ދުނިޔޭގެ ލޭ ހަދިޔާ ކުރުމުގެ ދުވަހާ ގުޅުވައިގެން ބީއެމްއެލްގެ މުވައްޒަފުން ލޭ ހަދިޔާ ކުރުމުގެ ކޭމްޕެއް ބާއްވައިފިއެވެ.

މާލެ، ކުޅުދުއްފުށި، އަދި މަނަދޫގައި މަސައްކަތް ކުރާ ބީއެމްއެލްގެ މުވައްޒަފުންނާއި އެފަރާތްތަކުގެ އާއިލާއިން ވަނީ މި ހަރަކާތުގައި ބައިވެރިވެ ލޭ ހަދިޔާކޮށްފައެވެ.

ތެލެސީމިއާ ކުދިންނަށް ލޭ ބޭނުންވާ މިންވަރަށް ބަލައި، ދެމެހެއްޓެނިވި ގޮތެއްގައި ލޭ ހަދިޔާކުރުމުގެ މުހިންމު ބޭނުމުގައި ކޮންމެ ތިންމަހަކުން އެއް ފަހަރު މުވައްޒަފުންނަށް އަމާޒުކޮށް މިފަދަ ލޭ ހަދިޔާކުރުމުގެ ކޭމްޕް ބޭއްވުމަށް ބޭންކުން ވަނީ ނިންމާފައެވެ.

މި ހަރަކާތް މާލޭގައި ކުރިޔަށް ގެންގޮސްފައިވަނީ މޯލްޑިވްސް ބްލަޑް ސަރވިސަސް އާ ގުޅިގެންނެވެ. އަދި އަތޮޅު ހޮސްޕިޓަލާއި ރީޖަނަލް ހޮސްޕިޓަލް މެދުވެރިކޮށް، އަތޮޅު ލޭ ހަދިޔާ ކުރުމުގެ މި ޕްރޮގްރާމް ވަނީ ކުރިއަށް ގެންގޮސްފައެވެެ. ދެ ދުވަހަށް ކުރިޔަށްދާ މި ކޭމްޕްގައި ބޭންކްގެ 70ށްވުރެ ގިނަ މުވައްޒަފުން ބައިވެރިވުމަށްވަނީ ރަޖިސްޓްރީ ކޮށްފައެވެ.

ކޮންމެ 3 މަހަކުން ލޭ ހަދިޔާ ކުރުމުގެ ބޭނުމަކީ ތެލެސީިއާ ކުދިންނަށް ބޭނުންވާ ލޭ ލިބުމުގައި ދިމާވާ ދަތިތައް ފިލުވައިދިނުން ކަމަށް ބޭންކުން ބުނެއެވެ.

ކޭމްޕްގެ ކުރިން، ލޭ ހަދިޔާ ކުރުމުގެ މުހިންމުކަމާ ގުޅޭގޮތުން މުވައްޒަަފުންނަށް މައުލޫމާތު ދިނުމަށް ޚާއްސަ ސެޝަން ތަކެއްވެސް ކުރިއަށް ގެންގޮސްފައި ވެއެވެ.