިތަކުގެ ވެރިފަރާތަށް އެ ތަން ހުސްކުރުމަށް ކައުންސިލުން ވަނީ ޖުލައި މަހުގެ 15ވަނަ ދުވަހު އަންގާފައެވެ. އަދި ބަދަލެއް ދޭން ޖެހޭނަމަ ކައުންސިލާއެކު އެކަމާ މެދު މަޝްވަރާ ކުރުމުގެ ފުރުސަތު އޮންނާނެ ކަމަށް ވެސް ބުނެފައިވެއެވެ.

މިކަމާ ގުޅިގެން ކޯޓަށް މައްސަލަ ހުށަހެޅީ އަމިއްލަ ފަރާތްތަކަކުންނެވެ. އެ މައްސަލައިގައި ބުނެފައިވަނީ، ގޯތި ހުސްކުރުމަށް ކައުންސިލުން ނިންމީ ގޯތީގެ ވެރިންނާ އެއްވެސް ވަރަކަށް މަޝްވަރާ ނުކޮށް ކަމަށެވެ.

އެ މައްސަލައިގައި ބުނެފައިވަނީ ބިން ބަދަލުކުރުމުގެ މަސައްކަތް ވަގުތީ ގޮތުން ހުއްޓާލުމަކީ އެ މައްސަލަ ރައްދުވާ ސިޓީ ކައުންސިލާއި އެ މައްސަލަ ހުށަހެޅި ގޯތީގެ ވެރިފަރާތުގެ މަސްލަހަތަށް އެންމެ ރަނގަޅު ގޮތް ކަމަށެވެ. ކައުންސިލުން ގޯތި ބަދަލުކުރަން ނިންމި ނިންމުން މުޖާރާޖައާ ކޮށްދިނުމަށް ހުށަހަޅާފައިވަނިކޮށް އެ ފުރުސަތު ދީފައިނުވާ ކަަމަށް ވެސް މައްސަލައިގައި ބުނެފައިވެއެވެ. އަދި އެފުރުސަތު ދިނުމެއް ނެތި ސަރުކާރު ބަންދު ދުވަސްތަކުގައި ކައުންސިލް އިދާރާގެ އޮފީސް ހުޅުވައިގެން އިދާރީ ގޮތުން ކުރަން ޖެހޭ ކަންކަން ކޮށްފައިވާ ކަމަށެވެ. ގޯތީގެ ވެރިފަރާތުގެ ބަހެއް ހޯދުމެއް ނެތި ގޯތި ބަދަލު ކުރުމުގެ މަސައްކަތް ކުރަން ނިންމި ނިންމުމަކީ ގާނޫނާ ޚިލާފަށް ނިންމާފައިވާ ނިންމުމެއް ކަމަށްވެސް އެ މައްސަލައިގައި ބުނެފައިވެއެވެ.

ބަންޑާރަ ބިމަކީ ދައުލަތުގެ މިލްކިއްޔާތެއް ނަމަަވެސް ގޯތި ދޫކުރުމަށްފަހު، ދައުލަތުން އެ ބިން ބޭނުން ވެއްޖެ ހާލަތެއްގައި ވެރިފަރާތާ މަޝްވަރާ ކުރުމަށްފަހު އަދުލުވެރި އިންސާފުވެރި ބަދަލެއް ދިނުމަށްފަހު ބިން ނެގުމުގެ ބާރު ދައުލަތަށް ލިބިގެންވެއެވެ. މީގެ ކުރިން އަމަލުކޮށްފައިވަނީ ވެސް މިގޮތަށެވެ. ކުޅުދުއްފުށި ސިޓީގެ އެއަރޕޯޓު އެޅުމަށްޓަކައި ބިން ދައުލަތަށް ނެގުމުގައި ވެސް އަމަލުކޮށްފައިވަނީ މިފަދައިންނެވެ.

ގޯތިތަކާ ގުޅޭ އެހެން މައްސަލައެއްވެސް ކޯޓުގައި އޮތްއިރު ވަގުތީ އަމުރު ނެރުމުގެ ކުރިން މި މައްސަލައިގެ ފުރަތަމަ އަޑުއެހުމުގައި ކޯޓުން ނިންމާފައިވަނީ، ސިޓީ ކައުންސިލުން ޖަވާބުދާރީ ވުމަށް ފުރުސަތަކަށް އެދިފައިވާތީ އެ ފުރުސަތު ދިނުމަށެވެ. ވަގުތީ އަމުރަށް ޖަވާބު ދާރީވާން ފަސް ދުވަސް އަދި މައްސަލައަށް ޖަވާބު ދާރީވާން 10 ދުވަސް ސިޓީ ކައުންސިލަށް ދީފައިވަނީ މި މަހުގެ 4ވަނަ ދުވަހުއެވެ.

އެ ސަރަހައްދުން ބިންތައް ނެގުމަށް ކައުންސިލުން ނިންމި ނިންމުމާ ގުޅިގެން ބައެއް ފަރާތްތަކުން ހިތްހަމަނުޖެހުން ފާޅުކުރަމުންދާއިރު އެ ނިންމުމުގެ ސަބަބުން ކައުންސިލަށް ވަނީ ބޮޑެތި ފާޑުކިޔުންތަކެއްވެސް އަމާޒުވެފައެވެ.

އައްޑޫ ކައުންސިލުން ބުނިގޮތުގައި އޭއީއެޗްގެ ވަށައިގެން ހުރި ގޯތިތައް ނެގުމަށް ނިންމީ އެބިންތައް ކުއްޔަށް ދޫކޮށް ކައުންސިލަށް އާމްދަނީ ހޯދުމަށެވެ. އެ ސަރަހައްދުން 44 ގޯތި ނެގުމަށް ވަނީ ނިންމާފައެވެ. އަދި މިއީ ގާނޫނާ އެއްގޮތްވާ ގޮތުގެ މަތީން ކުރާ ކަމެއް ކަމަށް ވެސް ކައުންސިލުން ބުނެއެވެ.