ޕާޓީގެ އަސާސީ ގަވައިދާ ޚިލާފު މީހުން ޕާޓީން ވަކިކުރެވެން ޖެހޭ ކަމަށް އެމްޑީޕީގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

އިމްތިޔާޒު ކޮމިޓީއަށް އެމަނިކުފާނު ފޮނުއްވި، ޑިފެންސް މިނިސްޓަރުގެ ނައިބު މައްސަލަ ކޮމިޓީން ބޭރުކޮށްލި މައްސަލައިގައި ހިތްހަމަނުޖެހުން ފާޅުކުރައްވައި މީގެ ކުރިންވެސް ވާހަކަފުޅު ދެއްކަވާފައިވެެއެވެ.

ރައީސް ނަޝީދު ވިދާޅުވީ، ޕާޓީގެ ފިޔަވަޅުއަޅާ ކޮމިޓީގެ ބޭނުމަކީ އަސާސީ ގަވައިދާ ޚިލާފުވާ މީހުން ޕާޓީން ވަކިކުރުން ކަމަށާއި، އެމްޑީޕީއަކީ ރައްޔިތުންގެ ޕާޓީއެއް ކަމަށެވެ. ކަންކަން ނިންމާނީވެސް މެމްބަރުން ކަމަށެވެ. ގައުމީ މަޖިލީހުންނާއި ޕާލިމެންޓަރީ ގްރޫޕުންވެސް ނޫން ކަމަށެވެ.

ޖޭޕީގެ މެމްބަރުންގެ ހުށަހެޅުމަށް އެމްޑީޕީގެ މެމްބަރުން ވޯޓު ދިނީ އެސްޖީ ލޮބީ ކޮށްގެން ކަމަށެވެ. މިއީ ޕާޓީގެ އަސާސީ ގަވައިދާ ޚިލާފުކަމެއް ކަމަށް ރައީސް ނަޝީދު ވިދާޅުވެފައިވެއެވެ. އެމްޑީޕީއަކީ ވަރަށް ގިނަ ސިޔާސީ ޕާޓީތަކުގެ ތަޖުރިބާގައި އެކުލަވާލި ޕާޓީއެއް ކަމަށާއި، އޭގެ ތެރޭގައި ޚާއްސަކޮށް ސައުތު އޭޝިއާގެ ޕާޓީތައް ހިމެނޭކަމަށެވެ. ވިދާޅުވީ، މިއޮޑިއެއް ނުފެތޭނެ ކަމަށެވެ، އަދި އަޒުމެއްވެސް ނުގުޑާނެ ކަމަށެވެ.

ބިގޭ ވިދާޅުވެފައިވަނީ އިމްތިޔާޒު ކޮމިޓީން މައްސަލަ ބޭރު ކުރުމުގައި އޭނާގެ އެއްވެސް ދައުރެއް ނޯންނާނެ ކަމަށެވެ.

އެމްޑީޕީ ދެބައިވީ ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އެކަހެރިކޮށް ސަރުކާރު ހިންގަވަން އުޅުއްވުމުން ކަމަށް ރައްޔިތުންގެ މަޖިލީހުގެ މެންބަރު އަދި އެމްޑީޕީގެ ޗެއާޕަރސަން ޙަސަން ލަޠީފުވެސް މިވަނީ ވިދާޅުވެފައެވެ.

އޭނާ މިހެން ވިދާޅުވީ ވެރިކަމުގެ ދެބާރެއް އޮތީ އެމްޑީޕީގެ ތެރޭގައި ކަމަށާއި އެ ދެބާރުގެ މަސައްކަތުގެ ތެރެއިން ރައްޔިތުންގެ މަޖިލީހާއި ސަރުކާރުގެ މަސައްކަތް ދެބައިވެ، އަދި އެމްޑީޕީގެ މަސައްކަތް ވެސް ދެބައިވެފައިވާ ކަމަށް، ރައްޔިތުންގެ މަޖިލީހުގެ އަލިފުށީ ދާއިރާ މެމްބަރު މުޙައްމަދު ރަޝީދު ޙުސައިން (ބިގޭ) ވިދާޅުވުމުންނެވެ.

މިކަމަށް ރައްދު ދެއްވައި ޙަސަން ލަޠީފު ކުރެއްވި ޓްވީޓްގައި ވިދާޅުވެފައިވަނީ، މަސައްކަތްތައް ދެބައިވީ އެމްޑީޕީން ވައުދުވި ކަންކަން ކުރަން ސަރުކާރުން ބޭނުންނުވުމުން ކަމަށެވެ. އަދި އެމްއެމްޕީއާރްސީގެ މައްސަލައާ ކޮރަޕްޝަންގެ މައްސަލަތައް ބަލަން ސަރުކާރުން ފޫކަހަން ފެށުމުން ކަމަށާއި ސަރުކާރާއި ޕާޓީގެ ގުޅުން ވެސް ހީނަރުކޮށްލުމުން ކަމަށެވެ.

އޭނާ އިތުރަށް ވިދާޅުވީ، ޖުމްލަކޮށް ރައީސް ނަޝީދާއި ޕާޓީ އެކަހެރިކޮށްފައި ސަރުކާރު ހިންގަމުން އުޅުމުން ގުޅުންތައް ދެބައިވެގެންދިޔަ ކަމަށެވެ.