ވިލިމާލެ ކުޑަކުދިންގެ ހިޔާގައި މިފަހުން ހިނގާފައިވާ އަލިފާނުގެ ހާދިސާތައް ތަހުގީގުކޮށްދިނުމަށް އެދި ފުލުހުންގެ މުއައްސަސާއަށް ހުށަހަޅައިފިއެވެ.

ކުޑަކުދިންގެ ހިޔާގެ ހަތަރު ވަނަ ފަންގިފިލާގައި ހުރި ކޮޓަރިއެއްގައި އަލިފާން ރޯވި ކަމުގެ މައުލޫމާތު ލިބުނީ ބުރާސްފަތި ދުވަހުގެ ހެނދުނު 06:03 ގައެވެ. އަލިފާން އެއްކޮށް 07:20 ހާއިރު ނިއްވާލާފައިވާއިރު، މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ. ނަމަވެސް ކޮޓަރީގައި ހުރި ބައެއް ތަކެއްޗަށް އެކި ވަރުގެ ގެއްލުން ލިބިފައިވެއެވެ. މިއީ މި ފަހަކުން ކުޑަކުދިންގެ ހިޔާގައި ހިނގި އަލިފާނުގެ 4 ވަނަ ހާދިސާއެވެ. ކުޑަކުދިންގެ ހިޔާގައި އެންމެ ފަހުން އަލިފާނުގެ ހާދިސާއެއް ހިނގާފައިވަނީ މިދިޔަ މެއި މަހުގެ 4 ވަނަ ދުވަހުއެވެ. މި އަލިފާނުގެ ހާދިސާއާ ގުޅިގެން ގިނަ ބައެއްގެ ފާޑުކިޔުން ވަނީ އަމާޒުވެފައެވެ. އަދި މިކަމާ ހިތްހަމަ ނުޖެހުން ފާޅުކޮށް އާކުން ވަނީ ބަޔާނެއް ވެސް ނެރެފައެވެ.

މިމައްސަލައާ ގުޅޭގޮތުން ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން ޖެންޑާ މިނިސްޓްރީގެ ޑިރެކްޓަރު ނިޝާ އަލީ ވިދާޅުވީ އަލިފާނުގެ ހާދިސާ ހިނގި ސަބަބު އޮޅުން ފިލުވުމަށް މި މައްސަލަ ފުލުހުންނަށް ހުށަހަޅާފައިވާ ކަމަށެވެ. ހާދިސާ ހިނގިގޮތް އެނގިގެންދާނީ މައްސަލަ ތަހުގީގުކޮށް ނިމުމުން ކަމަށް ނިޝާ ވިދާޅުވިއެވެ.

ޑެޕިއުޓީ ޑިރެކްޓަރ ޖެނަރަލް ރިޝްމީ އާމިރު ވިދާޅުވީ ކުޑަކުދިންގެ ހިޔާއާ ބެހޭ ގިނަ މައްސަލަތައް ފެންމަތިވެފައިވާ ކަމަށެވެ. މިހާރުގެ ހާލަތަށް ބަލާއިރު، ކުޑަކުދިންގެ ހިޔާގައި އެކުދިންނަށް ފޯރުކޮށްދޭން ޖެހޭ ރައްކާތެރިކަން އެދެވޭ ގޮތުގައި ފޯރުކޮށްނުދެވޭކަން އޭނާ ފާހަގަކުރެއްވިއެވެ. އެގޮތުން ކުޑަކުދިންގެ ހިޔާގައި ތިބި ކުދިން އަތޮޅުތަކުގައި ގާއިމްކޮށްފައިވާ އަމާންވެށިތަކަށް ބަދަލުކޮށްފައިވާ ކަމަށް ރިޝްމީ ވިދާޅުވިއެވެ. އަދި ވިދާޅުވީ އެއީ އެކުދިންނަށް އާއިލާއެކު ދިރިއުޅުމުގެ ފުރުސަތު ފަހިކޮށްދިނުމުގެ މަގުސަދުގައި ކުރިއަށް ގެންދެވުނު މަސައްކަތެއް ކަމަށެވެ.

ކުޑަކުދިންގެ ހިޔާގައި ގިނަ މައްސަލަތަކެއް ހުރިކަން ޖެންޑާ މިނިސްޓްރީން ވެސް ފާހަގަކޮށްފައިވާއިރު، މިހާރު އެތަން ވަނީ ހުސްކޮށްފައެވެ. އެތަނުގައި މިހާރު އެއްވެސް ކުއްޖެއް ދިރިއެއް ނޫޅޭނެއެވެ.