ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް, ދިން ޓެރަރިސްޓްގެ ހަމަލާއާ ގުޅިގެން ހައްޔަރުކުރި އެއްވެސް މީހަކު ދޫކޮށްލައިނުވާ ކަމަށް ފުލުހުން ބުނެފިއެވެ.

މެއި 6ގެ ހަމަލާއާ ގުޅިގެން ހައްޔަރުކުރި މީހުންގެ ތެރެއިން ތިން މީހަކު ދޫކޮށްލުމަށް ކްރިމިނަލް ކޯޓުގެ ގާޒީ ޙަސަން ސަޢީދު ބުދަ ދުވަހު ވަނީ އަމުރުކޮށްފައެވެ. މިމައްސަލައާ ގުޅިގެން ރާއްޖެއެމްވީއަށް ފުލުހުން ބުނީ ރައީސް ނަޝީދަށް އަމާޒުކޮށް, ދިން ޓެރަރިސްޓް ހަމަލާއާ ގުޅިގެން ހައްޔަރުކޮށްފައިވާ އެއްވެސް މީހަކު ދޫކޮށްލާފައިނުވާ ކަމަށެވެ. ނަމަވެސް ހަރުކަށި ފިކުރާ ދެކޮޅަށް ފުލުހުން ހިންގި އޮޕަރޭޝަން ތަކުގައި ހައްޔަރުކުރި ތިން މީހަކު ކޯޓަށް ހާޒިރުކުރުމުން ބަންދުން ދޫކޮށްލަން އަމުރުކޮށްފައިވާ ކަމަށް ފުލުހުން ބުނެފައިވެއެވެ.

ރައީސް ނަޝީދަށް އަމާޒުކޮށް، ދިން ޓެރަރިސްޓް ހަމަލާއާ ގުޅިގެން މާލެސިޓީގެ އިތުރުން އަތޮޅުތެރޭގެ ރަށްތަކުގައި ފުލުހުންނާއި، ސިފައިން ގުޅިގެން ޚާއްސަ އޮޕަރޭޝަންތައް ކުރިއަށް ގެންގޮސްފައިވެއެވެ. އެގޮތުން އައްޑޫ ސިޓީގައި ކުރިއަށް ގެންދިޔަ ޚާއްސަ އޮޕަރޭޝަނެއްގައި ހަރުކަށި ފިކުރުގެ ބައެއްކަމަށް ތަހުމަތުކުރެވޭ ބަޔަކު ހައްޔަރުކޮށްފައި ވެސް ވެއެވެ.

މެއި މަހުގެ 6ވަނަ ދުވަހު ރައީސް ނަޝީދު އަވަހާރަކޮށްލުމަށް، އައިއީޑީއެއް ގޮއްވާލައިގެން ދިން ހަމަލާގައި އަމަލީ ގޮތުން ބައިވެރިވި ފަސް މީހެއްގެ ވަނަވަރު ވަނީ ހާމަކޮށްފައެވެ. ފުލުހުން ވަނަވަރު ހާމަ ކޮށްފައިވާ މީހުންގެ ތެރޭގައި ހިމެނެނީ ވ. ތިނަދޫ ލަކީ 25 އަހަރުގެ އަދުހަމް އަޙްމަދާއި، މއ. ފޭރުގެ 21 އަހަރުގެ މުޖާޒް އަޙްމަދާއި، ގއ. ކޮނޑޭ ފޮޅޭމާ 32 އަހަރުގެ ތަހުމީން އަޙްމަދާއި، ލ. ގަން ދުންފިނިއުފާ 23 އަހަރުގެ އަޙްމަދު ފާތިޙު، އަދި ނ. މަނަދޫ ނޫރީގެ 27 އަހަރުގެ ޢަލީ ހައިޝަމްއެވެ. މިހަމަލާއާ ގުޅިގެން 8 މީހަކު ހައްޔަރުކުރި ނަމަވެސް އެހުރިހާ އެންމެންގެ ވަނަވަރު ހާމަކޮށްފައެއް ނުވެއެވެ. މިހަމަލާގެ ތަހުގީގު މިމަހުގެ ތެރޭގައި ނިމޭނެކަމަށް ޕްރޮސެކިޔުޓަރ ޖެނެރަލް ޙުސައިން ޝަމީމް ވިދާޅުވެފައެވެ.