މެދުނުކެނޑި، ބޭނުންވާ ވަރަށް މާލެއަށް ކަރަންޓު ފޯރުކޮށްދިނުމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް، (ސްޓެލްކޯ) އިން ކުރަމުންދާ މަސައްކަތުގެ ތެރެއިން މާލެއަށް ކަރަންޓު ފޯރުކޮށްދިނުމަށް އިތުރު ޖަނަރޭޓަރެއް ބަހައްޓައިފިއެވެ.

ސްޓެލްކޯއިން ހާމަކޮށްފައިވާ ގޮތުގައި އަލަށް ބަހައްޓާފައިވަނީ 8000 ކިލޯވޯޓުގެ ޖަނަރޭޓަރެކެވެ. މި ޖަނަރޭޓަރު ސްޓެލްކޯގައި މިހާރު އިންސްޓޯލް ކޮށްފައިވާއިރު، އެ ކުންފުނިން ހާމަކޮށްފައިވާ ގޮތުގައި މި ޖަނަރޭޓަރު މާލޭގެ ކަރަންޓު ގްރިޑާއި ގުޅައި، ބޭނުންކުރަން ފެށުމަށް އެ ކުންފުނިން ދަނީ ތައްޔާރުވަމުންނެވެ. އެގޮތުން ޓެސްޓު ކުރުމުގެ ގޮތުން، ހުކުރު ދުވަހު އާ ޖަނަރޭޓަރަށް ލޯޑުދޭން ފަށާނެ ކަމަށް އެ ކުންފުނިން ބުނެއެވެ.

އަލަށް އިންސްޓޯލް ކުރެވުނު ޖަނަރޭޓަރާއި އެކު، ސްޓެލްކޯގެ ޖުމްލަ ކެޕޭސިޓީ 76000 ކިލޯވޯޓަށް އިތުރުވެގެންދާނެއެވެ. އެ ކުންފުނިން ހާމަކޮށްފައިވާ ގޮތުގައި މި މިންވަރަކީ މާލޭގެ މިވަގުތުގެ ކަރަންޓުގެ ޑިމާންޑަށް ޚިދުމަތް ފޯރުކޮށްދެވޭނެ އެކަށޭނަ މިންވަރެކެވެ. ނަމަވެސް މާލޭގައި ކަރަންޓު ބޭނުންކުރާ މިންވަރު އަދިވެސް އިތުރުވަމުން ދާތީ އެ ކުންފުންޏާއި، ހަކަތައާއި ބެހޭ ވުޒާރާއިންވެސް ވަނީ ކަރަންޓު އިސްރާފުކުރާ މިންވަރު މަދުކުރުމަށް އިލްތިމާސްކޮށްފައެވެ.