ދެވަނަ ޑޯޒް ޖަހަން ފެށި މީހުންގެ އަދަދު އިތުރުވެ ހޯމަ ދުވަހު އެކަނިވެސް 4982 މީހަކު ވެކްސިންގެ ދެވަނަ ޑޯޒް ފުރިހަމަކޮށްފިއެވެ.

ހެލްތް ޕްރޮޓެކްޝަން އެޖެންސީ (އެޗްޕިއޭ) އިން އާންމުކޮށްފައިވާ މައުލޫމާތުތައް ދައްކާގޮތުން، ހޯމަ ދުވަހު 4982 މީހަކު ވެކްސިން ފުރިހަމަކޮށްފައިވާ އިރު، މާލެ ސަރަހައްދުން ދެވަނަ ޑޯޒް ޖެހީ 4174 މީހެކެވެ. އަދި އަތޮޅު ތެރެއިން 808 މީހަކު ވަނީ ވެކްސިންގެ ދެވަނަ ޑޯޒް ޖަހާފައެވެ. މިއާއެކު ރާއްޖޭގައި ވެކްސިން ފުރިހަމަ ކުރި މީހުންގެ އަދަދު ވަނީ 199،784ށް އަރާފައެވެ.

ހޯމަ ދުވަހު 151 މީހަކު ވަނީ ވެކްސިންގެ ފުރަތަމަ ޑޯޒް ޖަހާފައެވެ. އެއީ މާލެ ސަރަހައްދުން ވެކްސިން ޖެހި 33 މީހުންނާއި، އަތޮޅުތެރެއިން ވެކްސިން ޖެހި 118 މީހުންނެވެ. މިއާއެކު ފުރަތަމަ ޑޯޒް ޖެހި މީހުންގެ އަދަދު ވަނީ 317،549ށް އަރާފައެވެ.

އެޗްޕީއޭއިން ބުނީ ސިނޮފަރމްގެ ފުރަތަމަ އަދި ދެވަނަ ޑޯޒް ޖެހުމުގެ ކަންކަން ބުދަ ދުވަހު ވެސް ކުރިއަށްދާނެ ކަމަށެވެ. އެގޮތުން ސެނަހިޔާ އަދި ޓްރީޓޮޕް ހޮސްޕިޓަލުން ހެނދުނު 9:00ން 11:00ށް ވެކްސިން ޖެހުމުގެ ކަންކަން ކުރިއަށްދާނެ ކަމަށެވެ.

މީގެ އިތުރުން ކޮވިޝީލް ވެކްސިންގެ ދެވަނަ ޑޯޒް ޖެހުމަށް އެޕޮއިންޓްމެންޓަށް ވަނީ ހުޅުވާލާފައެވެ. އެގޮތުން ފެބްރުއަރީ އަދި މާޗް މަހު މާލެ ސަރަހައްދުގައި ކޮވިޝީލްޑް ވެކްސިންގެ ފުރަތަމަ ޑޯޒް ޖަހާފައިވާ ފަރާތްތަކުން އެޕޮއިންޓްމަންޓަށް އެދުމަށް ވަނީ އެދިފައެވެ.